ەمحاناعا تىركەلۋ جولدارى قانداي؟

ازاماتتار قانداي جاع­داي­لاردا باستاپقى مەدي­تسي­نا­لىق-سانيتارلىق كومەك كور­سە­تەتىن ەمحا­نا­نى اۋىستىرا الادى؟

 - تۇراقتى نەمەسە ۋاقىتشا تۇراتىن مەكەنجايىن, وقۋ ورنىن نەمەسە جۇمىس ورنىن (باسقا اكىمشىلىك-بىرلىك اۋماعىنا) اۋىس­تىر­عاندا;

- ەمحانا قايتا ۇيىم­داس­تى­رىل­عاندا نەمەسە تا­را­تىل­عاندا;

- ەركىن تاڭداۋ قۇقىعى بويىنشا جىلىنا ءبىر رەت;

- جىل سايىنعى تىركەۋ ناۋقانى كەزىندە.

15 قىركۇيەك پەن 15 قا­را­شا ارالىعىندا وتكى­زىلە­تىن تىركەۋ ناۋقانى شەڭ­بە­رىن­دە ەمحاناعا تىر­كەلۋ ءتار­تى­بى قانداي؟

ازاماتتار باستاپقى مە­ديتسينالىق-سانيتارلىق كومەك ۇيىمدارىنا Egov پورتالى ارقىلى تىركەلە الادى. ول ءۇشىن نە ىستەۋ كەرەك؟

- الدىمەن Egov پورتالىنا تىركەلۋ قاجەت;

- «دەنساۋلىق ساقتاۋ» بولى­مىندە «باستاپقى مەدي­تسينالىق-سانيتارلىق كومەك كورسەتەتىن مەديتسينا ۇيىمىنا تىركەۋ» ساناتىن تاڭداڭىز;

- تۇراتىن ءوڭىردى, تىركەلگىڭىز كەلەتىن مەديتسينا ۇيىمىن كور­سە­تە­سىز, مەكەنجايىڭىز بەن باي­لا­نىس تەلەفوندارىن قال­دى­رى­ڭىز;

- «تىركەلۋ سەبەبى» بولىمىندە «تىركەۋ ناۋقانىن» بەلگىلەڭىز;

ءوتىنىش ءبىر جۇمىس كۇنى ىشىندە قارا­لادى, جاۋابى جەكە كابي­نە­تىڭىز­گە كەلەدى.

ەمحاناعا تىركەلۋدىڭ باس­قا قانداي جولدارى بار؟

ازاماتتاردىڭ كەيبىر ساناتتارىنا ەمحانانىڭ تىركەۋ بولىمىنە بارىپ, ءوتىنىش جازۋ ارقىلى تىر­كە­لۋ­گە مۇمكىندىك بەرىلگەن. ول ءۇشىن جەكە كۋالىك بولسا جەت­كىلىك­تى. بۇل مۇمكىندىكتى:

- زەينەتكەرلەر مەن مۇگە­دەك­تەر;

- ستۋدەنتتەر;

- بالالاردىڭ زاڭدى وكىلدەرى مەن بالالىق شاقتان مۇگەدەك ازاماتتاردىڭ قامقورشىلارى;

- شەتەلدە تۋعان بالالار;

- تۇرمەدە جازاسىن وتەپ جات­قان­دار;

- اسكەري بورىشىن وتەپ جات­قان جاۋىنگەرلەر;

- بالالار مەن بوبەكتەر ءۇيىنىڭ, قارتتار ءۇيىنىڭ تۇرعىندارى;

- رەسمي سەنىمحات نەگىزىندە تىركەلگىسى كەلەتىن ازاماتتار پايدالانا الادى.

پاتسيەنت تىركەۋ ناۋقانى كەزىندە تاڭداعان ەمحانا قىز­مە­تىن قاي كەزدەن باستاپ پايدا­لا­نا الادى؟

ءداستۇرلى ناۋقان كەزىندە ەمحانا اۋىستىرعان ازاماتتار اتالعان مەديتسينا ۇيىمىنىڭ قىزمەتىن كەلەسى جىلدىڭ 1 قاڭتارىنان باس­تاپ پايدالانا الادى. ال جىل سوڭىنا دەيىن بۇرىن تىركەلگەن ەمدەۋ مەكەمەسىنىڭ قىزمەتىنە جۇگىنەدى.

ەمحانا قانداي جاعدايدا ءسىز­دى تىركەۋدەن باس تارتۋى مۇم­كىن؟

1) پاتسيەنت جىبەرگەن قۇجات­تار­داعى مالىمەتتىڭ قاتە بولۋى;

2) پاتسيەنتتىڭ مەكەنجايىنىڭ تاڭداپ الىنعان ەمدەۋ مەكەمەسى ورنالاسقان بىرلىك اۋماعىنان الىستىعى;

3) ءبىر دارىگەرگە تىركەلگەن ادام سانىنىڭ 1700 ادامنان, ۋچاسكەلىك تەراپەۆكە تىركەلگەندەر سانىنىڭ 2200-دەن, ۋچاسكەلىك پەدياترعا تىركەلگەن 0-6 جاسقا دەيىنگى بالالار سانىنىڭ 500-دەن, 0-14 جاسقا دەيىنگى بالا سانىنىڭ 1400-دەن اسىپ كەتۋى;

4) بالانىڭ نەمەسە جوعارىدا كورسەتىلگەن تۇلعا­لار­دىڭ زاڭدى وكىلى ەكەنىن راستايتىن قۇجاتتىڭ جوق­تى­عى.

ەمدەۋ مەكەمەسى تىركەۋدەن نەگىز­سىز باس تارتسا, نە ىستەۋ كەرەك؟

ونداي جاعدايدا پاتسيەنت قوردىڭ 1406 بايلانىس ورتالىعى ارقىلى نەمەسە Qoldau 24/7 قوسىمشا ارقىلى شاعىم قالدىرا الادى.

جەكەمەنشىك مەديتسينا ۇيىمدارىنا تىركە­لۋ­گە بولا ما؟

ازاماتتار مەملەكەتتىك قانا ەمەس, جەكەمەنشىك كلينيكالارعا دا تىركەلە الادى. باستىسى, ءسىز تاڭداعان كلينيكانىڭ مەدي­تسي­نالىق ساقتاندىرۋ قو­رىمەن كەلىسىمشارتى بولسا بولدى. قازىرگى تاڭدا الماتى قالاسى بويىنشا باستاپقى مەديتسينالىق-سانيتارلىق كو­مەك كورسەتەتىن ەمحانا سانى – 73, ونىڭ جارتىسىنا جۋىعى – جەكەمەنشىك.

ەگەر تىركەلگەن ەمحاناڭىز سىزگە قاجەتتى قىز­مەت­تى كور­سەت­پە­سە نە ىستەۋ كەرەك؟ باسقاسىنا اۋىسۋ قا­جەت پە؟

سىزگە قاجەتتى قىزمەتتەردىڭ كەي­بىرى (كونسۋل­تا­تيۆ­تىك-دياگ­نوس­تيكالىق قىزمەت, سالالىق ما­ماندار قىزمەتى) تىركەلگەن ەمحانادا كورسەتىلمەيتىن بولسا, باسقاسىنا اۋىسۋدىڭ قاجەت جوق. مۇنداي جاعدايدا ەمحانا سىزگە باسقا ەمدەۋ مەكەمەسىنە جولداما بەرۋى ءتيىس. جولداما قوسىمشا كەلىسىمشارت نەگىزىندە بەرى­لە­دى.

ساقتاندىرىلماعان ازا­مات­­تار ەمحاناعا تىر­كە­لە الا ما؟

ەمحاناعا تىركەۋ كەپىل­دەن­دىرىل­گەن مەديتسينالىق كومەك پا­كەتى شەڭبەرىندە جۇرگىزىلەدى. سوندىقتان تىركەلۋ ءۇشىن ساق­تان­دى­رۋ ستاتۋسى بولۋى شارت ەمەس.

تىركەۋ ناۋقانىنا قاتى­سىپ جاتقان ەمحانا­لار ءتىزىمىن قاي­دان الۋعا بولادى؟

تىركەۋ ناۋقانىنا قاتىساتىن ەمدەۋ مەكەمەلەرىنىڭ تىزى­مىمەن قوردىڭ fms.kz سايتى ارقىلى تانىسۋعا بو­لادى (https://fms.kz/kk/content/tmkkk-zhne-mms-zhetkizushilerinin-tizilimi). تىزىم­دە فيليالمەن جۇمىس ىستەيتىن بار­لىق ەمدەۋ ۇيىمدارى (ستاتسيونارلار دا, ەمحانالار دا) كورسەتىلگەن. تىركەلۋ ءۇشىن ەمحانالاردى تاڭداۋ قاجەت.