«Atamnyn Amanaty» قوعامدىق بىرلەستىگى كەڭەس وداعىنىڭ باتىرى مانشۇك مامەتوۆا اتىنداعى ىزدەۋ توبىمەن بىرلەسە وتىرىپ باتىس قازاقستان وبلىسى اۋماعىندا ەكىنشى دۇنيەجۇزىلىك سوعىس جىلدارى قازا بولعان تىنىق مۇحيتى فلوتىنىڭ تەڭىز جاياۋ اسكەرى مەن بەيبىت تۇرعىنداردىڭ سۇيەكتەرىن ىزدەۋگە باعىتتالعان ارحەولوگيالىق قازبا جۇمىستارىن جۇرگىزۋدە.
اۋەلى مانشۇك مامەتوۆا اتىنداعى ىزدەۋ توبىنان سايقىن اۋىلى ماڭىندا تىنىق مۇحيتى فلوتىنىڭ تەڭىز جاياۋ اسكەرىنىڭ سۇيەكتەرى تابىلدى دەگەن اقپارات كەلدى. ولار 1942 جىلدىڭ قازان ايىندا باتىس قازاقستان وبلىسىنىڭ اۋماعىنا اسكەر بولىمدەرىنىڭ ورنالاسۋى بارىسىندا قازا بولعان.
2015 جانە 2017 جىلدارى جەرگىلىكتى ىزدەۋشىلەر توپتارىنىڭ كومەگىمەن باتىس قازاقستان وبلىسىندا قازا بولعانداردىڭ سۇيەكتەرى تابىلىپ, بوكەي وردا اۋدانى, سايقىن اۋىلىندا جەرلەنگەن. رەسمي دەرەكتەر بويىنشا 38 تەڭىز جاياۋ اسكەرى بولعان. قازىرگى تاڭدا 17 جاۋىنگەردىڭ سۇيەگى تابىلىپ, جەرلەنگەن.
ء«ىز-ءتۇزسىز بولىپ ەسەپتەلەتىن, سۇيەكتەرى تابىلماعان سولداتتار مەن بەيبىت تۇرعىندار ءالى دە كوپ. وسى ورايدا باتىس قازاقستان وبلىسىنىڭ اۋماعىندا «Atamnyn Amanaty» قوعامدىق بىرلەستىگى جانە مانشۇك مامەتوۆا اتىنداعى ىزدەۋ توبىنىڭ كۇشىمەن 14 كۇنگە سوزىلاتىن قازبا جۇمىستارىن وتكىزۋ تۋرالى شەشىم قابىلداندى», دەيدى «Atamnyn Amanaty» قوعامدىق بىرلەستىگىنىڭ باسقارما توراعاسى مۇرات مولداعاليەۆ.
بۇل ايماق سوعىس جىلدارى مايدانعا جاقىن اۋماق بولىپ ەسەپتەلگەن. كوپ مارتە بومبالانعان. استراحان – ساراتوۆ تەمىرجولى بويىندا 40-50 باۋىرلاستار زيراتى بار. بۇل جول ارقىلى قارۋ-جاراق, ءدارى-دارمەك تاسىمالدايتىن ەشەلوندار وتەتىن. ءدال وسى فاكت بومبالاۋعا سەبەپ بولعان. سول جىلدارى جاۋىنگەرلەر مەن بىرگە جەرگىلىكتى تۇرعىندار دا قازا بولدى.
قازاقستانداعى رەسەي فەدەراتسياسىنىڭ جانە ۋكراينانىڭ ەلشىلىكتەرىنە سول مەملەكەتتەردىڭ اۋماعىنان سوعىسقا كەتكەن سولداتتاردىڭ سۇيەكتەرىن ىزدەۋ جۇمىستارى تۋرالى حابارلاندىرۋ جىبەرىلدى.