نۇر-سۇلتان قالالىق قوعامدىق دەنساۋلىق ساقتاۋ باسقارماسى كۆي-دىڭ ىقتيمال جاڭا تولقىنىندا تۇرعىندارعا پسيحولوگيالىق كومەك كورسەتەتىن بولادى. ەمحانالاردىڭ بەيىندى ماماندارى وسى باعىتتا جۇمىس ىستەۋگە جۇمىلدىرىلادى.
«قالا تۇرعىندارىندا كۆي بويىنشا سۇراقتار تۋىنداعان كەزدە حالىقتى تولىق اقپاراتپەن قامتاماسىز ەتۋ ءۇشىن ەمحانالارداعى Call-ورتالىقتاردىڭ جۇمىسىن كۇشەيتەمىز. ءبىزدىڭ پسيحولوگتەر حالىقتى تولعاندىراتىن سۇراقتارعا جاۋاپ بەرۋگە, پسيحولوگيالىق قولداۋ كورسەتۋگە دايىن» دەدى باسقارما باسشىسىنىڭ ورىنباسارى ءاليا رۇستەموۆا.
Call-ورتالىقتاردىڭ تەلەفوندارى باسقارمانىڭ, قالالىق مەديتسينالىق ۇيىمداردىڭ سايتىندا جانە الەۋمەتتىك جەلىلەردە ورنالاستىرىلادى. سونداي-اق امبۋلاتوريالىق كومەك دەڭگەيىندە پاتسيەنتتەردى وڭالتۋ بويىنشا جۇمىس جۇرگىزىلەدى.
قوعامدىق دەنساۋلىق ساقتاۋ باسقارماسى كوروناۆيرۋستىڭ ءورشۋى جاعدايىندا كۇزگى-قىسقى كەزەڭگە دايىندىق جۇمىستارىن جۇرگىزۋدە. وسىلايشا COVID-19 كوروناۆيرۋستىق ينفەكتسياسىمەن كۇرەسۋدىڭ 3 كەزەڭىنە جوسپار قۇرىلعان. ءبىرىنشى كەزەڭدە 5 مەديتسينالىق ۇيىمنىڭ بازاسىندا 1645 توسەكتىك ورىن ورنالاستىرۋ جوسپارلانۋدا. سونىمەن قاتار كوپسالالى مەديتسينالىق ۇيىمدار جەدەل قابىلداۋ جانە جوسپارلى تۇردە ناۋقاستاردى قابىلداۋدى جالعاستىرادى. ەكىنشى كەزەڭ بىرقاتار رەسپۋبليكالىق كلينيكالاردا قوسىمشا 1500 كەرەۋەت ورنالاستىرۋدى قاراستىرادى. ءۇشىنشى كەزەڭ كەرەۋەتتەردى تەك قالالىق اۋرۋحانالار مەن ەمحانالاردا عانا ەمەس, سونىمەن قاتار قوناقۇي كەشەندەرى مەن جاتاقحانالاردا بەيىمدەلگەن بولمەلەردە ورنالاستىرۋدى كوزدەيدى. سانيتارلىق دارىگەرلەردىڭ تەكسەرۋىنەن كەيىن بىرقاتار مەديتسينالىق ۇيىمدار «كوۆيدتىك اۋرۋحانالارعا» رەزەرۆتە تۇر.
«مۇنىڭ بارلىعى 5600-گە دەيىن جۇقپالى توسەكتىك ورىن ورنالاستىرۋعا مۇمكىندىك بەرەدى, ونىڭ 465-ءى – رەانيماتسيالىق. مەديتسينا قىزمەتكەرلەرى مەن مەديتسينالىق مەكەمەلەردىڭ اۋىرتپالىعىن ءبىر ۋاقىتتا كۇرت ارتتىرۋعا جول بەرمەۋ كەرەك», دەيدى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءا.رۇستەموۆا.
بۇگىندە 50-دەن استام وكپەنى جاساندى جەلدەتۋ اپپاراتى (وعان دەيىن سونداي 200-دەي اپپارات الىندى), 2 كومپيۋتەرلىك توموگراف (جالپى قالا بويىنشا 19), وكپەنىڭ زاقىمدانۋ پايىزىن كورۋگە مۇمكىندىك بەرەتىن 7 ساندىق رەنتگەن جۇيەسى, 3 وتتەگى رەزەرۆۋارى قوسىمشا ساتىپ الىندى. سونىمەن قاتار قالانىڭ ەمدەۋ مەكەمەلەرىنە 500-دەن استام وتتەگى كونتسەنتراتورى, 250-گە جۋىق وكپەنى جاساندى جەلدەتۋ اپپاراتى, 300-گە جۋىق فلوۋمەتر, 500 كوپفۋنكتسيونالدى ارنايى كەرەۋەت جەتكىزىلدى. سونداي-اق 1600-گە جۋىق وتتەگى نۇكتەسى بار.
جاقىن ارادا مەديتسينالىق جابدىقتاردان باسقا جىلجىمالى فليۋوروگرافيالىق كەشەندەر, ساندىق رەنتگەن جۇيەلەرى جانە جوعارى دالدىكتەگى جەلدەتكىشتەر دە كەلەدى. قازىرگى تاڭدا ستاتسيونارلاردى وكپەنى جاساندى جەلدەتۋ اپپاراتىمەن قامتاماسىز ەتۋ شامامەن 94%-دى قۇرايدى.