COVID-19-بەن كۇرەسۋگە تارتىلعان 3 621 مەديتسينا قىزمەتكەرى كوروناۆيرۋستىق ينفەكتسيانى نەمەسە ۆيرۋستىق پنەۆمونيانى جۇقتىرعان جاعدايدا مەملەكەتتىك الەۋمەتتىك ساقتاندىرۋ قورىنان بەرىلەتىن بىرجولعى الەۋمەتتىك تولەم الدى, دەپ حابارلايدى Egemen.kz.
ماسق اۋرۋدىڭ سالدارىنان قايتىس بولعان 37 مەديتسينا قىزمەتكەرىنىڭ تۋىستارىنا تولەمدى اۋداردى.
بۇدان بۇرىن حابارلانعانداي, جوعارىدا اتالعان تولەم تولەنەتىن مەديتسينا قىزمەتكەرلەرىن وڭىرلەردىڭ جانە رەسپۋبليكالىق ماڭىزى بار قالالاردىڭ دەنساۋلىق ساقتاۋ باسقارمالارى جانىنداعى ارنايى كوميسسيالار اۋىرعان مەديتسينا قىزمەتكەرلەرىن تەكسەرۋ ناتيجەسى نەگىزىندە انىقتايدى. وتىنىمدەردى جيناقتاۋدى قر دەنساۋلىق ساقتاۋ مينيسترلىگى جۇزەگە اسىرادى, ودان كەيىن وتىنىمدەر ەلەكتروندىق ءىس ماكەتتەرىن قالىپتاستىرۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق-قا بەرىلەدى, سودان سوڭ تولەم تاعايىنداۋ ءۇشىن ماسق-عا جىبەرىلەدى.
2 قازان ساعات 9.00-دەگى جاعداي بويىنشا ماسق COVID-19 نەمەسە ۆيرۋستىق پنەۆمونيا جۇقتىرعان 3 621 مەديتسينا قىزمەتكەرىنىڭ ءوتىنىشى بويىنشا جانە اۋرۋدىڭ سالدارىنان قايتىس بولعان 37 مەديتسينا قىزمەتكەرىنە قاتىستى اقشالاي قاراجاتتى تاعايىنداۋ مەن تولەۋدى جۇزەگە اسىردى.
وڭىرلەر تۇرعىسىندا مەديتسينا قىزمەتكەرلەرىنە COVID-19 نەمەسە ۆيرۋستىق پنەۆمونيانى جۇقتىرۋ جاعدايىنا تولەمنىڭ ەڭ كوپ سانى نۇر-سۇلتان (718) جانە الماتى (420) قالالارى مەن قاراعاندى (404), باتىس قازاقستان (261), اقمولا (249), اتىراۋ (228) وبلىستارى بويىنشا جۇرگىزىلدى.
ەسكە سالا كەتسەك, قر ەڭبەك جانە حالىقتى الەۋمەتتىك قورعاۋ ءمينيسترى مەن قر دەنساۋلىق ساقتاۋ ءمينيسترىنىڭ 9 ساۋىردەگى «دەنساۋلىق ساقتاۋ ۇيىمدارىنىڭ COVID-19 كوروناۆيرۋستىق ينفەكتسياسىنا قارسى كۇرەس جونىندەگى ەپيدەمياعا قارسى ءىس-شارالارعا تارتىلعان قىزمەتكەرلەرى اتالعان ينفەكتسيانى جۇقتىرعان نەمەسە ودان قايتىس بولعان جاعدايدا ولارعا بىرجولعى الەۋمەتتىك تولەمدى جۇزەگە اسىرۋ قاعيدالارىن بەكىتۋ تۋرالى» بىرلەسكەن بۇيرىعىنا اعىمداعى جىلدىڭ 22 شىلدەسىندە ەنگىزىلگەن وزگەرىستەرگە سايكەس, جوعارىدا كورسەتىلگەن تولەم:
– كوروناۆيرۋستىق ينفەكتسيا نەمەسە ۆيرۋستىق پنەۆمونيا جۇقتىرعان مەديتسينا قىزمەتكەرلەرىنە – 2 ملن تەڭگە;
– COVID-19 كوروناۆيرۋستىق ينفەكتسياسىن جۇقتىرعاننان, ۆيرۋستىق پنەۆمونيامەن اۋىرىپ قايتىس بولعان جاعدايدا ولاردىڭ وتباسىنا – 10 ملن تەڭگە كولەمىندە تولەنەدى.