راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ 140-تان استام كۋرسانتى العاش رەت ونلاين رەجيمدە وتان الدىندا ادال بولۋعا انت قابىلدادى, دەپ حابارلايدى Egemen.kz.
اتالعان فورماتتاعى انت قابىلداۋ ءراسىمى سانيتارلىق-گيگيەنالىق تالاپتاردى ساقتاۋ ماقساتىندا ۇيىمداستىرىلعان. سالتاناتتى شارا اسكەري ينستيتۋتتىڭ رەسمي سايتىندا جانە ينستاگرام اككاۋنتىندا كورسەتىلدى. اسكەري ومىرگە جاڭادان قادام باسقان پەرزەنتتەرى ءۇشىن ماڭىزدى ءساتتى اتا-انالارى ونلاين-كورسەتىلىم ارقىلى تاماشالادى.
راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ باستىعى گەنەرال-مايور اسقار مۇستابەكوۆ اسكەري انتتىڭ اسكەري قىزمەتشىلەر ءۇشىن قانشالىقتى ماڭىزدى ەكەنىنە توقتالا كەلە, الداعى وقۋ جىلىنا ساتتىلىك تىلەدى.
"اسكەري قىزمەتشىنىڭ ساياسي-مورالدىق, جاۋىنگەرلىك قاسيەتتەرى – اسكەري انتقا ادال بولۋى, ەرجۇرەكتىگى مەن قىراعىلىعى. انت قابىلداعان كەزدە جاۋىنگەر باتىل بولۋعا انت بەرەدى. باتىلدىق, ەرلىك دەگەنىمىز – جاۋىنگەردىڭ ەڭ قيىن, قاۋىپتى جاعدايلاردا دا ءوز ءومىرى ءۇشىن قورقىنىش سەزىمىن جەڭىپ, ءوز وتانىن قورعاۋ ءۇشىن ەرلىك جاساۋعا بارعانى", دەدى اسكەري وقۋ مەكەمەسىنىڭ باسشىسى.
اسكەري ينستيتۋتتىڭ تىزىمىنە قابىلدانعاننان كەيىن كۋرسانتتار ءبىر اي بويى باستاپقى اسكەري دايىندىقتان ءوتىپ, اتۋ, ساپتىق جانە دەنە دايىندىعىن جەتىلدىردى, جالپىاسكەري جارعىلاردى مەڭگەردى. كۋرسانتتار العاشقى كۇننەن-اق اسكەري ومىرگە بەيىمدەلىپ, ساباققا دەگەن ەرەكشە ىقىلاس پەن ىنتا-جىگەرلەرىن كورسەتە باستادى, دەپ حابارلايدى رەجباي ءباسپاسوز قىزمەتى.
"بۇگىن ءبىز ءۇشىن ەرەكشە قۋانىشتى جانە سالتاناتتى كۇن! اسكەري انت قابىلداپ, وتان قورعاۋشى دەگەن مارتەبەگە يە بولدىق. «كۋرسانت» دەگەن ابىرويلى اتقا لايىق, انتىما ادال بولاتىنىما سەنىمدىمىن", دەدى ءوز قۋانىشىمەن بولىسكەن 1 كۋرس كۋرسانتى ءجانادىل قامباروۆ.
انت قابىلداعان ساتتەن باستاپ جاس كۋرسانتتار قر قارۋلى كۇشتەرىنىڭ قاتارىنا ەنىپ, ولارعا وتان قورعاۋ جاۋاپكەرشىلىگى جۇكتەلەدى. جاس كۋرسانتتار قازاقستاننىڭ ءار ايماعىنان جانە تمد مەملەكەتتەرىنەن ءبىلىم الۋعا كەلگەن.