تۇرمە – تەك جازالاۋ عانا ەمەس, قايتا تاربيەلەۋ ورنى. اقتاۋ قالاسىنداعى ەلىمىزدىڭ قىلمىستىق-اتقارۋ جۇيەسى كوميتەتىنە قاراستى تۇرمەلەردە جازاسىن وتەۋشىلەردى تاربيەلەۋ جۇمىستارى جان-جاقتى جۇرگىزىلىپ كەلەدى.
ولارعا قوعامنىڭ ءبىر مۇشەسى رەتىندە قاراپ ءوز قابىلەتتەرىن ۇشتاۋعا, بويىندا بار ونەرىن شىڭداۋعا, سونداي-اق ونەرىن, ءبىلىمىن دامىتىپ, عىلىمي جۇمىسپەن اينالىسىپ, ارنايى پاتەنت الۋعا, ءوزى قالاعان ماماندىقتىڭ يەسى بولۋعا قول جەتكىزۋىنە, جۇمىس جاساپ قاراجات تابۋىنا جانە ارالارىندا ءارتۇرلى جاعدايلار ورىن العاننىڭ وزىندە ەگەر قالاسا وتباسى مۇشەلەرىمەن كەزدەستىرىپ, تاتۋلاستىرۋعا بارلىق مۇمكىندىكتەر جاسالۋدا. ويتكەنى ءومىر اركىمنىڭ ءوزى قالاعانداي بولا بەرمەيدى, ويلاماعان جەردەن جولدان تايىپ, جازا باسۋ ابدەن مۇمكىن. ءتىپتى الدىنا ۇلكەن ارمان مەن ماقسات قويىپ, ءبىر-اق رەت بەرىلەتىن ءومىردى مازمۇندى ىستەرگە ارنايمىن دەگەن تاۋداي تالاپتى جاننىڭ ءوزى قاس-قاعىم ساتتەگى ءبىر عانا ارەكەتىمەن قيالىنداعى ادەمى تىرلىگىن تۇرمەدەگى جۇپىنى تاعدىرعا اۋىستىرىپ الۋى تاڭعالارلىق ەمەس.
ارينە, تۇرمەنىڭ اتى تۇرمە, ونىڭ ءوز الەمى بار. بىراق جازاسىن وتەۋشىلەردىڭ مۇقالماعان رۋحىنا, جاقسى كەلەشەككە دەگەن ۇمتىلىسىنا قاراپ ءبىر جىلىمىقتى سەزگەندەي بولاسىڭ. ال ولاردىڭ جانتالاسا ەڭبەك ەتىپ اقشا تاۋىپ, ءوز قولدارىمەن الۋان ءتۇرلى دۇنيەلەردى – تۇرمىستىق بۇيىمدار مەن اعاشتان جاسالعان وزگە دە نارسەلەردى جاساپ شىعارىپ, ونى قاجەتتى ورىندارعا بەرگەندەرىنە ريزا بولاسىڭ. ءبىرىن ءبىرى تولىقتىرعان دۇنيە-اي دەيسىڭ ىشتەي!
ەلىمىزدە كوكتەم, جاز ايلارىندا ىندەت قاھارىنا مىنگەن شاقتا تەمىر توردىڭ ارعى بەتىندەگىلەر قوعامنان وقشاۋلانىپ قالعان جوق, ەلمەن بىرگە قينالىپ, حالىققا كومەك قولىن سوزۋعا جانۇشىرا ۇمتىلدى.
ءىىم قىلمىستىق-اتقارۋ جۇيەسى كوميتەتى ماڭعىستاۋ وبلىسى بويىنشا دەپارتامەنتىنە قاراستى گم 172/6 تۇزەۋ مەكەمەسىندە قۇرىلعان شاعىن تسەح اۋىر شاقتا دارىگەرلەرگە, وزگە دە تاپسىرىس بەرگەندەرگە ارنالعان قورعانىش كيىمدەرىن, بەتپەردەلەردى تىگۋگە جۇمىلدى. قولدان پىشىلگەن ساپاسى سانيتارلىق تالاپتارعا ساي قورعانىش كيىمدەرىن تىگۋمەن «راميت-اقتاۋ» جشس مەن «ەڭبەك-اتىراۋ» مەكەمەسىندەگى 32 جازاسىن وتەۋشى اينالىسىپ, از ۋاقىت ىشىندە 50 مىڭ بىررەتتىك قولدانىسقا جارامدى قورعانىش كيىمدەرىن, 60 مىڭ بەتپەردە تىگىپ, سونداي-اق 4 دەزينفەكتسيالىق توننەل دايىنداپ شىعاردى. بەلسەندى ەڭبەك ەتكەن ازاماتتاردىڭ ۇلەسى ەلەۋسىز قالعان جوق – ولار ايماق باسشىسى اتىنان العىس حاتتارمەن ماراپاتتالدى, ال ەڭ باستىسى – ولاردىڭ ۇلگىلى ءتارتىبى مەن ۇزدىك ءىسى مەرزىمىنەن بۇرىن بوساپ شىعۋى ءۇشىن ارنايى ورىندار تاراپىنان ەسەپكە الىناتىن بولادى.
قازىرگى تاڭدا ماڭعىستاۋ وبلىسى قىلمىستىق-اتقارۋ جۇيەسى دەپارتامەنتى گم-172/6 مەكەمەسى اۋماعىندا جەكە كاسىپكەرلەردىڭ ءتورت تسەحى جانە «ەڭبەك-اتىراۋ» مەملەكەتتىك مەكەمەسى ورنالاسقان. بۇل كاسىپورىنداردا 111 سوتتالۋشى ەڭبەك ەتىپ, جالاقى الادى. ولار جالاقىلارىنىڭ ءبىر بولىگىن مىندەتتى تالاپتارىنا ساي تولەمگە پايدالانسا, ەكىنشى بولىگىن وزدەرىنىڭ جەكە قاجەتتىلىكتەرىنە جۇمسايدى.
جۋىردا اقتاۋداعى اتالعان زونا قىزمەتكەرلەرى تاعى ءبىر ۇلگىلى ىسىمەن تانىلدى. ولار مەكەمە باسشىلىعىنا وزدەرى وندىرگەن بۇيىمداردى قايتارىمسىز تۇرعىدا قالاداعى الەۋمەتتىك مەكەمەلەرگە بەرۋگە ۇسىنىس بىلدىرگەن. جازاسىن وتەۋشىلەردىڭ بۇل ۇسىنىسى سوتتالۋشىلارمەن اراداعى ەڭبەك كەلىسىمشارتىن, سونداي-اق تسەح اشقان كاسىپكەردىڭ قۇقىن بۇزباي جۇزەگە اسىرىلادى.
– جازاسىن وتەۋ كەزىندەگى ەڭبەك – سوتتالۋشىلاردى تاربيەلەۋدىڭ ماڭىزدى بولىگى. سوندىقتان ءبىز باسشىلىققا وسى تۇرعىداعى ۇسىنىسپەن شىققان سوتتالۋشىلاردى ءاردايىم قولداۋعا دايىنبىز. مۇنداي اكتسيالار ءبىزدىڭ بىرلەسكەن جۇمىسىمىزدىڭ كورسەتكىشى بولماق, – دەيدى ماڭعىستاۋ وبلىسى بويىنشا قاجد باستىعىنىڭ ورىنباسارى قانات جارىلعاپوۆ.
سوتتالۋشىلاردىڭ قولىنان شىققان اعاشتان جاسالعان اس سالاتىن تاباقتار مەن استاۋلار, وقتاۋلار, قارت كىسىلەرگە جانە مۇگەدەك جاندارعا ارنالعان بالداقتار, كۇندەلىكتى تۇرمىسقا قاجەتتى وزگە دە كوزدىڭ جاۋىن الاتىن اسەم بۇيىمداردىڭ ءبىر بولىگى اقتاۋ قالاسىنداعى №2 ارنايى الەۋمەتتىك كومەك كورسەتۋ ورتالىعىنا تابىستالدى. ەندى جازاسىن وتەۋشىلەردىڭ قولىنان شىققان بۇيىمداردىڭ پايداسىن اتالعان مەكەمە قاراۋىنداعى قارت كىسىلەر مەن مۇگەدەكتەر كورەتىن بولادى.
«جاڭىلمايتىن جاق, سۇرىنبەيتىن تۇياق جوق» دەگەندەي, باس بوستاندىعى شەكتەلىپ, تەمىر توردىڭ ارعى جاعىنا توعىتىلعاندار اراسىندا بوس ۋاقىتىندا كىتاپ وقىپ, قوعامعا دا, وزىنە دە پايدالى ىسپەن اينالىسۋدى, سالاماتتى ءومىر سالتىن ۇستانۋدى بەرىك قاعيدا ەتكەن جازاسىن وتەۋشى جان – شالىس باسقان قادامىن قايتا تۇزەۋگە نيەتتى جان دەپ قابىلداۋعا بولادى. قايتا تاربيەلەۋ جۇمىستارى – ءاربىر سوتتالۋشىنىڭ رۋحاني كۇيزەلىسپەن جاقسىلىقتان ءتۇڭىلىپ, ءوزىن قۇردىمعا لاقتىرۋىن بولدىرماۋ ءۇشىن تۇرمە باسشىلىعىنان زور تاباندىلىقتى, ۇلكەن ۇيىمداستىرۋشىلىقتى, ماڭىزدى مىندەتتەر مەن جارقىن جوبالاردى, تىڭ باستامالاردى تالاپ ەتەدى. تۇرمەدەگى جىلت ەتكەن جاڭالىق پەن جاقسى حابار – وسى تۇرعىداعى مازمۇندى ىستەردىڭ كورىنىسى.
ماڭعىستاۋ وبلىسى