قازىرگى كەزدە ەپيدەميالىق جاعدايعا بايلانىستى قاۋەسەت كوبەيىپ كەتتى. سونىڭ ءبىرى الماتىنىڭ كارانتينگە قايتا جابىلاتىنى تۋرالى ەدى. دۇيسەنبى كۇنى قالانىڭ باس سانيتار دارىگەرى جانداربەك بەكشين مۇنداي اقپاراتتاردىڭ جالعان ەكەنىن مالىمدەدى.
الماتى قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى, الماتى قالاسىنىڭ باس مەملەكەتتىك سانيتار دارىگەرى جانداربەك بەكشين مەگاپوليستىڭ ەپيدەميالىق احۋالى, كۆي, جرۆي جانە تۇماۋعا شالدىعۋ جاعدايى تۋرالى بايانداي وتىرىپ, سوڭعى كۇندەرى قابىلدانعان قاۋلىنىڭ جاي-جاپسارىن ءتۇسىندىردى.
ونىڭ ايتۋىنشا, الماتىداعى كوروناۆيرۋس ينفەكتسياسىنىڭ ەپيدەميالىق جاعدايى تۇراقتى. تاۋلىكتىك ءوسىم كورسەتكىشى 0,006% قۇرايدى, تارالۋ يندەكسى 1 پايىزدان تومەن. بيىلعى قىركۇيەك ايىندا بارلىعى 165 كۆي جاعدايى تىركەلسە (106 سيمپتوممەن جانە 59 سيمپتومسىز), سونداي-اق 194 ەتيولوگياسى بەلگىسىز پنەۆمونيا تابىلدى. ەپيدەميالىق زەرتتەۋلەر بارىسىندا كۆي وشاقتارىندا 305 بايلانىس انىقتالدى, ونىڭ 3 جاعدايى پتسر ادىسىمەن انىقتالدى.
وزىق زەرتحانالىق زەرتتەۋ ادىستەرىن قولدانا وتىرىپ, بۇرىن انىقتالعان پنەۆمونيانىڭ 48,4%-عا جۋىعى, ياعني 247 پاتسيەنتتىڭ قورىتىندى ساراپتامالارى تەرەڭىرەك زەرتتەلدى. زەرتتەۋ بارىسىندا 35 COVID-19 دياگنوزى (14%) انىقتالسا, 87 باكتەريالىق پنەۆمونيا (35%) ناقتىلاندى.
ال 4 قازاندا قالادا سيمپتومسىز كۆي جۇقتىرعان 1 ناۋقاس جانە ەتيولوگياسى بەلگىسىز پنەۆمونياعا شالدىققان 1 ادام انىقتالعان.
ىندەتتىڭ تارالۋىن توقتاتۋ ءۇشىن قاشىقتان وقىتۋ فورماتى ەنگىزىلگەنى بەلگىلى. بىراق اتا-انالارى قاداعالاۋعا مۇمكىندىگى جوق بالالار ءۇشىن 178 مەكتەپتە 11 942 وقۋشىعا ارنالعان 917 كەزەكشى سىنىپتاردا بارلىق پروفيلاكتيكالىق ءىس-شارانى ساقتاي وتىرىپ ءبىلىم الۋعا جول بەرىلدى (9,8% باستاۋىش سىنىپ وقۋشىلارى). سونداي-اق وقۋشىلار سانى از 10 مەكتەپ پەن 8 مەكتەپ-ينتەرنات قالىپتى جۇمىس ىستەۋگە رۇقسات ەتىلگەن. وقۋ باستالعانعا دەيىن ارنايى موبيلدىك توپتار ءبىلىم بەرۋ نىساندارىنا دايىندىق اكتىلەرىن بەردى. تەكسەرۋلەر كەزىندە انىقتالعان كارانتيندىك رەجىم بۇزۋ فاكتىلەرى ساباق باستالعانعا دەيىن جويىلعان.
قىركۇيەك ايىندا مەكتەپ وقۋشىلارى اراسىندا كۆي-ءدىڭ 7 جاعدايى تىركەلدى, ولاردىڭ بارلىعى قاشىقتان وقىعان كەزدە اۋرۋعا شالدىققان. ەپيدەميالىق تەرگەۋ قورىتىندىسىندا 4 وقۋشى اۋرۋدى ءوز تۋىستارىنان, 2 وقۋشى مەديتسينالىق مەكەمەلەرگە جرۆي بەلگىلەرىمەن جۇگىنگەن كەزدە جۇقتىرعانى انىقتالدى. 1 وقۋشى برونح دەمىكپەسىنەن ساناتورلىق-كۋرورتتىق ەمدەلۋ الدىندا پروفيلاكتيكالىق تەكسەرۋ كەزىندە ىندەتكە شالدىققان. ال مەكتەپكە دەيىنگى بالالار اراسىندا كۆي تابىلعان جوق.
باس سانيتاردىڭ مالىمدەۋىنشە, الماتىدا جرۆي-مەن سىرقاتتانۋدىڭ ەپيدەميالىق جاعدايى دا تۇراقتى. ەپيدەميالىق ماۋسىم باستالعالى بەرى, ياعني 2019 جىلدىڭ 1 قازانىنان 2020 جىلدىڭ 30 قىركۇيەگىنە دەيىن جرۆي-ءدىڭ 85 975 جاعدايى تىركەلدى. بۇل وتكەن ەپيدەميالىق ماۋسىمنىڭ كەزەڭىمەن سالىستىرعاندا 3,6% تومەن. 14 جاسقا دەيىنگى بالالار اراسىندا 48 478 جاعداي تىركەلىپ, ولاردىڭ ۇلەسى 56,4%-دى قۇرادى. بۇل – الدىڭعى ەپيدەميالىق كەزەڭمەن سالىستىرعاندا 8% تومەن. ال 1 جاسقا دەيىنگى بالالاردىڭ ۇلەسى سوڭعى ەپيدەميالىق ماۋسىمعا قاراعاندا (11,2% نەمەسە 6 098 جاعداي) 17,7%-دى (8 614 جاعداي) قۇرادى. جۇكتى ايەلدەر اراسىندا جرۆي-ءدىڭ 856 (0,9%) جاعدايى تىركەلدى, وتكەن ماۋسىمدا 750 (0,88%) جاعداي بولعان ەدى.
جرۆي-مەن اۋىرعان 11 852 ناۋقاس اۋرۋحاناعا جاتقىزىلدى, ونىڭ 656-سى جۇكتى ايەل بولسا, 506-سى – 1 جاسقا دەيىنگى بالالار.
– جىل سايىن جەرگىلىكتى بيۋدجەت ەسەبىنەن «قاۋىپ توبىنداعى» ادامدارعا ۆاكتسينا ەگىلەدى. وسى جىلى «قاۋىپ توبىنا» رەسەيدەن 130 مىڭ دوزا كولەمىندە شىعارىلعان ءۇش ۆالەنتتى «گريپپول پليۋس» ۆاكتسيناسى ساتىپ الىندى. 300 مىڭ دوزاعا قوسىمشا تاپسىرىس بەرىلدى, ونىڭ 186 مىڭ دوزاسى كەلىپ ءتۇستى. الماتى قالاسىنىڭ دەنساۋلىق ساقتاۋ باسقارماسىنىڭ قويماسىنا 1 قازاندا 300 مىڭ دوزانىڭ 56 820 دوزاسى قابىلداندى, – دەيدى الماتىنىڭ باس مەملەكەتتىك سانيتارى.
قالادا تۇماۋعا قارسى ۆاكتسينالاۋ 10 قىركۇيەكتە باستالدى. 30 قىركۇيەكتەگى جاعداي بويىنشا تەك 122 669 ادام ۆاكتسينالاندى, بۇل قالانىڭ جالپى حالقىنىڭ 6,1%-ىن قۇرايدى, ونىڭ 116 935-ءى (89,9%) «قاۋىپ توبىنا» كىرەدى (ونىڭ ىشىندە دەنساۋلىق ساقتاۋ قىزمەتكەرلەرى – 24 866, 14 جاسقا دەيىنگى بالالار – 21 101, جۇكتى ايەلدەر – 6 192, سوزىلمالى اۋرۋلارى بار ادامدار – 98 573, بالالار ءۇيى, قارتتار ءۇيى سياقتى جابىق مەكەمەلەر كونتينگەنتى – 3 019).
جەكە مەديتسينالىق ورتالىقتاردا تەك 5 734 ادام ۆاكتسينالاندى, ونىڭ ىشىندە 1 342-ءسى جۇمىس بەرۋشىلەر ەسەبىنەن, 4 392 ادام ءوز قاراجاتىنا ەكپە جاساتتى.
الماتىنىڭ باس مەملەكەتتىك سانيتارى حالىقارالىق اۋەجايدا سانيتارلىق-ەپيدەميالىق باقىلاۋ كۇشەيگەنى تۋرالى مالىمدەپ, ونىڭ ءتارتىبىن ءتۇسىندىردى.
قازاقستان ازاماتى ەمەس ادامدار ەلىمىزدىڭ مەملەكەتتىك شەكاراسىن كەسىپ وتكەن ساتتە 72 ساعاتتان ەرتە ەمەس ىرىكتەلگەن پتر ادىسىمەن COVID-19-عا تەستىلەۋدەن وتكەنى تۋرالى انىقتاما بولماسا, ەلگە كىرە المايدى. ال انىقتاماسىز ورالعان وتانداستارىمىز پتر ادىسىمەن COVID-19-عا زەرتحانالىق تەكسەرۋ ءۇشىن كارانتيندىك ستاتسيونارعا 2 تاۋلىككە وقشاۋلانادى. ءوز كەزەگىندە الماتى قالاسىنىڭ تۋريزم باسقارماسى مەن الماتى قالاسىنىڭ كاسىپكەرلىك جانە ينۆەستيتسيالار باسقارماسى شەتەلدەن كەلەتىن تۇلعالارعا قويىلاتىن تالاپتاردىڭ وزگەرگەنى تۋرالى تۋروپەراتورلاردى حاباردار ەتۋى ءتيىس.
الماتى