اقمولاداعى ات توبەلىندەي قالامگەرلەر قاۋىمى ءۇشىن اق تۇيەنىڭ قارنى جارىلعان كۇن بولدى. وبلىس اكىمى ەرمەك مارجىقپاەۆتىڭ قولداۋىمەن «كوكشەتاۋ قالامگەرلەرى» سەرياسى بويىنشا التى اقىننىڭ جيناقتارى باسىلىپ شىعىپ, تۇساۋكەسەرى وتكىزىلدى.
«قىسقا ءجىپ كۇرمەۋگە كەلمەي تۇرعان شاقتا», جازعانىم قاشان جارىق كورەدى دەپ الاڭداپ جۇرگەن اقىنداردى قولداۋ ونەگەلى ءىس. بۇل جولى بەلگىلى اقىن قايىرباي تورەعوجانىڭ «كوكجيەك», ەربولات بايات ۇلىنىڭ «ۋاقىت شەڭبەرى», الماس تەمىربايدىڭ «جەكەباتىر», ۇلمەكەن تىنىشتىققىزىنىڭ «مەن كۇتكەن كوكتەم», ابىلاي ماۋلەننىڭ «لابيرينت», تابىسبەك ۇسەننىڭ «بوزجۋسان» جيناقتارى جىرسۇيەر وقىرمانعا جول تارتتى.
سالتاناتتى راسىمدە وبلىس اكىمىنىڭ ورىنباسارى اينا ءمىسىرالىموۆا ءسوز سويلەپ, ۇلتتىق ادەبيەتكە جاسالىپ وتىرعان قامقورلىقتىڭ الداعى ۋاقىتتا دا جالعاسىن تاباتىندىعىنا توقتالدى. جازۋشى-دراماتۋرگ, قوعام قايراتكەرى جابال ەرعاليەۆ جاڭا كىتاپتاردىڭ تۇساۋىن كەسىپ, قۇتتىقتاۋ ءسوز سويلەدى.
– مەملەكەت باسشىسى قاسىم-جومارت توقاەۆتىڭ «جاڭا جاعدايداعى قازاقستان: ءىس-قيمىل كەزەڭى» جولداۋىندا «قازاق زيالىلارىنىڭ جاڭا كەزەڭدەگى مىندەتى – ۇلت بولمىسىنىڭ جاڭا قاعيداتتارىن ورنىقتىرۋ, سونداي-اق ۇلت ساپاسىن ارتتىرۋعا ات سالىسۋ» دەپ اتاپ كورسەتىلگەن, – دەدى جابال ەرعاليەۆ, – ادام جانىن ساۋلەلەندىرەتىن ادەبيەت. ادەبيەتكە قامقورلىق – بولاشاققا جاسالىپ وتىرعان جاناشىرلىق دەپ ۇعۋىمىز كەرەك. جاقسى جىرعا سۋساپ وتىرعان جالپاق جۇرتقا تارتۋ ەتىلگەن تاماشا ولجا بولدى بۇل!
ولەڭ وتى الاۋلاعان جيىن بارىسىندا جانايدار مۋسين اتىنداعى جوعارى قازاق پەداگوگيكالىق كوللەدجىنىڭ ديرەكتورى نۇرتاس احات, مالىك عابدۋللين مۇراجايىنىڭ ديرەكتورى قۇدايبەرلى مىرزابەك, بەلگىلى ولكەتانۋشى مۇرات قاجى ىدىرىسوۆ اق تىلەكتەرىن ءبىلدىردى. جيناقتارى جارىق كورگەن التى اقىن قول ۇشىن بەرگەن وبلىس باسشىلىعىنا, كىتاپتاردىڭ ءتۇرلى-ءتۇستى, ساپالى باسىلىپ شىعۋىنا جاناشىرلىق جاساعان قوس اقىن قۋانىش وسپان مەن مەرگەن توقسانبايعا العىستارىن ءبىلدىردى.
كوكشەتاۋ قالاسى