قۇس قاناتىنا ىلەسكەن ىندەتكە توقتاۋ جوق ەكەن. شالعايداعى جارقايىڭ اۋدانىنىڭ شويىندىكول اۋىلىندا باستالعان ىندەت بىرتە-بىرتە تاراپ كەلەدى. قازىرگە دەيىن 1100-دەن اسا ءۇي قۇسى قىرىلىپ قالدى.
ۆاكتسينا ەگۋ ءجۇرىپ جاتىر. بارلىعى 510 مىڭ دوزا ءدارى بولىنگەن. شويىندىكولدە اۋرۋ قۇستاردى جويۋ اياقتالدى. وبلىستىڭ 20 ەلدى مەكەنىندە ىندەتتىڭ سالدارىنان قۇستاردىڭ ءولۋ وقيعاسى تىركەلدى. بەس اۋىل كارانتينگە جابىلدى. وبلىس ورتالىعىنىڭ ىرگەسىندەگى قارلىكول اۋىلىندا 400-دەن استام قۇس قىرىلىپ قالدى. اۋىل تۇرعىندارى ءۇشىن ۇلكەن شىعىن. بۇل ەلدى مەكەن كارانتينگە جابىلدى. اۋىل تۇرعىندارى مەن ماماندار كەزدەسۋ وتكىزىپ, جۇمىس ءتارتىبىن ءتۇسىندىردى. اۋىلداعى اعايىن وتەماقى ماسەلەسىنە الاڭداپ وتىر.
– مەنىڭ اۋلامدا 39 قاز بەن 35 تاۋىق ءولىپ قالدى. قازىر ءار قۇسقا قانشا وتەماقى تولەيتىنىن بىلە الماي وتىرمىز. نارىقتىق باعاعا ساي بولسا جاقسى بولار ەدى, – دەيدى قارلىكول اۋىلىنىڭ تۇرعىنى الما احمەتوۆا.
بۇلاق اۋىلدىق وكرۋگىنىڭ اكىمى ورالبەك بەكىشەۆتىڭ ايتۋىنا قاراعاندا, قۇستارى قىرىلىپ قالعان ادامداردىڭ بارلىعىنا ارنايى ەسەپشوت اشىلعان. ورتاشا باعامەن وتەماقى تولەنەتىندىگى تۇسىندىرىلگەن. بولجام بويىنشا, كارانتين كەم دەگەندە 21 كۇنگە سوزىلماق. ىندەت جايلاعان ولكەدەن قۇستىڭ ەتىن, جۇمىرتقاسىن شىعارۋعا بولمايدى. اۋىلداردىڭ كىرە بەرىستەرىنە بەكەتتەر قويىلعان. ماڭايى جىرتىلىپ جاتىر. بۇل كولىك قوزعالىسىن شەكتەۋ ءۇشىن جاسالىپ جاتقان قادام. كارانتين جاريالانعان اۋىلداردىڭ ادامدارى ءبىر جول ارقىلى عانا كىرىپ-شىعا الادى, بارلىق كولىك ەسەپكە الىنادى, تەكسەرىلەدى.
بۇگىنگى تاڭدا وبلىستىڭ 15 ەلدى مەكەنىندە قۇس تۇماۋى راستالىپ وتىر. ىندەت جايلاعان اۋىلداردى كارانتينگە جابۋ جۇمىستارى قولعا الىنعان. ءبىر اپتادا 2 210 ءۇي قۇسىنا ەكپە جاسالدى. ايتسە دە جابايى قۇستىڭ قاناتىنا جارماسقان ىندەتتىڭ ءىزىن شالىپ, توسقاۋىل بولۋ قيىن بولىپ تۇر.
اقمولا وبلىسى