قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ دونالد ترامپ پەن ونىڭ جۇبايى مەلانيا ترامپتىڭ كوروناۆيرۋستان تەزىرەك ساۋىعىپ كەتۋىنە تىلەكتەستىك ءبىلدىردى, دەپ حابارلايدى Egemen.kz ەلباسىنىڭ ءباسپاسوز قىزمەتىنە سىلتەمە جاساپ.
ء"سىزدىڭ جانە ءبىرىنشى حانىم مەلانيا ترامپتىڭ كوروناۆيرۋس ىندەتىنە بايلانىستى تاپسىرعان تەستىنىڭ وڭ ناتيجە كورسەتكەنى تۋرالى حاباردى وكىنىش سەزىمىمەن قابىلدادىم.
ءوزىڭىزدى كۇش-قۋاتى مول, جىگەرلى ارى سىناقتاردى ۇنەمى جەڭىل ەڭسەرەتىن تۇلعا رەتىندە بىلەمىن. وسى دەرتتەن تەزىرەك ساۋىعىپ, امەريكا حالقىنىڭ وركەندەۋىنە باعىتتالعان جاۋاپتى قىزمەتىڭىزگە ورالۋىڭىزدى تىلەيمىن.
بۇگىنگى تاڭدا ءبىزدىڭ ەلدەرىمىز بەن بۇكىل حالىقارالىق قوعامداستىق كۇردەلى كەزەڭدى باستان وتكەرۋدە, جاقىن بولاشاقتا وزارا قولداۋ مەن تۇسىنىستىك نەگىزىندە پاندەميانى جەڭىپ, ەش كىدىرىسسىز دامۋ جولىنا قايتا ورالاتىنىمىزعا كامىل سەنەمىن.
سىزگە جانە وتباسىڭىزعا وسى ناۋقاستان جەدەل ءارى تولىق جازىلىپ شىعۋلارىڭىزعا تىلەكتەستىگىمدى بىلدىرەمىن.
بۇل جاعدايدى ءوز باسىمنان وتكىزگەن ادام رەتىندە سىزدەردى دارىگەرلەردىڭ اقىل-كەڭەسىن ۇستانىپ, ايتقانىن ورىنداۋعا شاقىرامىن", دەلىنگەن جەدەلحاتتا.