كارانتين كەزىندە اۋىر حالدە اۋرۋحاناعا ءتۇسىپ, دارىگەرلەردىڭ جەدەل كومەك كورسەتۋىنىڭ ارقاسىندا امان-ەسەن ساۋىققان ناۋقاستار مەديتسينا قىزمەتكەرلەرىنە ريزاشىلىقتارىن بىلدىرە باستادى. وسى ۋاقىت ىشىندە الماتى قالاسى جەدەل شۇعىل كومەك كورسەتۋ اۋرۋحاناسىنىڭ دارىگەرلەرى اۋىر جاعدايداعى ونداعان كۇردەلى وتا جاساپ, ونىڭ ىشىندە وكپەسى تولىقتاي زاقىمدانعان ناۋقاستاردى دا ەمدەپ, امان الىپ قالدى, دەپ حابارلايدى Egemen.kz.
سونداي ناۋقاستاردىڭ اراسىندا وكپەسى اۋىرعان پروفەسسور نەسىپحان بەكتەنوۆ تا بولعان ەدى. - اكەم اۋىر جاعدايدا اۋرۋحاناعا جەتكىزىلىپ, جانساقتاۋ بولىمىنە ءتۇستى, - دەپ ناۋقاستىڭ قىزى سابينا جشككا سايتىنا جازدى. - ونىڭ ومىرىنە قاۋىپ ءتوندى, بىراق اۋرۋحانا دارىگەرلەرىنىڭ كاسىبي شەبەرلىگى, ادال جۇمىسى جانە بىلىكتىلىگى ارقاسىندا اكەم امان قالدى. ول ءبىر ايعا جۋىق اۋرۋحانادا جاتىپ, 17 كۇنىن جانساقتاۋ بولىمىندە وتكىزدى. مەن اكەمنىڭ ءومىرىن ساقتاپ قالعان بارلىق دارىگەرلەرگە, مەدبيكەلەرگە شىن جۇرەكتەن العىس ايتامىن.
جانساقتاۋ ءبولىمىنىڭ باستىعى تيمۋر رايىمجانوۆتىڭ ايتۋىنشا, ناۋقاس وتە اۋىر جاعدايدا تۇسكەنىن ەسكەرىپ, ماماندار وعان ءالى دە كەڭەس بەرىپ كەلەدى. «بارلىق مەديتسينا قىزمەتكەرلەرىنىڭ ۇيلەسىمدى جۇمىسىنىڭ ارقاسىندا امان الىپ قالدىق, بۇل ءبىزدىڭ اۋرۋحانانىڭ قالىپتاسقان ءداستۇرى عوي. ەمدەۋ ناۋقاستىڭ جاعدايىنا بايلانىستى ۇنەمى تۇزەتىلىپ وتىردى. ءبىز ناۋقاستاردى تاۋلىك بويى باقىلاپ وتىرامىز, كارانتيننىڭ ەرەكشە جاعدايلارىنا قاراماستان, دارىگەرلەر ءبىرىن-ءبىرى الماستىرادى, مەدبيكەلەر ۇنەمى باقىلاۋ جۇرگىزەدى, سانيتاركالار دا كومەكتەسەدى, قارقىندى تەراپيا كەزىندە ماسساج جاساۋ, ناۋقاستى اۋدارىپ وتىرۋ, ونى جالعىز قالدىرماۋ وتە ماڭىزدى, دەيدى تيمۋر رايىمجانوۆ.
- ارينە, كوپ نارسە مەديتسينا قىزمەتكەرلەرىنىڭ جۇمىسىنا بايلانىستى, بىراق ناۋقاستاردىڭ ومىرگە دەگەن ىنتاسى دا بايلانىستى ەكەنىن ۇمىتپاعانىمىز ءجون, - دەيدى حيرۋرگيا بولىمشەسىنىڭ مەڭگەرۋشىسى باحتيار بەكەشەۆ. - بۇل ناۋقاس وتە قيىن بولعان كۇننىڭ وزىندە دە بارىنشا ءپوزيتيۆتى كوڭىل-كۇيدە بولدى. ءبىز ادامداردى پسيحولوگيالىق تۇرعىدان قولداۋعا تىرىسامىز, بىراق ناۋقاستىڭ ءبارى قايتا جازىلىپ, اياقتان تۇرۋ ءۇشىن بارىن سالمايدى. نەسىپحان بەكتەنوۆتىڭ ءومىر سۇرۋگە دەگەن قۇلشىنىسى جوعارى بولدى, ول ءوزىن تاستامادى, سوندىقتان دا امان قالدى.
قازىر پروفەسسور ءوز ۇيىندە, اماندىعىنان ءۇمىتىن ۇزبەگەن جاقىندارىنىڭ قاسىندا بىرتە-بىرتە قالپىنا كەلۋدە. تولىق ساۋىعىپ كەتكەننەن كەيىن ونى ول ۇزاق جىلدار بويى ءدارىس بەرگەن ق.ساتباەۆ اتىنداعى قازۇتۋ-داعى ارىپتەستەرى مەن ستۋدەنتتەرى كۇتەدى. ال جەدەل شۇعىل كومەك كورسەتۋ اۋرۋحاناسى بۇرىنعى جۇمىس رەجىمىندە كوپسالالى قالالىق ەمحانا رەتىندە جۇمىسىن جالعاستىرۋدا.