بيىل ۇكىمەت قاۋلىسىمەن اتىراۋ حالىقارالىق اۋەجايىنا قازاقتىڭ ۇشقىش قىزى, حالىق قاھارمانى حيۋاز دوسپانوۆانىڭ ەسىمى بەرىلگەن ەدى, دەپ حابارلايدى Egemen.kz.
سوعان اۋەجاي عيماراتىنىڭ ماڭدايشاسىنا قاھارمان ۇشقىشتىڭ ەسىمى جازىلدى. ەندى اۋەجاي الدىنا ورناتىلعان مەموريالدىق تاقتا اشىلدى.
"ەكىنشى دۇنيەجۇزىلىك سوعىس حالقىمىزعا وڭاي بولمادى. ميلليونداعان بوزداق مايدان دالاسىندا ماڭگىلىككە قالدى. جارالانىپ ورالعاندار دەنساۋلىعىن جوعالتتى. سوعىستا قازاقتىڭ قايسار قىزدارى دا ەرلىكتىڭ قايتالانباس ۇلگىسىن كورسەتتى. سونىڭ ءبىرى – داڭقتى ۇشقىش حيۋاز دوسپانوۆا. ونىڭ اۋەدەن سوققى جاساۋداعى ەرلىگى ەلىمىزدىڭ حالىق قاھارمانى اتاعىمەن لايىقتى باعالاندى. بيىل اتىراۋداعى حالىقارالىق اۋەجاي باتىردىڭ ەسىمى بەرىلدى. ءبىز اركەز داڭقتى مايدانگەرلەرىمىزدىڭ ەرلىگىن كەيىنگى ۇرپاققا كەڭىنەن ناسيحاتتاپ, قۇرمەت تۇتامىز", دەدى وبلىس اكىمى ماحامبەت دوسمۇحامبەتوۆ.
وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆتىڭ ايتۋىنشا, داڭقتى ۇشقىشتىڭ ەرلىگىن ناسيحاتتاۋ قولعا الىنىپتى. سونىڭ قاتارىندا حيۋاز دوسپانوۆا اتىنداعى مەدال دا بار.