قازاقستاندا قۇس تۇماۋىنىڭ تارالۋى تومەندەۋدە

اشم ۆەتەرينارلىق باقىلاۋ جانە قاداعالاۋ كوميتەتىنىڭ حابارلاۋىنشا, تاۋلىك بويىنشا قۇس ءولىمى قارقىنىنىڭ تومەندەۋىن كورسەتەدى. ماسەلەن, سوڭعى تاۋلىكتە تۇركىستان, جامبىل, اقتوبە, قاراعاندى وبلىستارىندا, شىمكەنت قالاسىندا ءولىم توقتادى. سونىمەن قاتار, سقو, پاۆلودار جانە قوستاناي وبلىستارىندا ءولىم ازايىپ كەلەدى.

جالپى, قۇس ءولىمى ەلىمىزدىڭ 7 وبلىسىنىڭ 41 اۋدانىنىڭ 99 ەلدى مەكەنىندە تىركەلگەن. جەكە اۋلالاردا 23 854 قۇستىڭ ءولىمى تىركەلدى. ال ەكى قۇس فابريكاسىنداعى ءولىمدى ەسكەرە وتىرىپ, ولگەن قۇستىڭ جالپى سانى 330 مىڭ باستان اسپايدى.

تۇرسىن قابدولدانوۆتىڭ ايتۋىنشا, ەلىمىزدە قۇس تۇماۋىنان قىرىلعان 329691 باس ءۇشىن وتەماقى تولەنەدى. بۇل رەتتە وتەماقى قۇس يەلەرىنىڭ ساراپتاما, جويۋ اكتىسى, قۇس تۇماۋىنان بولعان ءولىم-ءجىتىمدى راستايتىن قۇجاتتارى بولعان دا عانا تولەنەدى.

جوعارعى پاتوگەندى قۇس تۇماۋىنان قاناتتىلاردىڭ ءولىمىنىڭ تومەندەۋى قىركۇيەكتە ىندەتكە قارسى قابىلدانعان شارالاردىڭ جوعارى تيىمدىلىگىن كورسەتەدى. ۆاكتسينالاردى ءبولۋدىڭ جەدەلدىگى اتاپ ءوتىلدى.

«جانۋارلاردىڭ اسا قاۋىپتى اۋرۋلارىنىڭ الدىن الۋ بويىنشا بەكىتىلگەن ۆەتەريناريالىق ءىس-شارالار جوسپارىنا سايكەس اعىمداعى جىلدىڭ اقپان ايىندا ۆاكتسيناتسيا جۇرگىزۋ ءۇشىن قۇس تۇماۋىنا قارسى 3,3 ملن-نان استام ۆاكتسينا ءبولىندى. قوسىمشا قىركۇيەك ايىندا قۇس تۇماۋىن جۇقتىرۋ وشاقتارىن وقشاۋلاۋ ءۇشىن رەسپۋبليكالىق رەزەرۆتەن 3,1 ملن دوزا ءبولىندى. ال وسى اپتانىڭ سوڭىندا تاعى 1,3 ملن دوزا جەتكىزىلەدى. وسىلايشا, وڭىرلەرگە ۆاكتسينالاردىڭ 7,7 ملن دوزاسى ءبولىندى. ۆاكتسيناتسيا تەگىن جۇرگىزىلەدى», - دەدى ۆەتەريناريالىق باقىلاۋ جانە قاداعالاۋ كوميتەتى وكىلى.

سونداي-اق, ول بۇگىنگى كۇنى ءماجبۇرلى ۆاكتسيناتسيا اياسىندا قر 8 قازاقستاننىڭ 8 وبلىسىنىڭ 60 اۋدانىنىڭ 424 اۋىلدىق وكرۋگىندە 1,7 ملن قۇسقا ۆاكتسينا سالىندى.

سونىمەن قاتار, قابدولدانوۆ قۇس وسىرۋشىلەر وداعىمەن جانە جۇمىرتقا وندىرۋشىلەر قاۋىمداستىعىمەن كەلىسىلگەن ستراتەگيا بويىنشا رەسپۋبليكالىق بيۋدجەت ەسەبىنەن تەك قانا انالىق تابىنعا, سونداي-اق قۇس فابريكالارىنىڭ اينالاسىنداعى 20 شاقىرىمدىق ايماقتاعى جەكە اۋلاداعى قۇستارعا جانە جابايى قۇستاردىڭ ۇشۋ جولىنا پروفيلاكتيكالىق ۆاكتسيناتسيا جۇرگىزىلەتىنىن اتاپ ءوتتى. وسىلايشا, جىل باسىندا بولىنگەن پرەپاراتتاردىڭ سانى 100% ۆاكتسيناتسيالاۋعا جەتتى.

«قولدانىستاعى ۆەتەرينارلىق زاڭناما اياسىندا قۇس فابريكالارى وزدەرى ۆاكتسيناتسيا جۇرگىزەدى. بۇل رەتتە برويلەرلىك باعىتتاعى قۇس فابريكالارى برويلەرلەردىڭ ءومىر ءسۇرۋ مەرزىمىنىڭ از بولۋىنا (36-40 كۇن) بايلانىستى ۆاكتسيناتسيا جۇرگىزبەيدى. ولار تاۋلىكتىك بالاپاندار مەن ينكۋباتسيالىق جۇمىرتقانى قۇس فابريكالارىنان الادى, وندا انالىق مال قۇس تۇماۋىنان ۆاكتسيناتسيالانعان. جۇمىرتقا باعىتىنداعى قۇس فابريكالارى انالىق باس تاۋىقتاردى ۆاكتسيناتسيالايدى», - دەيدى قر اشم ۆەتەرينارلىق باقىلاۋ جانە قاداعالاۋ كوميتەتى توراعاسىنىڭ مىندەتىن اتقارۋشى.

سونىمەن قاتار بريفينگتە الەمدەگى قۇس تۇماۋى بويىنشا ەپيدەميولوگيالىق جاعداي تۋرالى اقپارات ايتىلدى. تۇرسىن قابدولدانوۆتىڭ ايتۋىنشا, 2020 جىلدىڭ قىركۇيەگىندە الەمنىڭ 26 ەلىندە جوعارى پاتوگەندى قۇس تۇماۋىنىڭ 459 وشاعى انىقتالدى. كورشى رەسەي فەدەراتسياسىندا بۇگىندە قۇس تۇماۋىنان 1,5 ميلليوننان استام قۇس قىرىلعان.