جۋىردا «ANTIKOR LIVE» جوباسى اياسىندا «شىعىس – ادالدىق الاڭى» جوبالىق كەڭسەسىنىڭ ۇيىمداستىرۋىمەن «جاڭا وقۋ جىلىنا ساتىپ الىنعان كومپيۋتەرلەردى ءبولۋ اشىقتىعى» تاقىرىبىندا تىكەلەي ەفير ءوتتى.
مەكتەپتەگى كومپيۋتەرلىك تەحنيكا وبلىس وقۋشىلارى مەن پەداگوگتەرىنە ۋاقىتشا پايدالانۋعا بەرىلەدى. بۇل تۋرالى «Antikor Ortalygy» سەرۆيستىك ورتالىعىندا وتكەن تىكەلەي ەفيردە وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆا حابارلادى. ونىڭ مالىمەتىنشە, ءوڭىر وقۋشىلارىن قاشىقتان وقىتۋ ءۇشىن رەسپۋبليكالىق بيۋدجەتتەن 26 مىڭنان استام نوۋتبۋك, كومپيۋتەر جانە پلانشەت ساتىپ الۋعا 4,1 ملرد تەڭگە قاراجات بولىنگەن.
– بۇگىندە ءبىز 550 بىرلىك تەحنيكا الدىق. ونىڭ ونلاين وقىتۋعا قاجەتتى سيپاتتامالارعا سايكەستىگىن تەكسەرۋ ءۇشىن ءىت-تەحنولوگيالاردىڭ جەتەكشى ماماندارى تارتىلاتىن بولادى. وبلىس وقۋشىلارى مەن مۇعالىمدەرىن كومپيۋتەرلىك تەحنيكامەن قامتاماسىز ەتۋ ءراسىمى 15 تامىزدان باستالدى. ءبىرىنشى كەزەكتە حالىقتىڭ الەۋمەتتىك وسال توپتارىنىڭ وقۋشىلارى, سونداي-اق وقۋ وزاتتارى قامتاماسىز ەتىلەدى, – دەپ اتاپ ءوتتى س.ءجۇمادىلوۆا.
بۇگىندە وبلىستا ۇيدە كومپيۋتەرلىك تەحنيكاسى جوق 23 مىڭنان استام وقۋشى بار. ولاردىڭ بارلىعى قاجەتتى جابدىقتارمەن قامتاماسىز ەتىلەدى. قالعان 3 مىڭعا جۋىق كومپيۋتەر مەن پلانشەت تەحنيكاسى ەسكىرگەن مەكتەپتەرگە تاراتىلادى. بۇل ۇدەرىستىڭ اشىقتىعىن ايماقتىق سىبايلاس جەمقورلىققا قارسى ءىس-قيمىل دەپارتامەنتى مەن «شىعىس – ادالدىق الاڭى» جوبالىق كەڭسەسىنىڭ وكىلدەرى كىرەتىن ارنايى جۇمىس كوميسسياسى قامتاماسىز ەتەتىن بولادى.
وسكەمەن