2000 جىلعى تامىزدىڭ باس كەزىندە قازاقستاننىڭ حالىق اقىنى ءاسيا بەركەنوۆا 50 جاسقا تولدى. اقىننىڭ ادەمى كوركىنە, كەڭپەيىلدى, دارقان مىنەزىنە قاراي اسپاننان كۇن ساۋلەسى جەرگە ءتۇسىپ, دۇنيە جارقىراپ كەتتى. ءبارىمىز مەرەيتويعا بايلانىستى ەلۋباي ومىرزاقوۆ اتىنداعى قوستاناي وبلىستىق فيلارمونياسىنىڭ زالىنا جينالدىق. زالدا ينە شانشار جەر جوق, ءىشى حالىققا لىق تولى.
ءاسيا ايىپقىزىنىڭ اتىنا جىلى لەبىزدەر ايتىلىپ جاتىر. ءبىر كەزدە قازاقستان رەسپۋبليكاسىنىڭ مەملەكەتتىك حاتشىسى ءابىش كەكىلباي ۇلىنىڭ قۇتتىقتاۋى وقىلدى.
«اسا قادىرلى ءاسيا! ءسىز قازاق جىرىنىڭ شالقار ايدىنىنا اققۋ بولىپ قونىپ, ۇعىنا بىلەر كوڭىل مەن سۇيسىنە بىلەر كوزدى بىردەي قۋانتىپ كەلگەنسىز.
ەرەكشە دارىنىڭىز بەن ازاماتتىق قارىمىڭىز جۇرتشىلىقتىڭ ىستىق ىقىلاسى مەن شىنايى قۇرمەتىنە يە ەتتى.
دارمەنى ءبىتتى دەپ جۇرگەن ەجەلگى ونەردى قايتا داۋرەندەتىپ, تاريحتىڭ تالقىلى دا تارتىستى كەزەڭىندە حالقىمىزدىڭ كەتكەن قاپىسىن تۇگەندەپ, ەلىمىزدىڭ جىعىلعان ەڭسەسىن كوتەرۋگە قىزمەت ەتكىزە بىلگەن ايتۋلى ايتىسكەر اقىندار كوشباسشىلارىنىڭ بىرىنە اينالدىڭىز.
ءسىزدىڭ بيىك ادامگەرشىلىككە, وتانشىلدىق پەن ەلجاندىلىققا, ابزال ازاماتتىق مۇراتتارعا شاقىراتىن شابىتتى شىعارماشىلىق ەڭبەگىڭىز ءاردايىم حالىق كوڭىلىنەن شىعا بەرەرىنە سەنىم زور.
ولەڭىڭىزدەي كوركەم, ارمانىڭىزداي اسقاق ءومىر ءسۇرىپ, مەرەيىڭىز تاسىپ, وركەنىڭىز وسە بەرۋىنە تىلەكتەستىك بىلدىرەمىن.
زور قۇرمەتپەن ءابىش كەكىلباي ۇلى.
استانا. تامىز, 2000 جىل.»
ءابىش كەكىلباي ۇلىنىڭ كوركەم, شەبەر تىلمەن جازعان سوزدەرى حالىقتى ۇيىتىپ, باۋراپ الدى. جۇرگىزۋشى دە مانەرلەپ, بار داۋسىمەن كوڭىلدى اۋەننىڭ اقىرىن سۇيەمەلدەۋىمەن ناقىشتاپ, كەلىستىرىپ وقىدى. قۇتتىقتاۋ وقىلىپ بولعان سوڭ سىلتىدەي تىنىپ قالعان ادامدار ۇزاق قول شاپالاقتادى. ءابىش اعانىڭ تەرەڭ پايىمدى, جان تەبىرەنتەر سوزدەرى اسەر ەتتى مە, ساحنا تورىندە تۇرعان ءاسيا بەركەنوۆانىڭ كوزىنە جاس تامشىلارى ءۇيىرىلدى. مەن دە وسى ساتتە تولقىپ, كوڭىلىم بوساپ, ءوزىمدى ازەر تەجەپ قالدىم. قىلقالام شەبەرىنىڭ قازاق ءتىلىنىڭ بايلىعىن كۇن نۇرىنداي تاراتىپ, ادام جانىن تولقىتىپ, ءسوز قۇدىرەتىن ەلگە سەزدىرگەنى قانداي عاجاپ دەسەڭىزشى!
ەسەنگەلدى ءسۇيىنوۆ,
اقىن, قازاقستان جازۋشىلار وداعىنىڭ مۇشەسى