جاپونيانىڭ وكىلدەر پالاتاسى ىشكى سايلاۋ وتكىزىپ, ەسيحيدە سۋگانى رەسمي تۇردە جاڭا پرەمەر-مينيستر لاۋازىمىن اتقارۋعا لايىق دەپ شەشتى. سونداي-اق ول ليبەرالدى-دەموكراتيالىق پارتيانىڭ دا تىزگىنىن ۇستادى.
28 تامىزدا سيندزو ابە دەنساۋلىعىنىڭ ناشارلاۋىنا بايلانىستى پرەمەر-مينيستر قىزمەتىنەن كەتەتىنىن مالىمدەگەن ەدى. وسىلايشا ەلدە ۇكىمەت باسشىسىن سايلاۋ ءوتتى.
جاڭادان قىزمەتكە كىرىسكەن ە.سۋگا ەلدىڭ ەكونوميكاسىن قالپىنا كەلتىرۋ جانە كوروناۆيرۋس ينفەكتسياسىمەن كۇرەسۋگە ەرەكشە نازار اۋداراتىنىن جەتكىزدى. سونداي-اق ول نەسيە-قارجى ساياساتىن ىرىقتاندىرىپ, قارجىلىق ىنتالاندىرۋ شارالارىن ورىنداماق. ياعني جاڭا باسشى سيندزو ابەنىڭ ۇستانعان ساياساتىن جالعاستىراتىنىن مالىمدەدى.
سونداي-اق جاڭا پرەمەر-مينيستر ەل ەكونوميكاسىن كۇشەيتىپ, جاھاندىق داعدارىسقا جول بەرمەۋ ءۇشىن قابىلداناتىن بىرقاتار شارانى اتاپ ءوتتى. ماسەلەن, كوروناۆيرۋس ينفەكتسياسىمەن كۇرەسكە, زارداپ شەككەن كاسىپكەرلەرگە سۋبسيديا ءبولۋ مەن ىشكى ءتۋريزمدى دامىتۋعا 2,2 ترلن دوللار بولىنبەك. بۇدان بولەك ۇلتتىق قاۋىپسىزدىككە قاتىستى ساياسات قايتا قاراستىرىلماق.
ە.سۋگانىڭ سوزىنە سۇيەنسەك, ول بۇرىنعى ۇكىمەت مۇشەلەرىن اۋىستىرۋعا اسىقپايدى. ازىرگە ول مينيسترلەر كابينەتىنە سەنەتىنىن ايتىپ وتىر.