قازاقستاننىڭ دەپوزيتتەرگە كەپىلدىك بەرۋ قورى اگەنت بانك رەتىندە تاڭداپ الىنعان ەۋرازيالىق بانك ارقىلى "Tengri Bank" اق سالىمشىلارىنا العاشقى 5 كۇن ىشىندە 10,7 ملرد تەڭگە تولەدى, دەپ حابارلايدى Egemen.kz.
وتەم الۋ بويىنشا اگەنت بانككە «Tengri Bank» اق-تىڭ 2,3 مىڭداي سالىمشىسى ءوتىنىش بەرىپ ۇلگەردى. ولاردىڭ كوپشىلىگى الماتىدان – 599 ادام. پاۆلوداردان – 328, ال نۇر-سۇلتان قالاسىنان – 319 ادام. قازاقستان رەسپۋبليكاسى وبلىستارىنىڭ باسىم بولىگىندەگى سالىمشىلار الدىنداعى وتەلگەن مىندەتتەمەلەردىڭ ۇلەسى 50 پايىزدان جوعارى.
ەۋرازيالىق بانكتىڭ ونلاين-سەرۆيستەرى سالىمشىلارعا كەزەككە تۇرۋدى قاراۋعا, بولىمشەلەردەگى جۇمىسباستىلىقتى باعالاۋعا, كەپىلدىك بەرىلگەن وتەم سوماسىن تەكسەرۋگە, سونداي-اق كارتوچكا جاساپ شىعارۋ جانە ونى تەگىن جەتكىزۋ جونىندە قاشىقتان ءوتىنىش بەرۋ ارقىلى تولەمدەردى قاشىقتان الۋ وپتسياسىن پايدالانۋعا مۇمكىندىك بەردى. كەلىپ تۇسكەن وتىنىشتەردىڭ ستاتيستيكاسىنا سايكەس, العاشقى كۇنى تولەم كارتوچكالارىن شىعارۋ 2,5 ەسەگە ءوستى.
«Tengri Bank» اق سالىمشىلارى كەپىلدىك بەرىلگەن وتەمدى كارتاعا اۋدارۋدان باسقا, ونى ەۋرازيالىق بانكتىڭ بولىمشەلەرىنەن مىنا تاسىلدەر بويىنشا الا الادى:1. اگەنت بانكتىڭ كاسساسىنان قولما-قول اقشامەن;
2. اقشانى اگەنت بانكتەگى بانك شوتىنا نەمەسە كەز كەلگەن باسقا بانككە اۋدارۋ ارقىلى.
وتەمدى الۋ ءتاسىلىن سالىمشىلارى وزدەرى تاڭدايدى.
تولەم باستالعان كۇننەن بەرى (25 قىركۇيەك) قدكبق مەن ەۋرازيالىق بانك بۇقارالىق اقپارات قۇرالدارى, الەۋمەتتىك جەلىلەر جانە بايلانىس ورتالىقتارى ارقىلى «Tengri Bank» اق سالىمشىلارى اراسىندا اقپارات بەرۋ-ءتۇسىندىرۋ جۇمىستارىن بەلسەندى تۇردە جۇرگىزىپ كەلەدى. 10 كۇن ىشىندە قدكبق بايلانىس ورتالىعىنىڭ 1460 قىسقا نومىرىنە سالىمشىلار تاراپىنان 418 رەت قوڭىراۋ شالىندى. ولارعاك بەرىلگەن جاۋاپتاردىڭ كوپشىلىگى كەپىلدىك بەرىلگەن وتەمدى الۋ ءتارتىبى, مەرزىمى جانە تاسىلدەرى جايىندا بولدى.
«Tengri Bank» اق سالىمشىلارى كەپىلدىك بەرىلگەن وتەمدى 2021 جىلدىڭ 30 قىركۇيەگىنە دەيىن ەۋرازيالىق بانكتىڭ جەكە تۇلعالارعا قىزمەت كورسەتەتىن بارلىق بولىمشەلەرىنە كەلىپ الا الادى. اگەنت بانكتىڭ بارلىق قالالارداعى فيليالدارى مەن بولىمشەلەرىنىڭ مەكەنجايلارى جانە جۇمىس ءتارتىبى تۋرالى اقپارات www.eubank.kz رەسمي سايتىندا قولجەتىمدى. كورسەتىلگەن مەرزىم اياقتالعان سوڭ, بانك سالىمشىلارى كەپىلدىك بەرىلگەن وتەمدى الۋ ءۇشىن تىكەلەي قورعا ءوتىنىش بەرە الادى.
قدكبق وتەمدى دەپوزيتتەگى قالدىق سومانىڭ, بانك شوتى نەمەسە تولەم كارتوچكاسىنداعى اقشانىڭ كولەمىندە, بىراق كەپىلدىك بەرىلگەن ەڭ جوعارى سوما اياسىندا ءوزىنىڭ ارنايى رەزەرۆىنەن تولەيدى, ياعني:
· تەڭگەدەگى جيناق دەپوزيتتەر بويىنشا – 15 ملن تەڭگەدەن;
· تەڭگەدەگى باسقا دەپوزيتتەر بويىنشا – 10 ملن تەڭگەدەن;
· شەتەل ۆاليۋتاسىنداعى دەپوزيتتەر بويىنشا – ۆاليۋتا بالاماسىندا 5 ملن تەڭگەدەن اسپايدى («Tengri Bank» اق ليتسەنزياسىنان ايىرىلعان كۇنى بەلگىلەنگەن ۆاليۋتا ايىرباستاۋ باعامى بويىنشا).
جەكە تۇلعا نەمەسە جەكە كاسىپكەردىڭ بانكتە ءتۇرى مەن ۆاليۋتاسى بويىنشا ەكى جانە ودان دا كوپ كەپىلدەندىرىلگەن دەپوزيتتەرى بار بولسا, قدكبق ولار بويىنشا 15 ملن تەڭگەدەن اسپايتىن كولەمدە كەپىلدىك بەرىلگەن جيىنتىق وتەم تولەيدى. بۇل رەتتە شەتەل ۆاليۋتاسىنداعى دەپوزيتتىڭ 5 ملن تەڭگەدەن اسپايتىن كەپىلدەندىرىلگەن قالدىعى بويىنشا شەكتەۋ ەسكەرىلەدى.