ەكولوگيا مينيسترلىگى بالىق شارۋاشىلىعىنا سۋبسيديا بەرۋ ۇسىنىسىن قولدايدى

"ورال-اتىراۋ بەكىرە بالىق ءوسىرۋ زاۋىتى" رمكك-دەگى شاراعا اتىراۋ وبلىستىق اكىمدىك وكىلدەرى, "BD – بالىق شارۋاشىلىعى قاۋىمداستىعى" زتب, سالاداعى بىرنەشە كاسىپورىن باسشىلارى قاتىسىپ, بالىق شارۋاشىلىعىنداعى پروبلەمالار كوتەرىلدى.

مينيستر مىرزاعاليەۆ بالىق شارۋاشىلىعىندا ءوڭىردىڭ الاتىن ورنى ەرەكشە ەكەنىن, قازىر مەملەكەت تاراپىنان بۇل سالاعى كوپ كوڭىل ءبولىنىپ جاتقانىن اتاپ ءوتتى.

"قازاقستاندا اۋلاناتىن بالىقتىڭ وتىزعا جۋىق پايىزى (29,2 پايىز, 13,0 مىڭ توننا) وسى وبلىسقا تيەسىلى. كاسپيگە قۇياتىن ەكى ءىرى بالىق شارۋاشىلىعى سۋ ايدىندارى – جايىق پەن قيعاش وزەندەرىندە 20 تابيعات پايدالانۋشى ءوز كاسىپتەرىن ىسكە اسىرىپ جاتىر... بالىق وسىرۋمەن قاتار بالىق اۋلاۋدىڭ اتىراۋلىق بالىقشىلارعا ماڭىزدى ەكەنىن ءبىز ەسەپتەن شىعارمايمىز. اسىرەسە كاسپيدە تەڭىز بالىقتارى يگەرىلمەي جاتقانىن ەسكەرسەك, وڭىردە بالىق اۋلاۋ كولەمىن ودان دا ارتتىرۋعا بولادى.. وسى شارۋاشىلىقتىڭ دامۋىنا سەرپىن بەرەتىن ۇسىنىستار بولىپ جاتسا, ءبىز بىرلەسىپ قاراۋعا ءازىرمىز", - دەدى مينيستر.

جيىندا كاسىپكەرلەر سالىقتىق جەڭىلدىكتەر مەن سۋبسيديالاۋ بويىنشا ۇسىنىستار ءبىلدىردى. مينيستر بۇل باستامالاردى قولدايتىنىن جەتكىزدى.

"بۇل ماسەلەلەر قارجى, ۇلتتىق ەكونوميكا مينيسترلىكتەرى سياقتى باسقا دا  مۇددەلى مەملەكەتتىك ورگاندارمەن بىرلەسىپ قاراۋدى جانە كەلىسۋدى تالاپ ەتەدى. سوندىقتان ءبىز ءتيىستى وزگەرىستەر ەنگىزۋ ءۇشىن ءسىزدىڭ تاراپتان ناقتى ەسەپتەر (راسچەتى) مەن نەگىزدەمەلەر قاجەت. ورمان شارۋاشىلىعى جانە جانۋارلار دۇنيەسى كوميتەتىنە اتالعان ماسەلەلەردى سىزدەرمەن بىرلەسىپ قاراۋدى تاپسىرامىن. كوتەرىلگەن ماسەلەلەر وڭ شەشىمىن تاپقان جاعدايدا بالىق شارۋاشىلىعىنىڭ الەۋەتى كوتەرىلىپ, كاسىپكەرلەردىڭ جۇمىسى ودان ءارى جانداناتىنى ءسوزسىز", - دەدى م.مىرزاعاليەۆ.

مينيستر بارلىق جەرگىلىكتى بالىق شارۋاشىلىعى وكىلدەرىن 24 قىركۇيەكتە پرەمەر-مينيستر اسقار ءماميننىڭ قاتىسۋىمەن شاردارا قالاسىندا وتەتىن بالىق شارۋاشىلىعى بويىنشا رەسپۋبليكالىق سەمينارعا قاتىسۋعا شاقىردى. وندا كاسىپكەرلەرگە بالىق اۋلاۋ مەن بالىق ءوسىرۋدى قاتار جۇرگىزۋ تاجىريبەسى تانىستىرىلماق.

ەسكە سالساق, بالىق سالاسىنداعى ءوڭىردىڭ ەرەكشەلىگىن ەسكەرە وتىرىپ, 27 اقپاندا اتىراۋ قالاسىندا بالىق شارۋاشىلىعىن دامىتۋ ماسەلەلەرى تۋرالى ۇكىمەتتىڭ جينالىسى وتكەن. وعان پرەمەر-مينيستر اسقار ۇزاقباي ۇلى مامين توراعالىق ەتتى. سول كەزدە ۇكىمەت باسشىسى بەرگەن تاپسىرمالاردىڭ ءبىرازى شەشىمىن تاۋىپ جاتىر. ايتالىق, اتىراۋلىق بالىقشىلاردىڭ ءوتىنىشى بويىنشا كاسپي تەڭىزى مەن جايىق وزەنىندە بالىق اۋلاۋ مەرزىمدەرى ۇزارتىلدى.

سونىمەن بىرگە, وسى جىلدىڭ 18 تامىزىندا بالىق شارۋاشىلىعىنىڭ پەرسپەكتيۆالارى بويىنشا ۇكىمەتى وتىرىسى بولدى. ناتيجەسىندە 1 قاراشاعا دەيىن وبلىس اكىمدىكتەرىنە بالىق شارۋاشىلىعىن دامىتۋدىڭ وڭىرلىك باعدارلامالارىن ازىرلەۋ تاپسىرىلدى. بۇل ايماقتاردا, ونىڭ ىشىندە اتىراۋ وبلىسىندا دا بالىق شارۋاشىلىعىن قارقىندى دامىتۋعا ءوز سەپتىگىن تيگىزبەك.