سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىمەن «ساپالى جول» جوباسى اياسىندا وبلىس ورتالىعىندا جاڭادان توسەلگەن جولداردىڭ ساپاسىنا كەشەندى مونيتورينگتىك باقىلاۋ جۇمىستارى جۇرگىزىلدى. ونداعى ماقسات ارينە اۆتوكولىك جولدارىنىڭ ساپاسى مەن قاۋىپسىزدىگىن ارتتىرۋ جانە بيۋدجەت قاراجاتىنىڭ ءتيىمدى جۇمسالۋىن قاداعالاۋ, مەردىگەر مەكەمەنىڭ جاۋاپكەرشىلىگىن كۇشەيتۋ.
ءوڭىر تۇرعىندارىنىڭ ارىز-شاعىمى نەگىزىندە جۇرگىزىلگەن مونيتورينگ جۇمىستارى بارىسىندا تۇركىستان قالاسىنا قاراستى و.داستانوۆ, ي.ناكيپوۆ, جىبەك جولى – شەكتى تىلەۋ, مايكوتوۆ كوشەلەرىنىڭ جول ساپاسى مەن قاۋىپسىزدىگى باقىلانىپ, جىلجىمالى جول زەرتحانالىق كولىگى ارقىلى جاڭادان توسەلگەن اسفالت بەتون جامىلعىسىنان كەسىندى سىنامالار العان. ءبىر كۇندىك باقىلاۋ جۇمىستارىنىڭ ناتيجەسىندە وبلىس ورتالىعىندا ورنالاسقان جىبەك جولى – شەكتى تىلەۋ مەن مايكوتوۆ كوشەلەرىنىڭ اسفالت بەتون جامىلعىسىندا بىرقاتار كەمشىلىكتەر, اتاپ ايتساق جولدىڭ تەگىسسىزدىگى مەن جول بويىندا ورناتىلعان بورديۋرلەردىڭ بۇزىلۋى, جاياۋ جۇرگىنشىلەردىڭ جولدارى مەن سۋ اعارلاردىڭ وتىرۋى, ويىق شۇڭقىرلار مەن جول توسەلىمىنىڭ شاشىلۋ دەرەكتەرى بەلگىلى بولدى.
سونداي-اق ارنايى جۇمىسشى توپ وكىلدەرى «ۇشقايىق» اۋىلدىق وكرۋگىنىڭ بويىندا ورنالاسقان وبلىستىق ماڭىزى بار جولداردىڭ توسەلۋ بارىسىن باقىلاپ, تۇرعىنداردىڭ ارىزدارى نەگىزىندە قايتا قالپىنا كەلتىرىلگەن جول توسەلىمىنىڭ سمەتالىق قۇجاتقا سايكەس ەكەندىگىن انىقتادى. جاڭا سالىنعان جولداردان بىرقاتار اقاۋلار بايقاعان سالا ماماندارى انىقتالعان كەمشىلىكتەر بويىنشا مەردىگەر مەكەمەلەرگە اكت ءتۇزىپ, كومپانيا باسشىلارىنا قايتا جوندەۋدەن وتكىزۋ بويىنشا ۇسىنىستارىن ءبىلدىردى.