پاندەميا باستالعالى جيىلەپ كەتكەن شەكتەۋ شارالارى كۇندەلىكتى گازەت, حات-حابار تاسىمالداۋعا دا ايتارلىقتاي قيىندىق, كەدەرگى تۋعىزىپ وتىر. سوعان قاراماستان, «قازپوشتا» ءوز قىزمەتىن بۇرىنعىداي مۇلتىكسىز اتقارۋىنان جاڭىلماي كەلەدى.
شەكتەۋ شارالارى جاريالانعانىمەن, ەل گازەت پەن حابار-وشار الۋدان شەكتەلگەن جوق. ىندەت كۇشەيىپ, ءتارتىپ قاتايىپ كەتكەن كەزەڭدەردە دە كارانتينگە جابىلعان ەلدى مەكەندەرگە ارىپتەستەرىمىز ماسكا, قولعاپ, ارنايى قورعانىش كيىمىن كيىپ بارىپ ءجۇردى.
اپتاسىنا 5 مارتە شىعىپ تۇراتىن ەلىمىزدىڭ باس باسىلىمى «Egemen Qazaqstan» گازەتى وبلىس ورتالىعى مەن اۋدان ورتالىقتارىندا, سونداي-اق ايماقتاعى ءتورت قالادا تۇرىپ جاتقان وقىرماندارىنىڭ قولىنا باسپادان شىققان كۇنى تيەدى. ال اۋدان ورتالىقتارىنان شالعاي جاتقان اۋىلدارعا ءارى كەتكەندە 1 تاۋلىكتىڭ ىشىندە جەتكىزىلەدى. گازەتتى ءتيىستى مەكەنجايعا دەر ۋاقىتىندا جەتكىزۋدە وبلىس اكىمدىگى, تاسىمالداۋدى ۇيىمداستىرۋ, كولىك ءبولۋ جاعىنان كوپ كومەك تيگىزىپ, ۇلكەن قولداۋ جاساپ وتىرعانىن ايتا كەتكەن ءجون.
بۇگىندە ايماقتا جالپى سانى 300 پوشتاشى جۇمىس ىستەيدى. ال وبلىس ورتالىعىندا 53 ادام, ءبىزدىڭ بولىمشەدە 14 پوشتا قىزمەتكەرى گازەت تاسىمالداۋمەن اينالىسادى. ءوز باسىم وسى سالادا جەتى جىلدان بەرى قىزمەت ەتىپ كەلەمىن. قوستاناي قالاسىنداعى س.بايماعامبەتوۆ كوشەسى مەن م.حاكىمجانوۆا كوشەسىنىڭ ارالىعىنداعى تۇرعىن ۇيلەرگە حات-حابار, گازەت-جۋرنال تاسيمىن. بۇرىن جۇمىس كۇنى التى كۇن ەدى, كرانتينگە بايلانىستى 5 كۇندىك بولىپ قىسقارتىلدى. كۇندەلىكتى جۇمىسىمىز تاڭەرتەڭگى ساعات 8.00-دە باستالادى. 1 ساعات بويى گازەت-جۋرنال, باسقا دا حابار-وشارلار سۇرىپتالىپ, ساعات توعىزدا اركىم ءوز ۋچاسكەسىنە جول تارتادى. گازەتتى جاياۋ ءجۇرىپ تاراتامىز. ءوز باسىم ەڭ الدىمەن مەكەمەلەردى ارالاپ شىعامىن. سودان كەيىن عانا تۇرعىن ۇيلەرگە كوشەمىن. جۇمىسىم ءارى كەتكەندە ساعات 11-11.30-عا دەيىن اياقتالادى. كۇن سايىن وقىرماندارعا شامامەن 100 شاقتى «Egemen Qazaqstan» گازەتىنىڭ جاڭا ءنومىرىن جەتكىزەمىن. كوپ قاباتتى تۇرعىن ۇيلەردىڭ پوشتا جاشىكتەرىنە سالىپ كەتەمىن. ال جەكە ۇيلەردە تۇراتىن ۇلكەن كىسىلەر گازەت كەلەتىن ۋاقىتتى ابدەن جاتتاپ العان. ادەتتە ەسىگىنىڭ الدىنا شىعىپ مەنى انادايدان كۇتىپ الادى. جىلى امان-ساۋلىقتان سوڭ قولىنا گازەتىن ۇستاتامىن. جىميىپ, العىسىن ايتىپ قالادى. ءبىزدىڭ باستى مىندەتىمىز – جاڭا ءنومىردى گازەت شىققان كۇنى وقىرماننىڭ قولىنا تابىس ەتۋ. بۇل اماناتتى ادال ورىنداپ كەلەمىز.
9-قازان – دۇنيەجۇزىلىك پوشتا وداعىنىڭ كۇنى. دەمەك, پوشتاشىلاردىڭ ءتول مەرەكەسى. دۇنيەجۇزىلىك پوشتا كۇنى – بىرىككەن ۇلتتار ۇيىمى جۇيەسىندە اتاپ وتىلەتىن حالىقارالىق كۇندەردىڭ ءبىرى.
بۇل كۇنى دۇنيەجۇزىلىك پوشتا وداعى 14-ءشى كونگرەسىنىڭ شەشىمىمەن وداقتىڭ 1874 جىلى قۇرىلعان كۇنى قۇرمەتىنە اتاپ وتىلەدى.
1874 جىلى 9 قازاندا شۆەيتساريانىڭ بەرنە قالاسىندا 22 ەلدىڭ وكىلدەرى باس پوشتا وداعىنىڭ نەگىزىن بەكىتەتىن بەرن كەلىسىمىنە قول قويدى. 1878 جىلى وداق ءوز اتاۋىن وزگەرتىپ, دۇنيەجۇزىلىك پوشتا وداعى دەپ اتالا باستادى. بۇگىنگى تاڭدا دپو-عا 189 مەملەكەت مۇشە. بۇكىل الەمدە 9 قازاننان باستاپ حالىقارالىق حات اپتالىعى وتكىزىلەدى. ءبىزدىڭ ەلىمىز بۇل وداققا 1992 جىلدىڭ 27 تامىزىندا مۇشە بولىپ كىردى. سودان بەرى بۇل كۇن قازاقستاندا پوشتاشىلار مەرەكەسى رەتىندە جىل سايىن اتاپ ءوتىلىپ كەلەدى. ءبىز دە وبلىستىڭ ءار تۇپكىرىندە جۇمىس ىستەپ جۇرگەن ءوزىمىزدىڭ پوشتاشى, سۇرىپتاۋشى, جۇرگىزۋشى, ينكاسساتور ماماندار مەن ءبولىم باسشىلارىنىڭ باسىن قوسىپ وزىمىزشە اتاپ وتەمىز.
سۆەتلانا زەزيۋلينا,
«قاپوشتا» اق №1 جەتكىزۋ ءبولىمىنىڭ قىزمەتكەرى
قوستاناي