حرومتاۋ اۋدانىنىڭ «اقجار» اۋىلدىق وكرۋگى اۋماعىندا ورنالاسقان «ايدارلىاشا» گەولوگيالىق قيماسى – تاريحي تۋريزمگە سۇرانىپ-اق تۇرعان جەر. جازىق دالانىڭ بويىندا 1500 مەترگە دەيىن سوزىلىپ جاتقان قىراتتى القاپ تۇڭعىش رەت 1950 جىلدارى گەولوگتار نازارىن وزىنە اۋدارعان. قاتپار-قاتپار قاباتتاردىڭ جەراستى تاقتايشالارىنىڭ ءبىر-بىرىمەن سوقتىعىسۋى سالدارىنان جەر بەتىنە كوتەرىلگەن شاعىن عانا بولىگى, تىرشىلىك جارالعانداعى الەمدىك مۇحيتتىڭ تابانى ەكەنىن اقتوبەلىك گەولوگ-بارلاۋشى روستيسلاۆ سيگەلدين سول جىلدارى انىقتاپ بەردى.
ويتكەنى قيما قاتپارلارىنان 350 ميلليون جىل بۇرىن كاربون كەزەڭىنىڭ سوڭى مەن پەرم كەزەڭىنىڭ باسىندا تىرشىلىك ەتكەن جاندىكتەردىڭ قالدىقتارى مەن وسىمدىكتەر تاڭبالارى تابىلدى. ۇلۋ قابىرشاقتارى, ومىرتقالى جانە ومىرتقاسىز جاندىكتىڭ قاڭقالارى, تاستا تاڭبالانعان تابيعاتى بەلگىسىز وسىمدىكتەر, ءتىرى اعزالار – بەريميتتەر, ومونيتتەر قالدىقتارىن 1970 جىلدارى اقتوبە وبلىستىق ولكەتانۋ مۋزەيىن باسقارعان رىسجان ءىلياسوۆا مۋزەي قورىنا جيناقتاپ, بەليمەنتتەر, گريفەيا-ۇلۋ, ۇلۋتاس جادىگەرلەرىنەن ەكسپوزيتسيا جاساقتادى. ايدارلىاشا قيماسى قازاقستاننىڭ كيەلى جەرلەر كارتاسىنا ەنگىزىلگەلى بەرى بۇل جاققا تۋريستەر قارقىندى تۇردە كەلە باستادى. قازىرگى كەزدە حرومتاۋ اۋدانىنىڭ باسشىلىعى وسى كيەلى مەكەندى اشىق اسپان استىنداعى مۇراجايعا اينالدىرۋدى قولعا الىپ جاتىر. جاقىندا ۇعا كوررەسپوندەنت-مۇشەسى, تاريح عىلىمدارىنىڭ دوكتورى جاكەن تايماعامبەتوۆ باستاعان ءبىر توپ عالىم كەلىپ, ايدارلىاشا قيماسىن گەولوگتار مەن پالەنتولوگتار قوسىلىپ كەشەندى تۇردە زەرتتەۋ كەرەك دەگەن قورىتىندىعا كەلدى. «ايدارلىاشا گەولوگيالىق قيماسىنىڭ ەڭ ەجەلگى سىنىقتارى تەرەڭدە جاتىر. تەكتونيكالىق قوزعالىستىڭ اسەرىنەن قابات جوعارى كوتەرىلىپ كەتكەندە, ادامزات جاراتىلماستان بۇرىن الەمدىك مۇحيتتا تىرشىلىك ەتكەن قوسمەكەندىلەر, بالىقتار, ومىرتقالى جانە ومىرتقاسىز جاندىكتەردىڭ مۇحيت تۇبىنە شوككەن قالدىقتارى جەر بەتىنە شىعىپ قالعان. بۇل – وتە سيرەك قۇبىلىس», دەيدى تاريح عىلىمدارىنىڭ دوكتورى جاكەن تايماعامبەتوۆ.
اقتوبە وبلىسى