تاياۋدا «قازاقستان بارىسى» قازاق كۇرەسىن دامىتۋ قورى رەسپۋبليكالىق «جاس بارىس» ءتۋرنيرىن قورىتىندىلاپ, قازاق كۇرەسىنەن حالىقارالىق «Eurasia Barysy» ءتۋرنيرى مەن «قازاق كۇرەسىنىڭ وتكەنى, بۇگىنى مەن بولاشاعى» تاقىرىبىندا عىلىمي-تاجىريبەلىك كونفەرەنتسيانىڭ وتەتىنىن حابارلادى.
تاياۋدا «قازاقستان بارىسى» قازاق كۇرەسىن دامىتۋ قورى رەسپۋبليكالىق «جاس بارىس» ءتۋرنيرىن قورىتىندىلاپ, قازاق كۇرەسىنەن حالىقارالىق «Eurasia Barysy» ءتۋرنيرى مەن «قازاق كۇرەسىنىڭ وتكەنى, بۇگىنى مەن بولاشاعى» تاقىرىبىندا عىلىمي-تاجىريبەلىك كونفەرەنتسيانىڭ وتەتىنىن حابارلادى.
جيىندا «قازاقستان بارىسى» قازاق كۇرەسىن دامىتۋ قورى قامقورلىق كەڭەسىنىڭ توراعاسى ارمان شوراەۆ الداعى كەزدە ەلىمىزدە ەڭ ۇلكەن جوبانىڭ قولعا الىناتىنىن ايتتى. وسى جەردە ول «قازاقستان بارىسى» قورىنىڭ جەلتوقسان ايىندا ەلىمىزدە تۇڭعىش رەت حالىقارالىق «Eurasia Barysy» ءتۋرنيرىن وتكىزەتىنىن, وعان قازاقستان, موڭعوليا, قىتاي, تۇركيا, يران, پولشا, رەسەي جانە تاجىكستان قۇرامالارى قاتىساتىنىن جەتكىزدى. «بۇل تۋرنير تاراز قالاسىندا 7 جەلتوقسان كۇنى ۇلتتىق سپورتىمىزدىڭ بەدەلىن حالىقارالىق ارەنادا ارتتىرىپ, قازاق بالۋاندارىنىڭ شەبەرلىگىن ودان ءارى شىڭداۋ ماقساتىندا وتەدى. بالۋاندار 5 سالماق دارەجەسى بويىنشا اينالما جۇيەدە بەلدەسەدى. بەلدەسۋلەر قازاق كۇرەسىنىڭ ەرەجەسىمەن كوماندالىق سيپاتتا وتەدى. بۇل باسەكەنى ءبىز جىلدا «قازاقستان بارىسى» سياقتى وتكىزۋدى جوسپارلاپ وتىرمىز », – دەدى ول. وسىدان كەيىن ول «Eurasia Barysy» ءتۋرنيرى ءساتتى وتسە بولاشاقتا «الەم بارىسى» اتتى جاڭا جارىستى وتكىزەتىندەرىن, ول 2017 جىلى ەكسپو كورمەسى كەزىندە كوكپار مەن توعىزقۇمالاقتان وتەتىن الەم چەمپيوناتى سياقتى ءوتۋى مۇمكىن ەكەنىن مالىمدەدى. ال بيىل ەلىمىزدە تۇڭعىش رەت وتەتىن «Eurasia Barysy» جارىسىنىڭ قالادا جاڭادان اشىلعان «تاراز ارەنا» سپورت كەشەنىندە وتەتىنىن, ونىڭ جۇلدە قورى 80 مىڭ اقش دوللارى بولاتىنىن جەتكىزدى.
دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكيەۆ ءوز ويىن ءبىلدىرىپ, «قازاق كۇرەسىنىڭ وتكەنى, بۇگىنى مەن بولاشاعى» اتتى عىلىمي-تاجىريبەلىك كونفەرەنتسيا بارىسىندا ءتول كۇرەسىمىزدى ءارى قاراي دامىتۋدىڭ جاڭا باعىتى تالقىلانىپ, ۇلتتىق سپورتىمىزدىڭ قازىرگى جاي-كۇيى ساراپقا سالىنىپ, قازاق كۇرەسىنىڭ ەرەجەسى مەن تورەشىلىك ەتۋ جانە سپورتتىق كۇرتەشەگە قاتىستى ۇسىنىستار جاسالاتىنىن ايتتى. «قازاقستان بارىسى» قازاق كۇرەسىن دامىتۋ قورى ءباسپاسوز قىزمەتىنىڭ حابارلاۋىنشا, كونفەرەنتسيا بارىسىندا «قازاق كۇرەسىنە قوسقان ۇلەسى ءۇشىن» جۇلدەسىمەن ءتول كۇرەسىمىزدىڭ دامۋىنا اتسالىسقان ازاماتتار سالتاناتتى تۇردە ماراپاتتالادى.
وسىدان كەيىن جيىنعا قاتىسۋشىلار جاقىندا عانا قىزىلوردا قالاسىندا قازاق كۇرەسىنەن وتكەن رەسپۋبليكالىق «جاس بارىس» ءتۋرنيرىنىڭ قورىتىندىسى تۋرالى مالىمەتتەرىمەن ءبولىستى. وسى تۋرنير تۋرالى «قازاقستان بارىسى» قازاق كۇرەسىن دامىتۋ قورىنىڭ اتقارۋشى ديرەكتورى سارسەن قۇرانبەك ءوز ويىن ءبىلدىرىپ, جارىستىڭ جوعارى دەڭگەيدە وتكەنىن, وعان ەلىمىزدىڭ ءار وڭىرىنەن 23 سالماق دارەجەسى بويىنشا 400-گە جۋىق تالانتتى بالۋاندار قاتىسقانىن, كۇرەستەر كادەتتەر (1998-1999 ج.ت.,9 س/د), جاسوسپىرىمدەر (1996-1997 ج.ت.,7 س/د) جانە جاستار (1994-1995 ج.ت., 7 س/د) اراسىندا وتكەنىن اتاپ ءوتتى.
داستان كەنجالين,
«ەگەمەن قازاقستان».