ەڭبەك جانە حالىقتى الەۋمەتتىك قورعاۋ مينيسترلىگى ءباسپاسوز قىزمەتىنىڭ حابارلاۋىنشا, 130 مىڭ وتباسىداعى 650 مىڭنان استام قازاقستاندىققا IV توقساندا اتاۋلى الەۋمەتتىك كومەكتى (بۇدان ءارى – ااك) تاعايىنداۋ, ولاردىڭ مەملەكەتتىك مەكەمەلەرگە جۇگىنۋىنسىز اۆتوماتتى تۇردە ۇزارتىلادى.
ەڭبەك جانە حالىقتى الەۋمەتتىك قورعاۋ ءمينيسترىنىڭ ءتيىستى بۇيرىعى وسى جىلدىڭ 25 قىركۇيەگىندە قابىلداندى جانە رەسمي جاريالانعان كۇننەن باستاپ كۇشىنە ەنەدى.
بۇل شارا اۋىلدىق اكىمدىكتەردە جانە جۇمىسپەن قامتۋ ورتالىقتارىندا ادامداردىڭ جاپپاي جينالۋىنىڭ الدىن الادى, وسىلايشا ازاماتتاردىڭ كوروناۆيرۋس ينفەكتسياسىن جۇقتىرۋ قاۋپىن ازايتادى.
ءبىرىنشى رەت جۇگىنگەن كەزدە جۇمىسپەن قامتۋ ورتالىقتارىنىڭ قىزمەتكەرلەرى مەملەكەتتىك ورگانداردىڭ اقپاراتتىق بازالارىندا قاجەتتى دەرەكتەردى تەكسەرەدى. سونىمەن بىرگە ۋچاسكەلىك كوميسسيالار ااك تاعايىنداۋعا ءوتىنىش بەرۋشىلەرگە مەسسەندجەرلەر ارقىلى ساۋالداما جۇرگىزەدى, بارىپ تەكسەرىس وتكىزبەيدى. ااك وتىنىمدەرىن جاڭارتۋ كەزىندە كىرىستەردىڭ بەلگىلى ءبىر تۇرلەرى ەسكەرىلمەيدى.
بۇعان دەيىن ااك الۋشىلارىنا توتەنشە جاعداي مەن شەكتەۋ شارالارىنىڭ سەبەبىنەن II جانە III توقسانداردا كومەك تاعايىنداۋ ۇزارتىلعان بولاتىن.
ااك جان باسىنا شاققانداعى ورتاشا تابىسى وتباسىنىڭ ءاربىر مۇشەسى ءۇشىن ايماقتىق ەڭ تومەنگى كۇنكورىس دەڭگەيىنىڭ 70%-ىنان تومەن ازاماتتارعا تاعايىندالاتىنىن ەسكە سالامىز.
قازاقستاندا از قامتىلعان ازاماتتار قاتارىندا بارلىعى 760 مىڭنان استام ااك الۋشى بار.