ايماقتىق كوممۋنيكاتسيالار قىزمەتى الاڭىندا پرەزيدەنت جولداۋى اياسىندا كاسىپكەرلىكتى قولداۋ ماسەلەسىنە وراي الماتى قالاسى كاسىپكەرلىك جانە ينۆەستيتسيالار باسقارماسىنىڭ باسشىسى ەركەبۇلان ورازالين اعىمداعى جۇمىستارمەن تانىستىردى, دەپ حابارلايدى Egemen.kz.
"مەملەكەت باسشىسى ق.ك. توقاەۆ جولداۋىندا شاعىن جانە ورتا بيزنەستى جان-جاقتى قولداۋ جانە پاندەميانىڭ جاعىمسىز ەكونوميكالىق سالدارىن ەڭسەرۋ ءۇشىن بارلىق قاجەتتى شارالار قابىلداۋ ماسەلەلەرىنە ەرەكشە نازار اۋداردى.
پرەزيدەنت ءوزىنىڭ سوزىندە بىرقاتار باستامالاردى اتاپ ءوتتى, ونىڭ شەڭبەرىندە ءبىزدىڭ ءارى قارايعى جۇمىسىمىز قالىپتاسادى", دەپ اتاپ وتكەن ە.ورازالين قازىرگى ۋاقىتتا پاندەميانىڭ سەبەبىنەن قالىپتاسقان اسا جاعىمسىز جاعداي قىزمەت كورسەتۋ سالاسى مەن ساۋدا سالاسىنا اسەرىن تيگىزگەندىگىنە توقتالدى.
كوتەرمە-بولشەك ساۋدانىڭ ناقتى كولەمىنىڭ يندەكسى اعىمداعى جىلعى قاڭتار-شىلدە ايلارىنىڭ ىشىندە – 84%-دى قۇرادى (انىقتاما ءۇشىن: اعىمداعى جىلعى قاڭتار-شىلدە ايلارىنىڭ ىشىندە بولشەك ساۋدا كولەمى 1 643,8 ملرد. تەڭگەنى, ناقتى كولەمىنىڭ يندەكسى – 81,2%-دى, قاڭتار-شىلدە ايلارىندا كوتەرمە ساۋدا تاۋار اينالىمىنىڭ كولەمى 5 143,1 ملرد. تەڭگەنى, ناقتى كولەمىنىڭ يندەكسى – 86,3%-دى قۇرادى).
ە.ورازالين ءوز سوزىندە "بۇدان باسقا, كولىك جانە قويمالاۋ, تاماقتانۋ جانە قوناق ءۇي بويىنشا كورسەتىلەتىن قىزمەتتەر, بيزنەس, تۋريزم, ويىن-ساۋىق جانە دەمالىس بويىنشا كورسەتىلەتىن قىزمەتتەر سەكىلدى سالالاردا جاعدايدىڭ ناشارلاعانى بايقالادى.
توتەنشە جاعداي مەن كارانتين رەجىمى باستالعالى بەرى, ەكونوميكالىق جاعدايدى تۇراقتاندىرۋ ءۇشىن, الماتى قالاسىنىڭ اكىمدىگى جۇمىس ورىندارى مەن كاسىپكەرلىك سۋبەكتىلەرىن بارىنشا ساقتاۋعا باعىتتالعان قولداۋدىڭ بىرقاتار نەگىزگى شارالارىن قابىلدادى" دەپ اتاپ ءوتتى.