ۇستازدار كۇنى مەرەكەسىنە وراي مۇعالىمدەرىمىزگە ارناپ ارنايى اللەيا وتىرعىزىلدى. بۇل تۋرالى ەلوردا اكىمى التاي كولگىنوۆ ءوزىنىڭ Instagram پاراقشاسىندا جازدى, دەپ حابارلايدى Egemen.kz
"اۋا-رايى قۇبىلمالى ەلوردادا جاسىل بەلدەۋ مەن ەكولوگيالىق ايماقتار ەكولوگيانى جاقسارتىپ قانا قويماي, كليماتتىق جاعدايدى جۇمسارتۋعا مۇمكىندىك بەرەدى. كوكتەمدە جانە كۇزدە قالانىڭ بارلىق اۋداندارىندا اعاش وتىرعىزۋمەن اينالىسامىز. ساياباقتارعا, قوعامدىق كەڭىستىكتەرگە جانە اۋلاىشىلىك اۋماقتارعا ەرەكشە نازار اۋدارامىز. بۇگىن حالىق اراسىندا پيراميدا دەپ اتالاتىن بەيبىتشىلىك جانە كەلىسىم سارايىنىڭ بويىنداعى تۇڭعىش پرەزيدەنت ساياباعىندا اعاشتار وتىرعىزىلدى. شاراعا ەرىكتىلەر, قوعام قايراتكەرلەرى, مادەنيەت جانە سپورت قايراتكەرلەرى, قالا تۇرعىندارى قاتىستى. تەك وسى دەمالىس كۇندەرى مىڭعا جۋىق اعاش وتىرعىزامىز", دەيدى التاي كولگىنوۆ.
قۋانتارلىعى, بيىل وتىرعىزىلعان اعاشتاردىڭ جالپى سانى 30 مىڭنان اسادى. وسىلايشا, قالادا بىرتىندەپ جاسىل ارالدار مەن ەكولوگيالىق ايماقتار سانى كوبەيەدى.
"كارانتين كەزىندە 15 مىڭنان استام جۇمىس ورنىن اشۋعا مۇمكىندىك بەرگەن "جۇمىسپەن قامتۋدىڭ جول كارتاسى" باعدارلاماسى بويىنشا بىرقاتار مادەنيەت, سپورت جانە ءبىلىم بەرۋ نىسانىن جوندەۋگە كىرىستىك. قازىر بەيبىتشىلىك جانە كەلىسىم سارايىنا جوندەۋ جۇمىستارىن جۇرگىزىپ جاتىرمىز. بۇگىنگى تاڭدا عيمارات بويىمەن وتىرعىزىلعان اعاشتار قازىردىڭ وزىندە بۇل جەرگە جايلىلىق بەرىپ تۇر. بىرنەشە جىلدان كەيىن وسى ايماقتا قۇرىلعان ەكولوگيالىق ايماقتار بىرنەشە ەسە كوپ بولادى", دەيدى ەلوردا اكىمى.
ءسوز سوڭىندا اكىم مەملەكەت باسشىسى حالىققا جولداۋىندا ەلدى اۋقىمدى كوگالداندىرۋدىڭ ماڭىزدىلىعىن اتاپ وتكەنىن, وسى باعىتتا جۇيەلى جۇمىس جۇرگىزىلىپ جاتقانىن دا قوسا كەتتى.