تولەگەن بايعۇلوۆ وبلىستىق اكىمدىكتە وتكەن كەڭەسكە قاتىسىپ, "ادالدىق الاڭى" رەسپۋبليكالىق جوبالىق ءوفيسىنىڭ جۇمىسى تۋرالى باياندادى, دەپ حابارلايدى Egemen.kz.
وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆتىڭ توراعالىعىمەن وتكەن شاراعا وڭىردەگى بارلىق مەملەكەتتىك ورگانداردىڭ باسشىلارى بەينەكونفەرەنتسيا بايلانىسى ارقىلى قاتىستى.
تولەگەن بايعۇلوۆ: «كۇرمەۋلى ماسەلەلەر قوردالانىپ قالعان سالالاردا جۇمىستى جانداندىرۋ, سەرۆيستىك اكىمدىكتەردىڭ جۇمىسىن ءتيىستى دەڭگەيدە جۇرگىزۋ قاجەت, حالىقپەن كەرى بايلانىس بولماسا, مەملەكەتتىك اپپاراتتىڭ جۇمىسى ءتيىمسىز بولادى» - دەدى.
كەزدەسۋ بارىسىندا ەكى كۇن بويى سەرۆيستىك اكىمدىكتەردىڭ قىزمەتىنە جۇرگىزىلگەن مونيتورينگ قورىتىندىلارى تالقىلاندى. جيىن بارىسىندا ءسوز بولعان ماسەلەلەرگە قاتىستى قابىلدانعان شەشىمدەردى پرەزيدەنت اكىمشىلىگىنە ۇسىناتىنىن ايتقان ت. بايعۇلوۆ اۋدان اكىمدەرىنەن ورتالىق اۋىلدىق وكرۋگتەردە سەرۆيستىك اكىمدىكتەردىڭ اشىلۋىن قامتاماسىز ەتىپ, ولاردىڭ جۇمىس ساپاسىن كۇشەيتۋدى سۇرادى.