الماتىداعى مەملەكەتتىك ورتالىق مۋزەيدە «اكۆارەلدى فرەش» دەپ اتالاتىن ايرىقشا كورمە اشىلدى. ونەر ۇجىمى مەن قازاقستان سۋرەتشىلەر وداعى بىرلەسە ۇيىمداستىرعان بىرەگەي جوبا قازان ايىنىڭ ورتاسىنا دەيىن جالعاسادى.
اكۆارەل الەمىن جاي عانا شىم-شىتىرىق شيمايلار دەسەڭىز, قاتەلەسەسىز. كاسىبي سۋرەتشىلەردىڭ تانىمىنا سالساق, بۇل – كەسكىندەمەدەگى ەڭ كۇردەلى ادىستەردىڭ ءبىرى. مينيمالدى قۇرالدار مەن ماكسيمالدى مانەرلىكتى جىمداستىرا وتىرىپ, الەمدى بارلىق تۇستەردە نازىك تۇردە كورسەتە الاتىن دا وسى ءبىر جانر. جەڭىل ءارى قوزعالمالى كەسكىندەمە سانالسا دا, ەرەكشە شەبەرلىك پەن شىدامدىلىقتى قاجەت ەتەتىنى تاعى بار.
قازاق دالاسىنىڭ سۇلۋلىعى, كوز تۇندىرار تۇمسا تابيعات سۋرەتشىلەر كەنەبىندەگى باستى تاقىرىپقا اينالعان. ەڭ باستىسى, شىعارماشىلىقتارى مەن تەمپەرامەنتتەرى ءارتۇرلى شەبەرلەردىڭ كۇردەلى ءارى كوپقىرلى تەحنيكادا ورىنداعان شىعارمالارى ءار دارىننىڭ وزىنە عانا ءتان مانەرىن ايگىلەپ تۇرعانداي. كورەرمەندى وسىناۋ سيقىرلى ونەردىڭ تەرەڭىنە بويلاتۋدى مۇرات تۇتقان ونەر جارمەڭكەسىنە قازاقستاندىق ۇزدىك اكۆارەل شەبەرلەرىنىڭ جۇزدەگەن كارتيناسى قويىلىپتى. كورمە قابىرعاسىنان ەلەنا يوكتون, اباي چۋنچالينوۆ, اننا پەتراكوۆا, ليديا دروزدوۆا, سۆەتلانا كراۆچەنكو, وكسانا شولتس, ەلەنا پوپوۆا, ولەنا كولومىتسەۆا, ناتاليا دۋبوۆايا, پەريزات ەسنازاروۆا, دينا گايتوۆا, ماكسيم ۆەدەرنيكوۆ, يگور باگراموۆ, رۋسلان ابرافيكوۆ, ولگا سالكوۆا, راشيد كۋلباتىروۆ, قاناعات كودەكوۆ, كاميلا لاپتەۆا-تۋلەشوۆا, داۋرەن قاستەەۆ, راۋان سۇلەيمەنوۆ, مۇحتار سىزدىقوۆ, ماقسات قانتارباەۆ, مايسا ىقىلاسوۆا, تولەۋعازى بايعاليەۆ, ورازالى جانىبەك, مارلان نىسانباەۆ سىندى تالانتتى سۋرەتشىلەردىڭ بىرەگەي قولتاڭباسىن تاماشالاۋعا بولادى.
اسىرەسە پەيزاج, پورترەت, ناتيۋرمورت, سيۋجەتتىك جانە دەرەكسىز كومپوزيتسيالار كورمەنىڭ تاقىرىپتىق مازمۇنىن اشا تۇسكەن. ارحيتەكتۋرالىق سيۋجەتتەر, ەتنيكالىق موتيۆتەر جانە قاراپايىم ادام ءومىرى – اكۆارەل سۋرەتشىلەرىنىڭ تابيعاتقا دەگەن سۇيىسپەنشىلىگىن شىنايى كورسەتەدى.
– اكۆارەل تەحنيكاسى سۋرەتشىلەر مەن وسى ونەردى باعالاۋشىلار ءۇشىن قاي كەزدە دە ەڭ تارتىمدى تەتىك بولىپ قالا بەرەدى. بۇل تۋىندىلار قاعازعا جازىلا سالعان جاي كەسكىندەر ەمەس. ءار شىعارما تاپقىرلىق پەن باتىلدىقتىڭ, اسقاق سەزىمنىڭ جەمىسى. اتالعان كورمەگە قازاقستاننىڭ ءتۇرلى قالالارىنان, وتانىمىزدىڭ تۇكپىر-تۇكپىرىنەن ناعىز شەبەر سۋرەتشىلەردىڭ كارتينالارى قويىلا وتىرىپ, اكۆارەل ونەرى تۋىندىلارىنىڭ كەڭ پاليتراسى ءتۇزىلدى دەپ ايتا الامىز. ءار شىعارمادا جوعارى ساپا بەلگىسى بار, ال كۇردەلى ستيل ءار سۋرەتشىنى اكۆارەلدىڭ بەينەلەۋ ونەرىندە بولەك ورىنعا قويادى, – دەيدى مەملەكەتتىك ورتالىق مۋزەيىنىڭ قىزمەتكەرى سۇلۋشاش اعەلەۋوۆا.
الۋان ءتۇستى بوياۋلار بالالار ءۇشىن كوركەمدىك تالعام قالىپتاستىرىپ, اسەمدىكتى سەزىنۋگە, شىعارماشىلىق قابىلەتىن دامىتۋعا باۋليدى. سونداي-اق مۇنداي تۋىندىلاردى تاماشالاۋ ارقىلى كىشكەنتاي كورەرمەندەر ىسكەرلىك داعدىلارىن اشۋدىڭ باسپالداعىنان وتەدى, دەيدى ونەرتانۋشى ماماندار.
الماتى