بالالارعا بازارلىق كوبەيدى

قالالىق وقۋ ءبولىمىنىڭ باسشىسى جازيرا حامزاباەۆانىڭ مالىمەتىنشە, وسى ماقساتتا بارلىق كاسىپورىن باسشىلارىنا, جەكە كاسىپكەرلەرگە, بانكتەرگە, باسقا دا ۇيىمدارعا «مەكتەپكە جول» شاراسىنا قاتىسۋعا شاقىرعان حاتتار جولداندى. الدىمەن ماەس-1 كاسىپورنى شاقىرۋعا ءۇن قوسىپ, قالاداعى №11, №9 مەكتەپتەردىڭ 100 وقۋشىسىنا ساباققا قاجەتتى داپتەرلەر, باسقا دا قاجەتتى زاتتار مەن سومكەلەر سىيلادى. مەكتەپتەرگە ينتەرنەت جەلىسىن قوسىپ بەردى. ەكىباستۇزدىڭ ەكىنشى ستانساسى ماەس-2 دە شاقىرۋعا ءۇن قوسىپ, №28 مەكتەپتىڭ 15 وقۋشىسىن وقۋ جىلىنا كەرەكتى زاتتارمەن قامتاماسىز ەتتى.

ال «حالىق بانكى» اق قالالىق بولىمشەسى قالاعا قاراستى اۋىل مەكتەپتەرىنىڭ 1-سىنىبىنا بارعان 25 وقۋشىعا كەڭسە تاۋارلارى, سومكەلەر تابىس ەتتى.

وڭىردەگى الىپ وندىرىستەر ورنا­لاسقان اقسۋ قالاسى مەن قا­لاعا قاراستى 32-اۋىلعا دا قايىرىمدىلىق شاراسىنىڭ شاراپاتى جەتتى. قالالىق ءبىلىم ءبولىمىنىڭ مالىمەتىنشە, بىلتىر وسى ۋاقىتتا الەۋمەتتىك تۇرمىس دەڭگەيى تومەن وتباسىلاردىڭ 2 531 بالاسى «مەكتەپكە جول» قايىرىمدىلىق شاراسى بارىسىندا كومەك السا, بيىل دا قالا مەن قالا اۋماعىندا تۇراتىن 2 مىڭ وقۋشىعا دەمەۋشىلىك كومەك كورسەتۋ جالعاسۋدا. بۇل شاقىرۋعا قالاداعى «اقسۋ فەرروقورىتپا زاۋىتى» اق, «ەۋرازيالىق ەنەر­گەتيكالىق كورپوراتسياسى» اق سياقتى الىپ كاسىپورىندار جىل­داعىداي ۇلەس قوسۋدا.

سونىمەن بىرگە مايقايىڭ كەنتىندە ورنالاسقان «مايقايىڭ التىن» اق كاسىپورنى دا كەنتتەگى №2 مەكتەپتىڭ وقۋشىلارىنا 10 نوۋتبۋك الىپ بەردى. مەكتەپ باسشىلىعى كاسىپورىن كومەگىنە جۇگىنىپ, تاعى 19 پلانشەتكە ءوتىنىش بەرىپتى.

وبلىس ورتالىعىنا قاراستى كەنجەكول اۋلىنداعى «وتبا­سىلىق ۇلگىدەگى بالالار اۋ­لى­نىڭ» تاربيەلەنۋشىلەرىنە ء«ۇمىت ۇزبەۋ» قوعامدىق قورىنىڭ مۇشەلەرى «جەتەكشى» جوباسى اياسىندا 10 نوۋتبۋك, 6 سمارتفون الىپ بەردى. تەلەفون نومىرلەرىن, ينتەرنەتتىك ايلىق ءتاريفىن بالالار اۋلىنداعى جەتەكشىلەر تولەيدى.

دەمەۋشىلەر, جەكە كاسىپكەرلەر, باسقا دا قايىرىمدىلىق جاساۋشى جاندار قاداعالاۋشى ورىنداردان بالالارعا بەرىلەتىن نوۋتبۋكتەر, سمارتفوندار, پلانشەتتەر, داپتەر, قالام, سومكە, باسقا دا قۇرالدار تولى وزدەرى سىيلاعان بازارلىقتىڭ جول ورتادا جوعالىپ كەتپەي, ارنايى ءتىزىم بويىنشا الەۋمەتتىك از قامتاماسىز ەتىلگەن وتباسىلاردىڭ ۇل-قىزدارىنا, جەتىم بالالارعا عانا بەرىلۋىن سۇرايدى. ويتكەنى وبلىستىق ءبىلىم باسقارماسىنىڭ مالىمەتىنشە, بيىل قاشىقتان وقىتۋ فورماتىن ۇيىمداستىرۋ ءۇشىن دەمەۋشىلەردەن باسقا, رەسپۋبليكالىق بيۋدجەتتەن 15 923 كومپيۋتەرلىك تەحنيكا (كومپيۋتەر – 1 657, نوۋتبۋك – 12 119, پلانشەت – 2 147) ساتىپ الۋعا 2,4 ملرد تەڭگە قاراجات ءبولىندى. سوندىقتان قاپتاعان نوۋت­بۋك, كومپيۋتەرلىك تەحنيكا, پلانشەتتەردىڭ سايدا سانى, قۇمدا ءىزى جوعالىپ كەتپەسىن دەگەن كۇدىك دە مازالاماي قويمايدى. بۇل رەتتە تەحنيكالاردى ساتىپ الۋدىڭ اشىقتىعىن قامتاماسىز ەتۋ ءۇشىن باسقارما «ادالدىق الاڭى» جوبالىق كەڭسەسىنىڭ باسشىسى ر.يسابەكوۆتىڭ باسشىلىعىمەن موني­تورينگتىك جۇمىس توبىن قۇردى.

كومپيۋتەرلىك جابدىق ءونىم بەرۋشىلەرىن تاڭداۋ وسى جۇ­مىس توبىنىڭ ۇسىنىستارىنا سايكەس جۇزەگە اسىرىلىپ, وڭىرگە 1 657 بىرلىك دەربەس كومپيۋتەر جەتكىزىلدى. بۇعان دەيىن وڭىردە تۇراتىن 12 304 وقۋشىنىڭ ۇيىندە كومپيۋتەرلىك تەحنيكا بولماعانى انىقتالدى. ەندى 10 قازانعا دەيىن تاعى 14 266 تەحنيكا (12 119 نوۋتبۋك, 2 147 پلانشەت) جەتكىزىلمەك. بارلىق ساتىپ الىناتىن كومپيۋتەرلىك تەحنيكا مۇقتاج وتباسىلارعا تەك ۋاقىتشا پايدالانۋعا بەرىلەدى.

ارينە, كەلگەن بازارلىقتىڭ بارلىعى ورىن-ورنىمەن يگى­لىك­كە جۇمسالسا قۋانىش. ءبارى دە بالالاردىڭ بولاشاعى, قۋا­نىشى ءۇشىن عوي. تاعى دا ءبىر جاعىمدى جاڭالىق: ەكىباستۇزدا ANSA SILICON كومپانياسىنىڭ وكىلدەرى وقۋشىلارعا وقۋ ءۇشىن قاجەتتى باعدارلامالىق قامتاماسىز ەتىلگەن نوۋتبۋكتەردى تابىس ەتتى. قايىرىمدىلىق شاراسى №26 مەكتەپ-گيمنازياسىندا, №25 قازاق قىزدار گيمنازياسىندا, №24 مەكتەپ-گيمنازياسىندا ءوتتى. نوۋتبۋكتەر ماتەريالدىق جاعدايىنا بايلانىستى قىمبات كومپيۋتەرلىك تەحنيكانى ساتىپ الۋعا مۇمكىندىگى جوق وتباسىلارعا بەرىلدى. بالالار قا­شىقتان وقيتىن كەزەڭدە سىي­لىقتار وتە پايدالى بولدى.

– مۇنداي سىيلىق تۋرالى ارمانداعان جوقپىز, – دەدى ايدانا سماعۇلوۆا. – ءبىزدىڭ وتباسىمىز ءۇشىن بۇل ۇلكەن كومەك. نوۋتبۋك ارقىلى بالالارعا ساباق وقۋ وڭايىراق بولادى.

نوۋتبۋك العان 8-سىنىپ وقۋ­شىسى اسلان كەرەيبەك IT ما­مانى بولۋدى ارماندايدى. بولاشاق باعدارلاماشى اپاسى مەن اتاسىنىڭ قامقورلىعىندا.

– مەن زەينەتكەرمىن. زەي­نەتاقىم از, ەكى بالانى تاربيەلەپ وتىرعاندىقتان, وسىنداي قىمبات زاتتى ساتىپ الۋ قيىنعا سوعادى. ءبىز سىيلىقتى ريزاشىلىقپەن قابىلدايمىز. نەمەرەلەرىمنىڭ قاشىقتان وقۋىنا مۇمكىندىك تۋدى, – دەدى دەمەۋشىلەرگە اسلاننىڭ اتاسى.

پاۆلودار وبلىسى