ءدان ەگىپ, تەر توككەن ديقانشىلار كۇن رايىنىڭ الا بۇلتتانىپ, وقتىن-وقتىن جاڭبىر سەبەلەپ تۇرعانىنا قاراماستان, قىرمان باسىندا دامىلسىز ەڭبەكتەنۋدە. شىعىس قازاقستاننىڭ ءار وڭىرىندە كۇزگى وراق ناۋقانى قارقىندى ءجۇرىپ جاتىر.
جەر تويماي, ەل تويمايدى دەمەي مە؟! بيىل كوكتەم مەن جازدا توپىراقتاعى ىلعال تومەن بولعاندىقتان, ءونىم كولەمى دە بىلتىرعىمەن سالىستىرعاندا ءسال ازداۋ. قازىرگى ۋاقىتتا وبلىس بويىنشا گەكتارىنان 11,8 تسەنتنەر استىق جينالسا, بىلتىر ءدال وسى ۋاقىتتا 18 تسەنتنەر ەدى.
شارۋالاردىڭ باسىم كوپشىلىگى ەگىستىك القاپتارىنا جوعارى سۇرىپتى تۇقىم ەگىپ, الا جازداي كۇتتى, بارىنشا باپتادى. شوجەنى كۇزدە سانا دەمەكشى, جيىن-تەرىن ۋاقىتى اياقتالعان سوڭ ناقتى ناتيجەنى كورسەتەدى. ال ازىرشە ءۇرجار اۋدانىندا عانا وراق ورۋ 99 پايىز ناۋقانى اياقتالدى. ءۇرجار شىعىستىڭ وڭتۇستىگىندە جاتقاندىقتان كوكتەم ەرتە شىعىپ, ءدانى ەرتە پىسەدى. بۇل جاقتا ءداندى داقىلدار القابى 60 مىڭ گەكتاردى قۇراسا, ونىڭ 8800 گەكتارى كۇزدىك بيداي. ءۇرجار اۋداندىق اۋىلشارۋاشىلىق ءبولىمىنىڭ باسشىسى ەرزات بولات ۇلىنىڭ ايتۋىنشا, كۇزدىك بيدايدى بيىل 10 گەكتارعا جەتكىزۋدى جوسپارلاپ وتىر.
سونىمەن قاتار بەسقاراعاي, كوكپەكتى, ريددەر وڭىرلەرىندەگى شارۋالار دا كۇزگى ءونىم جيناۋدى ويداعىداي اياقتاپ كەلەدى.
ال قىسى التى ايعا سوزىلاتىن كاتونقاراعاي وڭىرىندە جەمشوپ داقىلدارى 23,3 مىڭ گەكتار القاپتى الىپ جاتىر. بولجام بويىنشا, شارۋا قوجالىقتارىنىڭ مالىن قىستان الىپ شىعۋ ءۇشىن 166 مىڭ توننا ءشوپ, 6 مىڭ توننا سەناج, 7,5 مىڭ توننا سۇرلەم, 15 مىڭ توننا سابان جانە 5,1 مىڭ توننا كونتسەنتراتتالعان جەم دايارلاۋ قاجەت ەكەن. قازىرگى ۋاقىتتا اۋدان اۋىلشارۋاشىلىق تاۋاروندىرۋشىلەرى 93,8 مىڭ توننا ءشوپ دايارلادى. قويماعا 6 مىڭ توننا پىشەندەمە توگىلىپ, جوسپاردىڭ 100 پايىزى ورىندالدى.
قارى قالىڭ, قىسى قاتتى تاۋلى ولكەدە مالدى تەبىنمەن شىعارۋ مۇمكىن ەمەس. سوندىقتان دا شارۋالار جازدىڭ ءبىر كۇنى قىستىڭ مىڭ كۇنىن اسىرايدى دەپ كوك شالعىنعا شالعى سالاتىن. وكىنىشكە قاراي, بيىل جاۋىن-شاشىن از ءتۇسىپ, ءشوپ سۇيىق شىققان. بۇل تىعىرىقتان شىعۋ ءۇشىن اۋداننىڭ ءىرى شارۋاشىلىقتارىنان ارتىلعان شابىندىقتى تەگىن شاۋىپ الۋ جونىندە كەلىسىم جاساسقان. ناتيجەسىندە نوۆوپولياكوۆكا جانە اقسۋ اۋىلدىق وكرۋگتەرىندەگى قوجالىق باسشىلارى 10 مىڭ گەكتاردان استام شابىندىق القاپتارىن شاۋىپ الۋعا ۇسىندى. سونداي-اق جەمشوپ داقىلدارىن اۋدان اۋماعىندا ساتۋ بويىنشا بيلىك وكىلدەرىمەن كەلىسسوزدەر جۇرگىزىلدى. اۋدان اۋماعىندا ورتا ەسەپپەن ءبىر وراما ءشوپ 8 مىڭ تەڭگەدەن. بۇل قاراپايىم تۇرعىندار ءۇشىن دە ءتيىمدى بولماق.
شىعىس قازاقستان وبلىسى