قايتا وقۋىما سۇرانىپ تۇرادى

الايدا كىتاپ – جانىمىزدىڭ اجىراماستاي ءبىر بولشەگىنە اينالعان قۇندىلىق ەكەنىن ويىمىزدان شىعارماساق كەرەك. بالا كۇنىمىزدەن كىتاپپەن دوس بولدىق, سول بالا دوسىمىزعا دەگەن ادالدىعىمىزدى, تۇراقتىلىعىمىزدى ساقتاپ كەلەمىز, دۇرىسى – ساقتاۋعا تىرىسىپ-اق كەلەمىز.

وقىپ جاتقان كىتاپتاردىڭ بارلىعىن تىزبەلەپ ايتىپ شىعۋعا دا بولار. ءدارىس وقۋعا دايىندىق بارىسىندا وقىلاتىن ەڭبەكتەر قاتارى دا بارشىلىق. سوڭعى وقىعاندارىم – دجوزەف كەمپبەللدىڭ «تىسيا­چەليكي گەروي», كريستوفەر ۆوگلەردىڭ «پۋتەشەستۆيە پيساتەليا» اتتى ەڭبەكتەرى. وسى  كىتاپ­تاردىڭ ارا-اراسىنان جول تاۋىپ, ءوزىمنىڭ سۇيىكتى ميفولوگيامدى, ەرتەگىلەرىمدى قايتالاپ وقي­مىن. مەنىڭ سۇيىكتى ەرتەگىلەرىمنىڭ ىشىندە «ەر توستىك» پەن «كەرقۇلا اتتى كەندەباي» كوش باس­تايدى. بۇل ەرتەگىلەردى از بولسا جىلىنا ءۇش-ءتورت قايتارا وقيمىن. «ەر توستىكتىڭ» تاتار, قىرعىز نۇسقالارىن دا قايتالاپ وقۋدامىن. قىرعىزداردا ساقتالىپ قالعان «ەر توستىك» ەپوسىنداعى پەرىنىڭ قىزى ايسالقىننىڭ كەنجەكە سۇلۋدى تىلدەيتىن جەرى جانىمدى تۇرشىكتىرەدى... بۇل ەرتەگىنىڭ ءبىزدىڭ قازاقتاردا دا ءاۋ باستا ەپوس تۇرىندە جىرلانعانىنا كۇمانىم جوق.

ارينە, ۇلت ادەبيەتىنىڭ كلاسسيكالىق شىعار­مالارى دا قايتالاي وقۋىما سۇرانىپ تۇرادى, انىعىندا, ولاردى قايتالاپ وقۋعا ءوزىمنىڭ كوڭىلىم كەتىپ تۇرادى. ولار – ءابىش كەكىلبايدىڭ «حانشا-داريا حيكاياسى», مۇحتار ماعاۋيننىڭ «قىپ­شاق ارۋى» مەن «قوساعاشى»,  تولەن ابدىك­تىڭ «تۇعىر مەن عۇمىرى». بۇل ءتىزىمىم ءبىراز شىعار­مالاردى قامتيدى. قاتىگەز عاسىردىڭ تالايىنا تۇسكەن تاڭعۇت حانىمى گۇربەلجىن سۇلۋدىڭ تاعدىرى,  بۇگىنگى تىرشىلىك پەن باعزى تاريحتى تۇتاستىرعان سارجان ءمۇسىنشى مەن ايسۇلۋ بەگىمنىڭ بولمىسى, كەشەگى كەڭەستىك جۇيەنىڭ ادامداردىڭ جانىن قاسىرەتكە بوكتىرىپ, قان جىلاتقان قانقۇيلى ساياساتىنىڭ كەسىرىنەن تاعدىرى تالكەككە تۇسكەن باتىر – ءبوريستىڭ جان ازاسى... «وزەكتى جانعا – ءبىر ءولىم ەمەس, مىڭ ءولىم» دەگەن ەپيگراف الىنعان تۋىندىنىڭ  كەڭەستىك كەزەڭدە عۇمىر كەشكەن ارقاي­سىمىزدىڭ الەتىمىزگە قاتىسى بارى اقيقات... 

جانات اسكەربەكقىزى,

اقىن, فيلولوگيا عىلىمدارىنىڭ دوكتورى