بۇگىنگى تاڭدا تۇركىستان وبلىسىندا ەپيدەميالىق جاعداي تۇراقتى. ءبىر كۇندىك ءوسىم 0,1 پايىزدى قۇراپ, اۋرۋشاڭدىق كورسەتكىشى تومەندەگەن. دەگەنمەن وبلىستىڭ بارلىق مەديتسينالىق مەكەمەلەرىندە كوروناۆيرۋستىق ينفەكتسيامەن كۇرەس جۇمىستارى بەكىتىلىپ, ەكىنشى تولقىنىنا دايىندىق جۇمىستارى جۇرگىزىلۋدە. وبلىستىق قوعامدىق دەنساۋلىق باسقارماسىنىڭ مالىمەتىنشە, بۇل ماقساتتا جەرگىلىكتى بيۋدجەت پەن گۋمانيتارلىق كومەك ارقىلى 800-گە جۋىق وتتەگى كونتسەنتراتورى الىنعان. قارقىندى تەراپيا پالاتالارى 1,5 مىڭعا جۋىق وتتەگى نۇكتەلەرىمەن جاساقتالعان.
ەپيدەميالىق جاعداي ەسكەرىلە وتىرىپ, وبلىستىڭ مەديتسينالىق ۇيىمدارى مەن «سق-فارماتسيا» جشس-ى اراسىندا دارىلىك زاتتار مەن مەديتسينالىق بۇيىمداردى جەتكىزىپ بەرۋگە قوسىمشا كەلىسىمشارتتار جاسالعان. ماماندار قازىردىڭ وزىندە 2 ايعا جەتەتىن جەكە قورعانىس قۇرالدارىمەن قامتاماسىز ەتىلدى. تۇركيا ەلىنەن ساتىپ الىنىپ, جەتكىزىلگەن دارىلىك زاتتار ىشىندە وسەلتاميۆير, ازيتروميتسين, ەنوكسيپارين, ريۆاروكسابان, مەروپەنەم, روكۋرونيا بروميد سەكىلدى 140 مىڭ دانا پرەپارات بار. ايتا كەتەلىك, 253 ملن تەڭگەگە الىنعان ءدارى-دارمەك لەگى ينفەكتسيامەن كۇرەستە قۇرىلعان وبلىستىق ارنايى قورعا جەتكىزىلىپ, قويمادا ساقتالادى.
«وبلىس اكىمى ومىرزاق شوكەەۆتىڭ تاپسىرماسىنا سايكەس, اۋرۋحانالار مەن ءدارىحانالاردا ءدارى-دارمەك قورى تولىقتىرىلۋدا. انتيكواگۋليانتتار, انتيبيوتيكتەر جانە وكپەنى جاساندى جەلدەتۋ كەزەڭىندە ناۋقاستىڭ جاعدايىن جەڭىلدەتۋگە ارنالعان پرەپاراتتار جەتكىزىلگەن. اتالعان دارىلىك زاتتار 2023 جىلعا دەيىن جارامدى. كۇزدە كوروناۆيرۋستىڭ ەكىنشى تولقىنى ءوتۋى مۇمكىن دەگەن بولجام بار. سول سەبەپتى ءبىز ارنايى دارىلىك قور جاساقتادىق», دەيدى قوعامدىق دەنساۋلىق باسقارماسىنىڭ باسشىسى مارات پاشيموۆ.
سونداي-اق وڭىردە تاۋلىكتىك قۋاتى 3 مىڭعا جۋىق سىنامانى قۇرايتىن 12 زەرتحانا جۇمىس ىستەۋدە. بۇگىنگە دەيىن 130 مىڭنان استام ادام تەست تاپسىرعان. بيىل 30 ناۋرىزدان باستاپ 8 قىركۇيەككە دەيىن COVID-19 راستالعان ناۋقاستار سانى – 3343. ناۋقاستاردىڭ 96 پايىزى, ياعني 3210-ى جازىلىپ شىقتى. ونىڭ ىشىندە سيمپتومسىز جاعدايداعى 2244 ادام تولىق ساۋىقتى.
قوعامدىق دەنساۋلىق باسقارماسى حابارلاعانداي, كوروناۆيرۋسقا قارسى ەمدەۋ شارالارى ءۇشىن دەنساۋلىق ساقتاۋ مينيسترلىگىنىڭ تاپسىرماسىنا سايكەس ينفەكتسيالىق ستاتسيونارلاردا 600 توسەكتىك ورىن اشىلىپ, پروۆيزورلىق ستاتسيونارلار جابىلعان.
«كوروناۆيرۋس جانە پنەۆمونيا ىندەتتەرىمەن كۇرەسۋ ماقساتىندا العاشقى مەديتسينالىق-سانيتارلىق كومەك كورسەتەتىن ۇيىمداردا قۇرامىندا دارىگەر مەن ورتا بۋىن مەديتسينا قىزمەتكەرلەرى جۇمىلدىرىلعان 380 ءموبيلدى توپ جۇمىس ىستەۋدە. سونداي-اق مەديتسينالىق ۇيىمداردا اشىلعان 20 Call-ورتالىقتارى تۇرعىندار تاراپىنان تۋىنداعان سۇراقتارعا جاۋاپ بەرىپ, وزەكتى ماسەلەلەر بويىنشا ءتۇسىندىرۋ جۇمىستارىن جۇرگىزۋدە. قارقىندى تەراپيا پالاتالارىنىڭ وكسيگەنوتەراپيامەن قامتىلۋى 1321 وتتەگى نۇكتەلەرىن قۇرايدى. مەديتسينالىق ۇيىمداردى سونداي-اق, قوسىمشا وكپەنى جاساندى جەلدەتۋ اپپاراتتارىمەن تولىقتىرىپ, جالپى سانىن 348-گە جەتكىزۋ جوسپارلانۋدا. تۇركىستان قالاسىندا 200 ورىنعا ەسەپتەلگەن ءمودۋلدى جۇقپالى اۋرۋلار اۋرۋحاناسى بوي كوتەرەدى. ىندەتتىڭ ورشۋىنە بايلانىستى «ساقتانساڭ – ساقتايدى» دەگەن ءتامسىل سوڭعى ۋاقىتتا حالىق اراسىندا ءجيى ايتىلادى. سوندىقتان ءبىز دە كوپشىلىككە ساقتانعاننىڭ سان سوقپايتىنىن ايتىپ, بارلىق تالاپتاردى ورىنداۋىن ۇنەمى ەسكەرتىپ وتىرامىز», دەيدى باسقارما باسشىسى مارات پاشيموۆ.
تاعى ءبىر ايتا كەتەر جاڭالىق – وبلىستاعى مەديتسينالىق جەدەل-جاردەم قىزمەتىنىڭ جۇمىسىن جەڭىلدەتۋ ماقساتىندا «كاسپي بانك» جانە «سامۇرىق-قازىنا» ۇلتتىق ءال-اۋقات قورى اق-ى گۋمانيتارلىق كومەك رەتىندە 20 «Chevrolet Damas» كولىگىن تارتۋ ەتۋدە. ءپورتاتيۆتى جاساندى وكپە جەلدەتكىشى, دەفيبريللياتور, پۋلسوكسيمەتر, ەكگ قۇرىلعىسى ورناتىلعان مەديتسينالىق جەدەل-جاردەم كولىكتەرى وبلىستاعى اۋدان, قالالاردىڭ اۋرۋحانالارىنا بەرىلەدى.
تۇركىستان وبلىسى