قوستاناي وبلىسىنىڭ اۋليەكول اۋدانىنا قاراستى تيموفەەۆ اۋىلىندا مەكتەپ جانىنان جۇمىس ىستەپ جاتقان شاعىن ورتالىق اسحاناسىنان تاماق ىشكەن 11 ادام ۋلانىپ, اۋرۋحاناعا ءتۇستى. تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى وكىلدەرىنىڭ ايتۋىنشا, ۋلانعانداردىڭ ىشىندە ءتورت ەرەسەك ادام, جەتى بالا بار, دەپ حابارلايدى Egemen.kz.
وقيعا 11 قىركۇيەكتە بولعان. دەپارتامەنت ماماندارى سول كۇنى تيموفەەۆكە شۇعىل جەتىپ, ۇشىنعان بالالار مەن ولاردىڭ اتا-انالارىنان جاۋاپ العان.
سونداي-اق شاعىن ورتالىقتىڭ اسحاناسىن تەكسەرىپ, جۋىندىدان تالداۋ الىپ, ونى ازىق-ت ۇلىك جانە اۋىز سۋ زەرتحاناسىنا جونەلتكەن. سانيتارلىق دارىگەرلەردىڭ بولجاۋىنشا, ەرەسەكتەر دە, بالالار دا استان ۋلانعان. تيموفەەۆ اۋىلىنداعى ءبىلىم وشاعى شاعىن كەشەندى مەكتەپ ساناتىنا كىرەدى. سوندىقتان مۇنداعى بالالار قازىر ۇيدە ونلاين ارقىلى ەمەس, مەكتەپ قابىرعاسىندا ءبىلىم الىپ جاتىر. سول كۇنى شاعىن ورتالىقتا 14 بالا بولعان. اس ءىشىپ شىققان سوڭ ولاردىڭ تەڭ جارتىسىنىڭ جۇرەگى اينىپ, قىزۋى كوتەرىلە باستاعان. قالعان بالالاردان دەنساۋلىعىنا بايلانىستى ەش شاعىم تۇسپەگەن. دارىگەرلەردىڭ سوزىنشە, قازىر ناۋقاستاردىڭ جاي-كۇيى ورتاشا, بىراق تۇراقتى. استان ۋلانىپ اۋرۋحانا توسەگىنە تاڭىلعان 11 ناۋقاسقا العاش جەدەل گاستروەنتەروكوليت دەگەن دياگنوز قويىلعان. الايدا زەرتحانالىق تالداۋ ناتيجەلەرى 9 ناۋقاستىڭ ىشەك جولدارى قابىنعانىن انىقتاپ وتىر.
قازىر مەكتەپ اسحاناسى جابىق. وبلىستىق پوليتسيا دەپارتامەنتى مەكتەپتەگى سانيتارلىق ەرەجەلەر مەن گيگيەنالىق نورماتيۆتەردىڭ ساقتالماۋىنا بايلانىستى قىلمىستىق ءىس قوزعاپ, سوتقا دەيىنگى تەرگەۋ جۇرگىزىپ جاتىر.
قوستاناي وبلىسى