گرۋزيانىڭ پرەمەر-ءمينيسترى بيدزينا يۆانيشۆيلي ارناۋلى بريفينگتە ۇكىمەتتىڭ جاڭا باسشىسى قىزمەتىنە كانديدات رەتىندە ىشكى ىستەر ءمينيسترى يراكلي گاريباشۆيليدىڭ اتىن اتادى.
گرۋزيانىڭ پرەمەر-ءمينيسترى بيدزينا يۆانيشۆيلي ارناۋلى بريفينگتە ۇكىمەتتىڭ جاڭا باسشىسى قىزمەتىنە كانديدات رەتىندە ىشكى ىستەر ءمينيسترى يراكلي گاريباشۆيليدىڭ اتىن اتادى.
ءالى ول پارلامەنتتە بەكۋگە ءتيىس جانە ول 17 قاراشاداعى پرەزيدەنت گەورگي مارگۆەلاشۆيليدىڭ قىزمەتكە كىرىسۋ سالتاناتىنان كەيىن, سونداي-اق قازىرگى پرەمەر-مينيستر بيدزينا ءيۆانيشۆيليدىڭ رەسمي تۇردە قىزمەتىنەن كەتۋىنەن كەيىن جۇزەگە اسۋعا ءتيىس. بىراق جۇرت گاريباشۆيليدى ۇكىمەت باسشىسى رەتىندە قابىلداپ تا, قۇتتىقتاپ تا وتىر.
قازىر بۇل ەلدە ءيۆانيشۆيليدىڭ دەگەنى بولىپ تۇر. باسقالار ونىڭ ايتقانىن قولدايدى, زاڭداي قابىلدايدى. سول يۆانيشۆيلي بىلاي دەدى: «گرۋزيا لايىقتى ۇكىمەتكە, لايىقتى پرەمەر-مينيسترگە جانە لايىقتى پرەزيدەنتكە يە بولدى جانە مەن گرۋزين قوعامىنىڭ تاپسىرىسىن ورىنداپ, وسىنداي تاماشا ۇكىمەت پەن پرەزيدەنت قالدىرىپ بارا جاتقانىمدى ماقتان ەتەمىن».
بۇل مالىمدەمەدەن كوپ جايدى ۇعۋعا بولار ەدى. ەڭ الدىمەن, ۇكىمەتتى پرەزيدەنتتەن جوعارى قويىپ وتىر جانە وسىنىڭ بارلىعى ءوزىنىڭ قالاۋىمەن جۇزەگە اسىپ وتىرعانىن اڭعارتادى. ءالى پارلامەنتتە بەكىمەگەن ادامدى پرەمەر-مينيستر رەتىندە اتاپ وتىرعانى دا ءوزىنىڭ شەشىمى ەكى بولمايتىنىنا كۇمانسىزدىگىن بىلدىرەدى.
ءالى بەكىمەي مويىندالعان پرەمەر-مينيستر يراكلي گاريباشۆيليدى وتىزىندا وردا بۇزعان دەپ سيپاتتاۋعا لايىق. ونىڭ جاسى 31-دە عانا, 1982 جىلى تۋعان. ەل بيلىگىنىڭ باس تىزگىنىن ۇستاۋ (پرەزيدەنت وكىلەتتىگىنىڭ مىقتاپ شەكتەلگەنىن ەسكەرىپ) تىم ەرتە ەمەس پە دەۋگە دە بولار. ۇكىمەتتىڭ, بيلىكتەگى «گرۋزين ارمانى» كواليتسياسى ساياسي كەڭەسىنىڭ جانە پارلامەنتتەگى كوپشىلىك فراكتسياسى وكىلدەرىمەن كەزدەسكەننەن كەيىن بۇل كانديداتۋرا ماقۇلدانىپ, ونى يۆانيشۆيلي جاريا ەتتى.
گاريباشۆيليدىڭ جولىن داڭعىل بولدى دەسە ءجون. 2005 جىلى تبيليسي مەملەكەتتىك ۋنيۆەرسيتەتىن «حالىقارالىق قارىم-قاتىناس» ماماندىعى بويىنشا بىتىرگەن, ءدال وسى ۋاقىتتا وسى ماماندىق بويىنشا سوربوننا ۋنيۆەرسيتەتىندە قاتار وقىعان. 2004 جىلدان 2012 جىلعا دەيىن ءيۆانيشۆيليدىڭ يەلىگىندەگى Cartu Group كومپانياسىنىڭ ءتۇرلى ۇيىمدارىندا باسشى قىزمەت اتقارعان. وتكەن جىلى «گرۋزين ارمانى – دەموكراتيالىق گرۋزيا» ساياسي پارتياسىن قۇرۋشىلاردىڭ ءبىرى بولعان. 2012 جىلدىڭ قازانىنان ەلدىڭ ىشكى ىستەر ءمينيسترى. ءيۆانيشۆيليدىڭ سيپاتتاۋىنشا, ءبىر جىل ىشىندە ەۋروپالىق تۇرپاتتاعى پوليتسيانى قۇرعان كورىنەدى.
ەندى ونى پارلامەنتتە بەكىتۋ جاي رەسمي شارا عانا ەكەنى انىق. ونداعى كوپشىلىك فراكتسيا جەتەكشىسى داۆيد ساگانەليدزە بۇل شارا جىلدام وتەتىنىن مالىمدەدى. وسىلايشا, گرۋزيادا بيلىك تولىقتاي جاڭاردى.
سەنگەنىڭ قىلمىسكەر بولسا, سول جامان
قازان ايىنىڭ سوڭعى كۇنى ماسكەۋدى شۋلاتقان ءبىر وقيعا بولدى – اقش قارجى مينيسترلىگى حالىقارالىق ۇيىمداسقان قىلمىسكەرلەر قاتارىنا رەسەيدىڭ, ەڭ الدىمەن, پرەزيدەنت ۆلاديمير ءپۋتيننىڭ سۇيىكتى ءانشىسى, رەسەيدىڭ ەڭبەك سىڭىرگەن ءارتىسى, كومپوزيتور, پروديۋسەر گريگوري لەپستى قوسقان ەكەن, سول كۇنى-اق ەلدىڭ رەسمي ورىندارى وعان قارسىلىق ءبىلدىرىپ, مالىمدەمەلەر جاساپ ۇلگەردى.
ارينە, بۇل شۋ اڭگىمە ەل پرەزيدەنتىنە جاقىن ادام جايىندا بولعان سوڭ شىقتى. رف پرەزيدەنتىنىڭ ءباسپاسوز حاتشىسى دميتري پەسكوۆ ماسكەۋدىڭ ۆاشينگتوننان لەپستىڭ «كارا تىزىمگە» قالاي قوسىلعانىنا تۇسىنىك بەرۋدى تالاپ ەتكەنىن حابارلاۋمەن قاتار, ءوزىنىڭ ءبىراز اشۋ-ىزاسىن ءبىلدىردى. لەپس – رەسەي پرەزيدەنتىنىڭ جانە كوپتەگەن رەسەيلىكتەردىڭ سۇيىكتى ءانشىسى, 2012 جىلعى پرەزيدەنتتىك سايلاۋدا ۆلاديمير ءپۋتيننىڭ سەنىمدى وكىلى بولعانىن ايتتى. راس, ورتالىق سايلاۋ كوميسسياسىنىڭ تىزىمىندە ءپۋتيننىڭ سەنىمدى وكىلدەرى قاتارىندا لەپستىڭ اتى جوق كورىنەدى. سويتسە دە, پەسكوۆ تا جايدان-جاي ايتپاسا كەرەك, وندا بولماعانمەن, بەيرەسمي تىزىمگە قوسىلعان شىعار.
ايتەۋىر, لەپسكە ارا تۇسكەندەر بۇل حابار ەستىلىسىمەن بەلسەندى ىسكە كىرىسكەن. الدىمەن سىرتقى ىستەر مينيسترلىگى ۆاشينگتوننان تۇسىنىك تالاپ ەتسە, سول ءسىم-ءنىڭ ادام قۇقى جونىندەگى وكىلەتتى وكىلى كونستانتين دولگوۆ ولاردى ءبىراز سىناپ تا الادى. «رەسەي ءسىم-ءى رەسەيلىك ازاماتتاردىڭ ءبىر نارسەگە ايىپتى ەكەن-ەمەستىگىن ءوز ەلىمىزدە رەسەيلىك سوت-قۇقىقتىق جۇيەسى شەڭبەرىندە قارالۋى كەرەك دەگەن تۇجىرىمعا سۇيەنەدى, – دەدى دولگوۆ. – سوندىقتان بۇل ءرولدى اقش-تىڭ يەمدەنۋى ءجون ەمەس». رەسەيدىڭ ازاماتىنا كىنا تاعار بولسا, ولار رەسەيلىك زاڭ ورىندارىنا جۇگىنسىن, وزدەرىنىڭ ۇلتتىق زاڭىن قولدانباسىن, دەيدى قۇقىق قورعاۋشى.
قيسىقتاۋ قيسىن. رەسەيلىك زاڭ ورىندارى ايىپتاماسا, حالىقارالىق ۇيىمداسقان قىلمىسكەر توبىنا قاتىسقان رەسەيلىكتەر قىلمىسكەر سانالماۋعا ءتيىس كورىنەدى. بۇل ەندى اقىلعا سىيا قويمايدى. سوندا حالىقارالىق قىلمىستىق توپقا قاتىسىپ قانا قويماي, وعان باسشىلىق تا جاساپ جۇرگەندەردىڭ ارەكەتتەرىنە باسقالار قاراپ وتىرۋعا ءتيىس پە؟ ارينە, بۇعان باسقالار, سونىمەن بىرگە, اقش تا كونبەيدى.
اقش پرەزيدەنتى باراك وباما ءوزىنىڭ №13581 نۇسقاۋىمەن ەل قاۋىپسىزدىگىنە قاۋىپتى دەگەن الەمدىك ءتورت قىلمىستىق توپقا قارسى سانكتسيا ەنگىزدى. ولار – يتاليالىق كاموررا, جاپوندىق ياكۋدزا, مەكسيكالىق «لوس-سەتاس» جانە مS – 13, سونداي-اق, ەۋرازيالىق «تۋىستىق شەڭبەر» توبى. سوڭعىسى كەشەگى كسرو-دان شىققان ەلدەردىڭ قىلمىسكەرلەرىن بىرىكتىرەتىن كورىنەدى. گريگوري لەپس (شىن اتى لەپسۆەريدزە) سولارعا قوسىلادى ەكەن. سول توپتىڭ ءبىر باسشىسى ۆلاديسلاۆ لەونتەۆكە اقشا تاسيتىن كۋرەرى ساناتىندا كورىنەدى.
«تۋىستىق شەڭبەردىڭ» ءبۇلدىرگەنى كوپ. ونىڭ ءبىر باسشىسى «رەسەيلىك قىلمىستىق الەمنىڭ گەنەرالى», «زاڭداعى ۇرى» زاحاري كالاشوۆ 22,5 ميلليون ەۋرو ايىپ تولەپ, 9 جىل ارقالاپ, يسپانيانىڭ تۇرمەسىنە قامالعان. ونىڭ جاقىن سەرىگى لاشا شۋشاناشۆيلي بيىل گرەكيادا 14 جىلعا سوتتالدى. بۇل ەلدەر ولاردى سوتتاعاندا رەسەيدەن رۇقسات سۇراعان جوق, ولاردىڭ زاڭىنا جۇگىنگەن دە جوق.
اقش قارجى مينيسترلىگى بۇل توپتىڭ رەسەيدە, قىرعىزستاندا, وزبەكستاندا جانە ءباا-دە ارەكەت ەتىپ جۇرگەن جەتى باسشىسىن اتاعان. ولار – ۆاسيلي حريستوفوروۆ (لاقاپ اتى – ۆوسكرەس), قامشىبەك كولباەۆ (كامچي بيشكەكسكي, كوليا-كيرگيز), ۆلاديسلاۆ لەونتەۆ (بەلىي), الەكساندر مانۋيلوۆ (ساشا سامارسكي), گافۋر رافيموۆ, لازار شايبازيان جانە الەكسەي زايتسەۆ. بۇلاردىڭ ارقايسىسىنىڭ اتقاراتىن «شارۋالارى» بار. لەونتەۆ پەن حريستوفوروۆ ەسىرتكى بيزنەسىن قاداعالايدى, راحيموۆ وزبەكستاندا سول ەسىرتكى وندىرىسىنە ماماندانعان.
ەندى لەپسكە كەلسەك, ماسكەۋ ونىڭ لەونتەۆتىڭ قارجى كۋرەرى ەكەنىن دالەلدەڭدەر دەيدى. وعان اقش جاۋاپ بەرە جاتار, ال ونىڭ رەسەيدە ەڭ باي ءانشى ەكەنى (بىلتىرعى جىلعى تابىسى 15 ميلليون دوللار بولعان), تايلاندتا ءۇيى بارلىعى, بىراق وندا تۇرمايتىنى, ميللياردەرلەر يسكاندەر ماحمۇدوۆ, اندرەي بوكارەۆتەرمەن ءىش-قارىندارى ارالاسقان دوس ەكەنى انىق. لەپس بىلاي دەيدى: «مەنىڭ ءوز مەملەكەتىم – رەسەي, ءوز ۇكىمەتىم بار. ولار ماعان كىنا تاقپايدى, ال باسقا ەل ۇكىمەتىنىڭ ايتقانىنا پىسقىرمايمىن دا».
رەسەيدىڭ رەسمي ورىندارى دا سونداي پىكىردە.
ماماديار جاقىپ,
«ەگەمەن قازاقستان».