دۇنيەنى دۇرلىكتىرگەن ىندەتتىڭ تارالۋى تىيىلماي تۇر. سوڭعى كۇندەرى وزگە وڭىرلەرگە قاراعاندا شىعىس قازاقستان وبلىسىنان كوپ انىقتالدى. ەندى مىنە, COVID-19 بەلگىسى التاي اۋدانىندا كەزەكشى سىنىپ وقۋشىسىنان شىققان.
جالپى, وبلىس اۋماعىندا 1 قىركۇيەكتەن باستاپ كەزەكشى سىنىپتارداعى وقۋشىلار اراسىندا كوروناۆيرۋس ينفەكتسياسىن جۇقتىرعان 4 جاعداي تىركەلگەن. ولار – شەمونايحا اۋدانىنىڭ 4-سىنىپ وقۋشىلارى, كوكپەكتى اۋدانىنىڭ 11-سىنىپ وقۋشىسى جانە التاي اۋدانىنىڭ 2-سىنىپ وقۋشىسى.
وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ءباسپاسوز قىزمەتىنىڭ مالىمەتىنشە, كوروناۆيرۋس ينفەكتسياسىن جۇقتىرعان وقۋشىلار وقيتىن ءبىلىم مەكەمەلەرى شاعىن كەشەندى مەكتەپتەر بولىپ تابىلادى.
وبلىس اۋماعىندا ەكى مەكتەپتىڭ كەزەكشى سىنىپتارى (شەمونايحا, التاي اۋداندارى) جانە كوكپەكتى اۋدانىندا ءبىر مەكتەپ 14 كۇنگە كارانتينگە جابىلدى. مەكتەپتەردەگى كوروناۆيرۋس ينفەكتسياسىنىڭ وشاعى دەپ بەلگىلەنگەن سىنىپتارعا قاشىقتان وقىتۋعا اۋىستىرۋ تۋرالى قاۋلى شىعارىلدى. قاۋىپتى ۆيرۋس انىقتالعان بارلىق مەكتەپتە ەپيدەمياعا قارسى دەزينفەكتسيالىق ءىس-شارا جۇرگىزىلدى.
وتكەن تاۋلىكتەگى اقپارات بويىنشا قازاقستاندا جالپى 79 جاعداي تىركەلسە, ونىڭ 21-ءى – شىعىس قازاقستاندا. وزگە وڭىرلەرمەن سالىستىرساق, الدىڭعى ورىندا تۇر. ال ناۋقاستارعا جاناشىرلىق تانىتقان بىرقاتار ازامات يممۋندىق پلازما تاپسىرعان.
شىعىس قازاقستان وبلىسى