ايماق مەكتەپتەرى اباتتاندىرىلدى

اتاپ ايتقاندا, شالعايدا جاتقان 52 ەلدى مەكەندە ينتەرنەت جەلىسى تولىعىمەن ىسكە قوسىلدى. تارباعاتاي اۋدانىنىڭ اقجار اۋىلىنداعى مەكتەپكە كوپتەن بەرى قولعا الىنباعان جوندەۋ جۇمىستارى جۇرگىزىلدى. جۇمىس ناتيجەسىن وبلىس اكىمى دانيال احمەتوۆ ارنايى بارىپ تەكسەرىپ قايتتى. اقجار اۋىلىندا 300 ورىندىق مەكتەپ-ينتەرناتى بار 600 ورىندىق مەكتەپ اشىلدى. مۇندا وبلىستىڭ بارلىق اۋداندارى مەن قالالارىنان كوپبالالى جانە از قامتىلعان وتباسىلاردىڭ بالالارى كەلىپ وقي الادى.

سونداي-اق جاڭا وقۋ جىلىنداعى ەپيدەميالىق قيىندىقتارعا قاراماستان, اقجار اۋىلىنداعى مەكتەپ شتاتتىق رەجىمدە جۇمىس ىستەۋگە كوشتى. مۇندا باستاۋىش سىنىپ وقۋشىلارى ءبىلىم الۋدا. بارلىق سانيتارلىق تالاپتار قاتاڭ ساقتالعان.

– اتالعان وقۋ ورنىن جوندەۋ جۇمىس­تا­رىنا 260 ملن تەڭگە ءبولىندى. ناتي­جە­سىندە بارلىق كابينەت قاي­تا قال­پىنا كەلتىرىلىپ, تەرەزەلەر مەن كوممۋنيكاتسيالىق جەلىلەر اۋىستىرىلدى. العاش رەت بۇل مەكتەپتە ارنايى توراپتار, جاڭارتىلعان جىلۋ جەلىلەرى پايدا بولدى, – دەدى وبلىس اكىمى دانيال احمەتوۆ.

ايماق باسشىسى قۇرىلىسشىلاردان مەكتەپتىڭ قىس مەزگىلىندە قانشالىقتى جىلى بولاتىنىن سۇرادى. جۇمىس­شى­لار­دىڭ ايتۋىنشا, جىلىتۋدان قيىندىق بولماۋى ءتيىس.

جاڭا وقۋ جىلىنا وراي وبلىستا 386 مەكتەپ زاماناۋي ستاندارت بويىنشا جوندەلسە, ونىڭ 40-ى كۇردەلى جوندەۋدەن ءوتتى. سونداي-اق وقۋ جىلىنان باستاپ 3 جاڭا مەملەكەتتىك ءبىلىم ورداسى اشىلدى. نازارباەۆ زياتكەرلىك مەكتەپتەرىنىڭ ستاندارتتارى بويىنشا جابدىقتالعان 300 ورىندىق مەكتەپ قاراۋىل اۋىلىندا ەسىگىن ايقارا اشسا, احميروۆ اۋىلىندا 1000 ورىندىق مەكتەپ ىسكە قوسىلدى. جاڭا مەكتەپتەردەن باسقا, وسكەمەن قالاسىندا مەملەكەت-جەكەمەنشىك سەرىكتەستىك اياسىندا 915 ورىندىق 5 بالاباقشا اشىلدى.

وبلىستىڭ اقپاراتتىق ورتالىعىندا وتكەن تىكەلەي ەفير بارىسىندا ءبىلىم باسقارماسىنىڭ باسشىسى سايرانگۇل ءجۇمادىلوۆا ءمالىم ەتكەندەي, وقۋشىلار ءۇشىن كۇن سايىن «بالاپان» جانە «ەلارنا» تەلەارنالارى ارقىلى ساباقتار ۇيىمداستىرىلۋدا. تەلەساباقتاردىڭ وتەتىن ۋاقىتى ءبىلىم باسقارماسىنىڭ الەۋمەتتىك جەلىلەرىنەن ناقتى بەرىلىپ جاتىر.

– 648 مەكتەپتىڭ 271-ءى بالالاردى قاشىقتان وقىتۋدا. ولار تسيفرلى ءبىلىم بەرۋ پلاتفورمالارىمەن قامتاماسىز ەتىلگەن. 225 مەكتەپ وnline mektep.kz پلاتفورماسىنا قوسىلدى. 42 مەكتەپ Daryn.online.kz پلاتفورماسىندا, 2 مامانداندىرىلعان مەكتەپ Edupage.kz جۇيەسىن قولدانۋدا. جالپى, پلاتفورمالارمەن جۇمىس ىستەۋ بارىسىندا ەشقانداي قيىندىقتار تۋىنداعان جوق, – دەدى س.ءجۇمادىلوۆا.

وبلىستىق ءبىلىم باسقارماسى باس­شىسىنىڭ ايتۋىنشا, وقۋشىلاردى كومپيۋ­تەرلەرمەن قامتاماسىز ەتۋ جۇ­مىس­­تارى جالعاسۋدا.

شىنىن ايتۋ كەرەك, وبلىستا 22 476 بالانىڭ ۇيىندە كومپيۋتەرلىك تەحنيكا تاپشى. ونىڭ ىشىندە قاشىقتان ءبىلىم الىپ جاتقان 16 904 وقۋشى عانا مەكتەپ كومپيۋتەرلەرىمەن قامتاماسىز ەتىلگەن. قالعان 5 712 بالا شتاتتىق رەجىمدە ءبىلىم الۋدا. تىكەلەي ەفير بارىسىندا باسقارما باسشىسى اۋداندىق جانە قالالىق ءبىلىم بولىمدەرىنىڭ قارجىلاندىرۋى ارقىلى 2 572 بىرلىك كومپيۋتەرلىك تەحنيكا ساتىپ الىنعانىن اتاپ ءوتتى. سونداي-اق ۇكىمەتتىڭ قورىنان بولىنگەن قاراجات ەسەبىنەن 26 509 كومپيۋتەر الىندى. وعان 4,1 ملرد تەڭگە بولىنگەن.

– مەملەكەتتىك ساتىپ الۋدى ءادىل ۇيىمداستىرۋ جانە كومپيۋتەرلىك تەحني­كالاردى ءبولۋ ماقساتىندا «Adaldyq alańy» جوبالىق كەڭسەسى تورا­عا­سى­نىڭ جەتەكشىلىگىمەن, Nur Otan پارتياسىنىڭ وكىلدەرى, وبلىستىق ءماس­لي­حاتتىڭ حاتشىسى, قوعام وكىلدەرى, جۇمىسپەن قامتۋ جانە الەۋمەتتىك قورعاۋ باسقارمالارىنىڭ, بالالاردىڭ قۇقىقتارىن قورعاۋ جونىندەگى جەر­گى­لىك­تى قوعامدىق ۇيىمداردىڭ, سونداي-اق قامقورشىلىق كەڭەستەردىڭ, اتا-انالار قوعامداستىعىنىڭ, جاستار ۇيىم­دارىنىڭ جەتەكشىلەرىنەن جۇمىس توبى قۇرىلىپ, كومپيۋتەرلەردى تاسىمالداپ, جەتكىزۋشى كىم بولۋ كەرەكتىگى انىقتالدى. قازىرگى تاڭدا كومپيۋتەرلىك تەحنيكالاردى جەتكىزۋ جۇمىستارىن تۇگەلدەي اياقتادىق, – دەدى س.ءجۇمادىلوۆا.

سونىمەن قاتار جۇمىس توبى كومپيۋتەرلىك تەحنيكانى ءبولۋ موني­تو­رين­گىن جۇزەگە اسىردى. ءبىرىنشى كەزەكتە, حالىقتىڭ الەۋمەتتىك ءالسىز توپتارىن: از قامتىلعان, كوپبالالى, ەرەكشە ءبىلىم بەرىلۋىنە قاجەتتىلىكتەرى بار بالالاردى, سونداي-اق وقۋ وزاتتارى قامتاماسىز ەتىلمەك. شىعىس قازاقستان وبلىسىنداعى ورتا ءبىلىم بەرۋ ۇيىمدارى بيىلعى وقۋ جىلىندا جاڭا مازمۇنداعى ءبىلىم بەرۋ جۇيەسىنە تولىق كوشىرىلگەنىن دە ايتا كەتكەن ءجون.

 ايماق باسشىسى دانيال احمەتوۆتىڭ سوزىنە سۇيەنسەك, بيىل جاڭارتىلعان مازمۇندا ءبىلىم بەرۋ بويىنشا 23 مىڭ مۇعالىم ءبىلىمىن جەتىلدىرىپ, 1,5 ملن وقۋلىق ساتىپ الىنعان. وقۋشىلار 100% وقۋلىقپەن قامتاماسىز ەتىلگەن. ال ءبىلىم باسقارماسىنىڭ باسشىسى س.ءجۇمادىلوۆانىڭ ايتۋىنشا, بيىل 11-سىنىپ وقۋشىلارى جاڭا فورماتتا ءبىلىم الىپ جاتىر. اتاپ ايتساق, «كاسىپكەرلىك نەگىزدەرى جانە بيزنەس», «گرافيكا جانە ديزاين», «العاشقى اسكەري-تەحنيكالىق دايىندىق» پاندەرى وقىتىلۋدا. 9, 11-سىنىپتار جاڭا فورماتتا قورىتىندى اتتەستاتسيا تاپسىرادى. جاڭا فورماتتاعى ءبىلىم بەرۋ جۇيەسىنە سايكەس ۇشتىلدىلىككە دە باسا نازار اۋدارىلۋدا. بيىل كوپتىلدىلىك باعدارلاماسى بويىنشا نەمىس جانە فرانتسۋز تىلدەرىن وقىتۋ دا ەنگىزىلگەن. جاڭا باعدارلامانى جۇزەگە اسىرۋ ماقساتىندا 1 مىڭنان اسا مۇعالىم كۋرس­­­­تان ءوتتى. ناتيجەسىندە پەداگوگتەردىڭ ءتىل مەڭگەرۋ ادىستەمەسىنىڭ دەڭگەيى 80-نەن 89%-عا ارتىپ, قاتىسۋشىلاردىڭ ءتىل ءبىلۋىنىڭ ورتاشا دەڭگەيى 35%-دى قۇرادى. بىلتىر بۇل كورسەتكىش 20% بولعان ەكەن. الداعى ۋاقىتتا ەكى جىلدىڭ ىشىندە 2650 پەداگوگتى قوسىمشا دايىنداۋ جوسپارلانىپ وتىر.

راۋشان نۇعمانبەكوۆا,

جۋرناليست

شىعىس قازاقستان وبلىسى