قوستاناي پوليتسەيلەرى 14 ۆەلوسيپەد ۇرلاعان كۇدىكتىنى ۇستادى. بۇرىن سوتتالعان 34 جاستاعى ەر ادام قاراۋسىز قالعان كولىك قۇرالدارىن تۇندە تورۋىلداپ ءجۇرىپ تۇرعىن ۇيلەردىڭ كىرەبەرىسىنەن ايداپ اكەتىپ وتىرعان, دەپ حابارلايدى Egemen.kz.
"سوڭعى ءبىر-ەكى اي ىشىندە ۆەلوكولىگىن ۇرلاتقان تۇرعىنداردان تۇسكەن شاعىم جيىلەپ كەتتى. الدىنا الا ىزدەستىرۋ شارالارىنىڭ ناتيجەسىندە جەدەل ۋاكىلدەر 34 جاستاعى كۇدىكتىنى ۇستادى. ونىڭ 14 ۆەلوكولىك ۇرلاعانى دالەلدەنىپ وتىر. ول ۆەلوسيپەدتەردى بىردەن ساتىپ جىبەرىپ وتىرعان. كولىك قۇرالدارىن ساتىپ العان ادامدار دا انىقتالدى. ءبىز بيىل ۆەلوسيپەدتەردى تاڭبالاۋعا, ياعني ءاربىر جەڭىل كولىك قۇرالىنا ارنايى قۇرىلعى ارقىلى جەكە نومىرلىك بەلگى قويۋعا كوشتىك. بۇل ۆەلوسيپەد ۇرلىعىن اشۋدى ەداۋىر جەڭىلدەتەدى. وتكەن جىلى بازاعا ەنگىزىلگەن 550-دەن بىردە-ءبىر ۆەلوسيپەد ۇرلانعان جوق. بۇل ماسەلە بويىنشا كەز كەلگەن ادام پوليتسيا باسقارماسىنا جۇگىنە الادى جانە 10 مينۋت ىشىندە ونىڭ كولىگىنە جەكە ءنومىر جازىلادى. وزىڭىزبەن بىرگە جەكە كۋالىگىڭىز بولۋى كەرەك", دەيدى ەربول تايبەكوۆ.
قازىر كۇدىكتىگە قاتىستى بارلىق زاتتاي ايعاقتار الىنىپ, قىلمىستىق كودەكستىڭ 188-بابى بويىنشا قىلمىستىق ءىس قوزعالدى.
قوستاناي وبلىسى