ەپيزووتياعا قارسى جانە ەپيدەمياعا قارسى ءىس-شارالاردى ۇيىمداستىرۋدى ۇيلەستىرۋ ءۇشىن وبلىستىق توتەنشە جاعدايلار دەپارتامەنتى جانىنان احۋال ورتالىعى قۇرىلدى. بۇل تۋرالى قوستاناي وبلىسىنىڭ وكق وتكەن ونلاين-بريفينگىندە ۆەتەريناريا باسقارماسى باسشىسىنىڭ ورىنباسارى باۋىرجان بەكەت ايتىپ ءوتتى, دەپ حابارلايدى Egemen.kz
"وسىدان ون كۇن بۇرىن ۆەتەريناريا بويىنشا ۇلتتىق رەفەرەنتتىك ورتالىعى ەلدى مەكەندەردە ولگەن قۇستاردىڭ پاتولوگيالىق ماتەريالدارىن دياگنوستيكالىق زەرتتەۋدەن وتكىزدى. سونىڭ ناتيجەلەرى بويىنشا وبلىس اۋماعىندا "جوعارى پاتوگەندى قۇس تۇماۋى" دياگنوزى قويىلدى", دەيدى باۋىرجان بەكەت.
باۋىرجان بەكەتتىڭ ايتۋىنشا, وسىعان بايلانىستى ۆەتەرينارلار ينفەكتسيا وشاقتارىندا ەپيزووتولوگيالىق تەكسەرۋ جۇرگىزىپ, اكتىلەرىن اشم ۆەتەريناريا باسقارماسى وبلىستىق اۋماقتىق ينسپەكتسياسىنا ۇسىنعان.
قوستاناي وبلىسىنىڭ باس مەملەكەتتىك ۆەتەريناريالىق-سانيتاريالىق ينسپەكتورىنىڭ ۇسىنىسى بويىنشا مەڭدىقارا اۋدانىنىڭ كراسنايا پرەسنيا, سارىكول اۋدانىنىڭ ماياك, تاعىل, ۇزىنكول اۋدانىنىڭ سوكول, ارقالىق قالاسىنىڭ رودينا, فۋرمانوۆ, التىنسارين اۋدانىنىڭ پريوزەرنوە, قارابالىق اۋدانىنىڭ ميحايلوۆ اۋىلدارىندا كارانتين بەلگىلەنگەن.
سونداي-اق ول اتالعان ەلدى مەكەندەردىڭ كىرەبەرىسىندە بلوك-بەكەتتەر ورناتىلعانىن جانە قۇستار مەن قۇس شارۋاشىلىعى ونىمدەرىن شىعارۋ توقتاتىلعانىن حابارلادى.
بۇگىندە رەسپۋبليكالىق قوردان قۇس تۇماۋىنا قارسى ۆاكتسينانىڭ 366218 داناسى كەلىپ تۇسكەن. قۇستاردى ۆاكتسينالاۋ ەلدى مەكەندەردەن 25 كيلومەتر راديۋستا بۋفەرلىك ايماقتا جالعاسادى.