قازاقستاندا تسيفرلىق ەفيرلىك تەلەحابار تاراتۋ جەلىسىن ەنگىزىپ, بالامالى جۇيەنى ءوشىرۋ جوباسى قارقىندى تۇردە جۇزەگە اسىرىلىپ جاتىر, دەپ حابارلايدى Egemen.kz.
ساپالى تەلەۆيزيانى ەندىرۋ جۇمىستارى اياسىندا تەلەراديوحابار تاراتۋ سالاسىنداعى ۇلتتىق وپەراتور «قازتەلەراديو» اق راديوتەلەۆيزيالىق ستانتسيالار تۇرعىزىپ, مودەرنيزاتسيالاۋ ۇستىندە.
2020 جىلدىڭ وزىندە عانا 43 راديوتەلەۆيزيالىق ستانتسيا: سولتۇستىك قازاقستان وبلىسىندا 13, قىزىلوردادا 16, شىعىس قازاقستان وبلىسىندا 6, اقتوبەدە 5 جانە اقمولا وبلىسىندا 3 رتس قولدانىسقا ەنگىزىلدى. بۇل ستانتسيالاردان تارايتىن سيگنال اتالعان اۋماقتارداعى 684 ەلدى مەكەن نەمەسە 800 مىڭعا تارتا تۇرعىندى قامتيدى.
سونىمەن قاتار, قازىرگى ۋاقىتتا قاراعاندى وبلىسىندا تسيفرلىق ەفيرلىك تەلەحابار تاراتۋ جەلىسىنە 5 رتس تەستىلەۋ تارتىبىندە ىسكە قوسىلعان, سىناق جۇمىستارى ءساتتى اياقتالعان سوڭ «جاستار», «وساكاروۆكا», «قانتاي», «سۇڭقار» جانە «پيونەر» راديوتەلەۆيزيالىق ستانتسيالارى قولدانىسقا ەنگىزىلەدى. بۇل رتس-تەردىڭ قامتۋ اۋماعىنا قاراعاندى وبلىسىنىڭ 25 ەلدى مەكەنى ەنەدى.
تسيفرلىق ەفيرلىك تەلدەحابار تاراتۋ جەلىسىن ەنگىزۋ جۇمىستارى 2012 جىلدان بەرى جۇرگىزىلىپ كەلەدى. بىرقاتار وبلىستار جاڭا جۇيەگە تولىقتاي كوشتى. اتاپ ايتقاندا ماڭعىستاۋ, جامبىل, تۇركىستان, الماتى, پاۆلودار, قوستاناي وبلىستارى مەن شىمكەنت قالاسىندا انالوگتىق تەلەحابار تاراتۋ جۇيەسى ءوشىرىلدى, بيىل تسەتۆ-عا تولىقتاي كوشۋ الماتى قالاسى مەن سولتۇستىك قازاقستان وبلىسىندا جوسپارلانعان. جوبانى جۇزەگە اسىرۋ 2022 جىلى اياقتالادى دەپ كوزدەلگەن, «تسيفرعا» كوشۋ ءۇشىن بارلىعى 827 راديوتەلەۆيزيالىق ستانتسيا تۇرعىزىلىپ, جەتىلدىرىلۋى ءتيىس.
2020 جىلدىڭ قازان ايىنداعى مالىمەت بويىنشا, 518 رتس قولدانىسقا ەنگىزىلىپ, تسيفرلىق سيگنال ەل حالقىنىڭ 89,42 پايىزىن قامتىپ وتىر.