جۋىردا دەنساۋلىق ساقتاۋ ءمينيسترى الەكسەي تسوي ونلاين-فورماتتا «سق-فارماتسيا» جشس قوعامدىق جۇمىس توبىنىڭ مۇشەلەرىمەن كەزدەستى. سق-فارماتسيانىڭ باستاماسىمەن وتكەن جۇزدەسۋ ءدارى-دارمەكپەن قامتاماسىز ەتۋ سالاسىنداعى پروبلەمالاردى, مۇمكىندىكتەر مەن جۇيەلى ماسەلەلەردى, سونداي-اق ءوزارا ءىس-قيمىل تەتىكتەرىن انىقتاۋعا ارنالدى.
قاتىسۋشىلار مينيسترمەن بىرگە ءدارى-دارمەكتى ساتىپ الۋدى جەتىلدىرۋ, جوسپارلاۋ جانە لوگيستيكا, فارماتسەۆتيكا نارىعىنىڭ دامۋ ماسەلەلەرىن تالقىلادى. قوعامدىق جۇمىس توبىنىڭ ۇسىنىسى بويىنشا «سق-فارماتسيادا» كومپانيا قىزمەتىنىڭ ستراتەگيالىق باعىتتارىن جوبالاۋ توپتارى اشىلادى, ولار ءدارى-دارمەكپەن قامتاماسىز ەتۋ جۇيەسىن جەتىلدىرۋگە كومەكتەسەدى. ءدارى-دارمەك ساتىپ الۋ مەنلوگيستيكانى جەتىلدىرۋ, جوسپارلاۋ, تاڭبالاۋ, وتاندىق فارماتسەۆتيكالىق ءوندىرىستى, Big Pharma باعدارلاماسىن (توپ-30 حالىقارالىق فارماتسەۆتيكالىق برەندتەرىنىڭ تاجىريبەسى), IT دامىتۋعا ىقپال ەتەدى.
كەزدەسۋ بارىسىندا مينيسترگە كومپانيا جۇمىسىنىڭ بارىنشا اشىق بولۋىنا اسەر ەتەتىن تەتىكتەر ۇسىنىلدى. ماسەلەن, جاقىندا «سق-فارماتسيادا» «پروبلەمالىق ماسەلەلەر كىتابى» اشىلدى. جۇمىس توبىنىڭ وتىرىسىندا كوتەرىلگەن بارلىق ماسەلە «پروبلەمالىق ماسەلەلەر كىتابىنا» ەنگىزىلەدى, قارالادى جانە جەدەل شەشىم قابىلدانادى. اتاپ ايتقاندا, «پروبلەمالىق ماسەلەلەر كىتابى» اياسىندا 44 جۇيەلى ماسەلە كوتەرىلدى.
«سق-فارماتسيا» جۇمىس توبىنىڭ مۇشەلەرى بىرىڭعاي ديستريبيۋتور جۇرگىزەتىن پاندەمياعا قارسى كۇرەس جونىندەگى جۇمىسقا ازاماتتىق قوعامنىڭ بەلسەندى قاتىسۋىن قامتاماسىز ەۋدى ۇسىندى. وتىرىستا الەۋمەتتىك ماڭىزى بار ورفاندىق پرەپاراتتاردى قوسا العاندا, ءدارى-دارمەكتەردىڭ مەرزىمى مەن ونى تىركەۋ ماسەلەلەرى كوتەرىلدى.
ءوز كەزەگىندە, مينيستر الەمدە كەز كەلگەن پرەپارات مىندەتتى تىركەۋدەن وتەتىنىن, ويتكەنى ءونىمنىڭ قاۋىپسىزدىگى پەن تيىمدىلىگىنە قاتىستى ماسەلە تۋعان جاعدايدا مەملەكەتتىك ورگان ءتيىستى تەكسەرۋ جۇرگىزۋ ءۇشىن قۇجات قاجەت ەكەنىن اتاپ ءوتتى. سەبەبى سيرەك كەزدەسەتىن اۋرۋى بار ناۋقاستاردىڭ ءومىرى كەيدە بەلگىلى ءبىر پرەپاراتقا تاۋەلدى بولادى.
سونىمەن قاتار قوعام بەلسەندىلەرى فارماكولوگيالىق قاداعالاۋدى كۇشەيتۋگە نازار اۋداردى. ويتكەنى سارى كارتالار جەتكىلىكسىز جانە دارىلىك زاتتاردى پايدالانۋدىڭ تيىمدىلىگى مەن قاۋىپسىزدىگىن باعالاۋدا جۇيەلى ءتاسىل قاجەت.
قوعام بەلسەندىلەرى قازاقستان اۋماعىندا تىركەلمەگەن ددۇ نەگىزگى دارىلىك زاتتار تىزىمىنە كىرەتىن ءدارى-دارمەكتى قولجەتىمدى ەتۋ تۋرالى ۇسىنىس جاسادى. جۇمىس توبى مۇشەلەرىنىڭ پىكىرىنشە, بۇل حالىقتى بازالىق دارىلىك زاتتارمەن قامتاماسىز ەتۋگە مۇمكىندىك بەرەدى. جۇمىس توبى ءار ءوڭىر دەڭگەيىندە مونيتورينگ جۇرگىزۋگە مۇمكىندىك بەرەتىن دارىلىك زاتتاردى تۇتىنۋدى باعالاۋ ماسەلەسىن قاراستىرۋعا جەكە توقتالدى. سونىمەن قاتار تاراپتار پاندەميا جاعدايىندا دەنساۋلىق ساقتاۋ جۇيەسىنىڭ جۇمىس ىستەۋ مودەلدەرىن تالقىلادى, حالىقتى ۇزدىكسىز ءدارى-دارمەكپەن قامتاماسىز ەتۋدى جەتىلدىرۋدىڭ جالپى تاسىلدەرىن بەلگىلەدى.
«كومپانيادا ەنگىزىلەتىن بارلىق جاڭالىقتى, ۇزدىكسىز ءدارى-دارمەك جەتكىزۋدى جولعا قويۋ جانە بىرىڭعاي ديستريبيۋتوردىڭ جۇمىسىن جاقسارتۋ ءۇشىن قاجەتتى شارالار قابىلداۋ جوسپارلانىپ وتىر», دەدى «سق-فارماتسيا» جشس باسقارما توراعاسى ەرحات ەسقاليەۆ.
كەزدەسۋ قورىتىندىسى بويىنشا ا.تسوي مينيسترلىكتىڭ قوعام بەلسەندىلەرىمەن ىنتىماقتاستىقتا ءوزارا ءىس-قيمىلعا دايىن ەكەنىن جەتكىزدى.
ەسكە سالا كەتەيىك, «سك-فارماتسيا» جشس-دە قوعامدىق جۇمىس توبى قۇرىلدى. وعان ازاماتتىق قوعام مەن بيزنەس-قاۋىمداستىق وكىلدەرى, دەپۋتاتتار مەن سالالىق ساراپشىلار كىردى. جۇمىس توبى قوعامدىق ماڭىزدى ماسەلەلەردى شەشۋ ءۇشىن ازاماتتىق قوعاممەن ءوزارا قاتىناستى جاقسارتۋ ماقساتىندا قۇرىلعان. بۇگىنگە دەيىن 2 وتىرىس وتكىزدى. جۇمىس توبىنىڭ جيىنى «سق-فارماتسيا» جشس فەيسبۋكتەگى رەسمي پاراقشاسىندا تىكەلەي تاراتىلادى.