قىزىلوردا وبلىستىق جاستار ورتالىعىنىڭ جانىنان قۇرىلعان «ۆولونتەرلەردىڭ فرونت-ءوفيسى» قازىر «Bilim», «Say’lyq», «Sabaqtastyq», «Taza Alem», «Asyl mura», «Qamqor», «Umit» باعىتتارى بويىنشا جۇمىس ىستەۋدە. شتاب قۇرامىندا 695 ەرىكتى بار. سونىمەن قاتار جاستار باستاماسىمەن «قۇقىقتىق كەڭەس», «ارداگەرلەردى ارداقتايىق!», «ىزدەستىرۋ» جانە تاعى دا باسقا اكتسيالار مەن ۆولونتەرلىك قوزعالىستار ۇيىمداستىرىلىپ تۇرادى.
جاقىنعا جاناشىرلىق تانىتاتىن شارالاردىڭ بەل ورتاسىندا جۇرەتىن ۆولونتەرلەر ىندەت ءورشىپ تۇرعان ساتتە كوپتەن كومەگىن اياپ قالعان جوق. جۇدىرىقتاي جۇمىلىپ, بىرلەسكەن ىستە بەرەكە بارىن دالەلدەدى. ابدىراعان ەلدىڭ اراسىنان تابىلىپ, بەتپەردە, انتيسەپتيكالىق قۇرالدار, اۋرۋدان ساقتانۋ شارالارى جازىلعان ۇنپاراقتار تاراتتى.
جاستار ورتالىعى جانىنان اشىلعان الەۋمەتتىك دۇكەنگە تۇرعىنداردان جينالعان ۆيرۋسقا قارسى ءدارى-دارمەكتەر جەتكىزىلدى. باستاپقى كەزەڭدە ءدارىحانالاردا تاپشى بولعان پاراتسەتامول, س ءۆيتامينى, دەكسامەتازون, ديسول, ناتري ءحلوريدى, ەۋفيللين, تاعى دا باسقا پرەپاراتتار قايىرىمدىلىق اكتسياسى اياسىندا ۇلەستىرىلدى. دەرتى جانىنا باتقانىمەن ءدارىحانا ارالاۋعا دارمەنى جوق جاندارعا ورتالىقتاعى اۆتوۆولونتەرلەر ءدارى-دارمەكتى جەتكىزىپ بەردى. بۇل ىسكە وبلىس ورتالىعىنان 20-عا جۋىق تۇرعىن اتسالىسىپ, جاقسىلىققا جۇمىلدى. ەرىكتىلەردىڭ باستاماسىنا ءۇن قوسقان جاستار قالا مەن اۋدانداردا كوپبالالى وتباسىلاردىڭ, جالعىزىلىكتى انالاردىڭ ءتىزىمىن جاساقتاپ, ولارعا ءبىرىنشى كەزەكتە قاجەتتى ونىمدەر تاراتىلدى.
جاستار «كۆانت» جشس مەكەمەسىنەن اۋرۋحانالارعا وتتەگى باللوندارىن جەتكىزۋدى دە جۇيەلى ۇيىمداستىردى. دەرتكە شالدىققاندار قاتارى كۇن ساناپ كوبەيگەن تۇستا وبلىستىق جۇقپالى اۋرۋلار, تەمىر جول, وبلىستىق وكپە اۋرۋلارى اۋرۋحاناسىنا جانە پروۆيزورلىق ورتالىقتارعا 60 باللون جەتكىزىلىپ, ەرىكتىلەر ءبىر جۇتىم اۋاعا زار بولىپ جاتقان تالايلاردىڭ العىسىن الدى.
اۋرۋدىڭ بەتى قايتقان قازىرگى ساتتە دە سىر ۆولونتەرلەرى قايىرىمدىلىق شارالارىن ۇزگەن جوق. جاقىندا ورتالىقتاعى ءىت پاركتىڭ بازاسىندا تۇرعىنداردان ىستەن شىققان كومپيۋتەرلەردى قابىلداۋ باستالدى. ماماندار ونداعى قاجەتتى بولشەكتەردەن ىسكە جارامدى كومپيۋتەر قۇراستىرىپ, كومەككە ءزارۋ وتباسى بالالارىنا تاراتادى. قازىر جاستار 100-گە جۋىق كومپيۋتەر جيناپ ۇلگىردى. ورتالىق جانىنان ءبىلىم ورتالىعى اشىلىپ, 11-سىنىپ وقۋشىلارى ۇبت-عا تەگىن دايىندالۋعا مۇمكىندىك الدى, ولارعا قالاداعى مەكتەپ مۇعالىمدەرى ۆولونتەرلىك نەگىزدە قوسىمشا ساباقتار وتكىزەدى.
شىلدە ايىنىڭ سوڭىندا وبلىستىق ىشكى ساياسات باسقارماسى جانىنان ايماقتاعى ۆولونتەرلەردىڭ باسىن بىرىكتىرىپ, ءبىر تەرەزە قاعيداتى بويىنشا قىزمەت كورسەتەتىن «Syr Volonterlary» ورتالىعى اشىلدى. بۇل جۇرتقا جاقسىلىق جاساۋعا ۇمتىلعان ەرىكتىلەر قىزمەتىن ۇيلەستىرۋگە ىقپال ەتتى.
جاڭا وقۋ جىلىنىڭ باسىندا قينالعان جانعا قامقورلىق تانىتقان شارالار لەگى تاعى دا جالعاسىن تاپتى. قمدب-نىڭ قىزىلوردا وبلىسى بويىنشا وكىلدىگىنىڭ ۇيىمداستىرۋىمەن «مەكتەپكە جول» رەسپۋبليكالىق اكتسياسى اياسىندا 220 وقۋشىعا كومەك كورسەتىلدى. بۇل ىستەن باسقا دا دەمەۋشىلەر سىرت قالعان جوق. «قاۋىپسىز مەكتەپ ورتاسى» رەسپۋبليكالىق اكتسياسى اياسىندا دەمەۋشىلەر ەسەبىنەن تامىز ايىنىڭ ورتاسىنا دەيىن قىزىلوردا قالاسىنداعى مەكتەپتەردە وقيتىن 200-دەن استام وقۋشىعا كومپيۋتەر, پلانشەت, نوۋتبۋك, وقۋ قۇرالدارى جيىنتىعى تاراتىلدى.
وسىلايشا سىر بويىندا جۇرتقا جاقسىلىق جاساۋعا جۇمىلعان جاندار قاتارى كۇن ساناپ كوبەيىپ كەلەدى.
قىزىلوردا وبلىسى