ۇكىمەت وتىرىسىندا فارماتسەۆتيكا جانە مەديتسينا ونەركاسىبىن دامىتۋدىڭ 2020-2025 جىلدارعا ارنالعان كەشەندى جوسپارى قارالدى. دەنساۋلىق ساقتاۋ ءمينيسترى الەكسەي تسويدىڭ پىكىرىنشە, قۇجات مەديتسينالىق جانە فارماتسەۆتيكالىق ونەركاسىپتى دامىتۋ ءۇشىن, اسىرەسە, جاڭا دارىلىك زاتتاردى شىعارۋ, تج جانە كارانتين كەزەڭىندە جۇمىس ىستەپ تۇرعان ءوندىرىستىڭ قۋاتىن ارتتىرۋ ءۇشىن ماڭىزدى.
«كەشەندى جوسپاردا فارماتسەۆتيكالىق جانە مەديتسينالىق ونەركاسىپتى قولداۋ مەن دامىتۋدىڭ نەگىزگى باعىتتارى كوزدەلگەن: فارماتسەۆتيكالىق قىزمەتتى, ەاەو شەڭبەرىندە دارىلىك زاتتار مەن مەديتسينالىق بۇيىمداردىڭ اينالىسىن رەتتەيتىن زاڭنامالىق جانە نورماتيۆتىك اكتىلەر, مەملەكەتتىك قولداۋ شارالارى, عىلىمي-زەرتتەۋ جانە تاجىريبەلىك-كونسترۋكتورلىق جۇمىستار, ينۆەستيتسيا تارتۋ, سالانى كادرمەن قامتاماسىز ەتۋ, دارىلىك زاتتاردى تاڭبالاۋ, ولاردى قاداعالاۋ جانە وتاندىق دارىلىك زاتتار مەن مەديتسينالىق بۇيىمداردى وندىرۋشىلەردىڭ قۋاتىن ارتتىرۋ», - دەدى ا.تسوي. كەشەندى جوسپاردا بەلگىلەنگەن ءىس-شارالار وتاندىق دارىلىك زاتتار جەلىسىن 297 اتاۋعا جانە مەديتسينالىق بۇيىمدار جەلىسىن 2348-گە ارتتىرۋدى كوزدەيدى, بۇل قازاقستان رەسپۋبليكاسىنىڭ دارىلىك زاتتار مەن مەديتسينالىق بۇيىمدار نارىعىنداعى وتاندىق وندىرۋشىلەردىڭ ۇلەسىن 2025 جىلعا قاراي اقشالاي 17 پايىزدان 30 پايىزعا دەيىن, ال زاتتاي 39 پايىزدان 50 پايىزعا دەيىن ارتتىرۋعا مۇمكىندىك بەرەدى.«قازاقستان رەسپۋبليكاسى نارىعىندا وتاندىق وندىرۋشىلەردىڭ ۇلەسىن 50% جەتكىزۋ ۇلتتىق دارىلىك قاۋىپسىزدىكتى قامتاماسىز ەتەدى, ال ددسۇ ءاربىر ەلدە وتاندىق دارىلىك زاتتار مەن مەديتسينالىق بۇيىمداردىڭ ۇلەسىن كەمىندە 30 پايىزعا جەتكىزۋدى ۇسىنادى», - دەدى ا.تسوي.