شاردارا سۋ ەلەكتر ستانتسياسىنداعى ءتورت گيدرواگرەگات تولىق اۋىستىرىلدى. جاڭا گيدرواگرەگاتتار سۋ ەلەكتر ستانتسياسىندا ەلەكتر ءوندىرۋدى جىلىنا 480-نەن 537 ملن كۆت/ساعاتقا دەيىن ۇلعايتۋعا مۇمكىندىك بەرەدى. وسىلايشا «سامۇرىق-ەنەرگو» اق شاردارا سەس-ءىن تولىق جاڭعىرتۋ باعدارلاماسىن, ياعني جالپى قۇنى 38 ملرد تەڭگەلىك جوبانى اياقتادى.
«سامۇرىق-ەنەرگو» اق ۇكىمەتپەن بايلانىس جانە كوممۋنيكاتسيالار قىزمەتىنىڭ حابارلاۋىنشا, قۇرىلىستى اۆستريالىق-گەرمانيالىق «Andritz Hidro GmbX» كومپانياسى جۇرگىزگەن. اۋقىمدى قايتا قۇرۋ جۇمىستارىنىڭ ناتيجەسىندە سەس-ءتىڭ قۋاتتىلىعى 100 مۆت-تان 126 مۆت-قا ارتتى. قازاقستاندىق ەلەكتر ەنەرگەتيكالىق حولدينگ ماماندارى بۇل جوبا قۋات تاپشىلىعىن سەزىنىپ وتىرعان تۇركىستان وبلىسىن ەلەكتر ەنەرگياسىمەن قامتاماسىز ەتۋدە جانە وڭىردەگى سۋ رەسۋرستارىن پايدالانۋدىڭ تيىمدىلىگىن ارتتىرۋدا ۇلكەن ماڭىزعا يە ەكەنىن ايتۋدا. سونداي-اق جۇرگىزىلگەن جاڭعىرتۋ جۇمىستارى سۋ ستانتسياسىنىڭ قىزمەت ەتۋ مەرزىمىن 35-40 جىلعا دەيىن ۇزارتادى, اپات دەڭگەيىن تومەندەتەدى.
ايتا كەتەلىك, شاردارا سەس-ءى 1967 جىلى پايدالانۋعا بەرىلگەن, بەلگىلەنگەن قۋاتتىلىعى — 100 مۆت. نورماتيۆ بويىنشا قىزمەت ەتۋ مەرزىمى 25 جىل بولسا, ستانتسيا 50 جىلدان استام ۋاقىت بويى پايدالانىلىپ كەلەدى, ياعني ونىڭ تەحنولوگيالىق جابدىعى 100% توزعان. سۋ ستانتسياسىندا ورناتىلعان ەلەكتر جابدىعىنىڭ ءبىر بولىگىن ونى جاساعان زاۋىتتار قازىر شىعارمايدى جانە وندىرىستەن الىپ تاستاعان. دەمەك, قايتا جاڭارتۋ جۇمىستارى تەحنيكالىق قاجەتتىلىكتەن تۋىنداپ, ستانتسيانىڭ زاماناۋي تەحنولوگيامەن جۇمىس ىستەۋىنە جاسالعان مۇمكىندىك.
تۇركىستان وبلىسى