قازىرگى تاڭدا الماتى قالاسىنىڭ ەمحانالارىندا وڭالتۋ بولىمشەلەرى قۇرىلىپ, جۇمىسقا كىرىستى, دەپ حابارلايدى Egemen.kz.
"وڭالتۋ – بۇل ادام دەنساۋلىعىنا بايلانىستى, حيرۋرگيالىق وپەراتسيادان كەيىن, ونىڭ ىشىندە سوزىلمالى اۋرۋلار, جاراقاتتار جانە ت.ب. سالدارىنان كۇندەلىكتى ومىردە فۋنكتسيونالدىق شەكتەۋلەرگە تاپ بولعان نەمەسە مۇمكىن بولعان جاعدايدا, بىرتىندەپ قالپىنا كەلتىرۋدىڭ قاجەتتى ءىس-شارالار كەشەنى. ءبىزدىڭ ورتالىق بارلىق جاستاعى ادامدارعا كۇندەلىكتى قىزمەتىن توقتاتپاي نەمەسە قايتا باستاۋعا مۇمكىندىك بەرەتىن وڭالتۋ قىزمەتتەرىن ۇسىنادى. بىزدە مىقتى كاسىبي كوماندا بار, ونىڭ ماقساتى زاقىمدالعان فۋنكتسيالاردى بارىنشا قالپىنا كەلتىرۋ بولىپ تابىلادى. قازىرگى ۋاقىتتا كوروناۆيرۋسپەن اۋىرىپ شىققان ناۋقاستارعا وڭالتۋدى جۇرگىزىپ جاتىرمىز", دەيدى №4 قالالىق ەمحانانىڭ باس دارىگەرى زۋحرا ۋماروۆا.
COVID-19 پاندەمياسىنا بايلانىستى قازىرگى ۋاقىتتا ناۋقاستارعا: وتتەگى تەراپياسى, ارنايى درەناجدى ماسساج, تىنىس الۋ گيمناستيكاسىنىڭ بەلگىلى ءبىر ادىستەرى, فيزيوتەراپيا جاتتىعۋلارى وڭالتۋ ءۇشىن بەلسەندى تۇردە جۇرگىزىلۋدە. ونىڭ ىشىندە پسيحولوگيالىق جانە الەۋمەتتىك بەيىمدەلۋ دە بار. ماماندار تىنىس الۋمەن عانا ەمەس, بۇكىل اعزامەن, تۇتاس جۇيە رەتىندە جۇمىس ىستەيدى, ينتەگرالدى جۇيەمەن بىرگە, برونح-وكپە جۇيەسى عانا ەمەس, سونىمەن قاتار جۇرەك-تامىر جانە جۇيكە جۇيەسى دە زارداپ شەگەدى, ويتكەنى مي قان اينالىمىنىڭ سوزىلمالى بۇزىلۋى ورىن الادى.
بولىمشەدە وڭالتۋدىڭ ءۇشىنشى كەزەڭىنە جاتاتىن ناۋقاستار دا ەمدەۋ كۋرسىنان وتە الادى. بۇل كۋرستان تىرەك-قيمىل جۇيەسىنىڭ پاتولوگياسى بار (جاراقاتتاردان, حيرۋرگيالىق ارالاسۋلاردان, سىنىقتاردان, ج ۇلىن باعاننىڭ دامۋ اقاۋلارىنان كەيىن), نەيروحيرۋرگيالىق جانە نەۆرولوگيالىق پروفيلدەر, سونداي-اق جۇرەك-قانتامىر جۇيەسىنىڭ پاتولوگياسى بارناۋقاستار(جەدەل ميوكارد ينفاركتىسى) وتەدى. مەديتسينالىق وڭالتۋ بولىمشەسىندە 3 كەزەڭدە امبۋلاتوريالىق وڭالتۋ: كارديولوگيا, نەۆرولوگيا جانە نەيروحيرۋرگيا, تراۆماتولوگيا, ورتوپەديا بويىنشا جۇرگىزىلەدى.ونىڭ ىشىندە ورتالىق جۇيكە جۇيەسىنىڭ پەريناتالدى زاقىمدانۋىنىڭ سالدارى بار بالالارعا قىزمەت كورسەتىلەدى.
ماسەلەن, قازىرگى كۇندەرى ج.دىلماعامبەتوۆ الماتىداعى N4 قالالىق ەمحانا جانىنداعى وڭالتۋ ورتالىعىندا امبۋلاتوريالىق رەابيليتاتسيانىڭ 3 كەزەڭىنەن ءوتىپ جاتىر.
"ول مي قان اينالىمىنىڭ ءجىتى بۇزىلۋىنا ۇشىراعان. مۇندا وتە ساۋاتتى ماماندار جۇمىس ىستەيدى, ماسەلەنى مۇقيات زەرتتەيدى, اۋرۋدىڭ بارىسىن انىقتايدى, ءار ناۋقاسقا ارقاشان مەيىرىمدى, جاناشىر جانە شىدامدى كەلەدى. ەڭ باستىسى ء–وزىڭىزدى اياماۋ جانە بارلىق ۇسىنىستاردى ورىنداۋ, سودان كەيىن ناتيجەلەر جاقسى بولادى. روكسانا, ايسۇلۋ امانگەلدىقىزىنا كاسىبي كەڭەستەرى مەن جىلى سوزدەرى ءۇشىن العىسىمدى بىلدىرەمىن. ورتالىقتىڭ بارلىق ۇجىمىنا دەنساۋلىق جانە جۇمىستارىنا ساتتىلىك تىلەيمىن!", دەيدى جەتكەرباي قاراساي ۇلى.
ناۋقاستار ءمامس جانە امبۋلاتوريالىق-ەمحانالىق كومەك اياسىندا جەرگىلىكتى جالپى تاجىريبە دارىگەرىنىڭ جولداماسى بويىنشا قابىلدانادى. الماتى قالاسى قوعامدىق دەنساۋلىق باسقارماسىنىڭ قولداۋىمەن ماماندار گەرمانيا مەن لاتۆيادا ءبىلىم الدى. مەديتسينالىق وڭالتۋ دارىگەرى, دارىگەر-رەفلەكسوتەراپەۆت قىتايدا ءبىلىم الىپ كەلگەن.