قازاقستان مەن قىرعىزستان وكىلدەرى ونلاين كونفەرەنتسيادا "ماناس" ەپوسىن تالقىلادى

كونفەرەنتسياعا عالىمدار, ماناسشىلار, قحا ەتنومادەني بىرلەستىكتەرى مەن ەۋرازيالىق شىعارماشىلىق گيلدياسىنىڭ مۇشەلەرى قاتىستى. ZOOM باعدارلاماسىندا وتكەن شاراعا "قىرعىزستان – استانا" قوعامدىق بىرلەستىگىنىڭ توراعاسى شاۆكات يسمايلوۆ توراعالىق ەتتى.

ونلاين جيىندا الدىمەن ءسوز سويلەگەن نۇر-سۇلتان قالاسىنىڭ قحا حاتشىلىعىنىڭ مەڭگەرۋشىسى ءلاززات قۇسايىنوۆا دوستىق ۇيىندە اشىلعان "جىر ورتالىعى" ەلوردا ومىرىندەگى ماڭىزدى وقيعا ەكەنىن اتاپ ءوتتى. سونداي-اق ورتالىقتىڭ حالىقارالىق دەڭگەيگە شىعىپ جاتقانىنا قۋانىشتى ەكەنىن ايتىپ, كونفەرەنتسيا جۇمىسىنا ساتتىلىك تىلەدى.

سونان سوڭ شارانىڭ مودەراتورى, قازاق ۇلتتىق ونەر ۋنيۆەرسيتەتىنىڭ پروفەسسورى, جىراۋ الماس الماتوۆ "ماناس" ەپوسى دۇنيەجۇزىلىك مادەنيەتتىڭ التىن قورىنا قوسىلعان ادامزاتقا ورتاق مۇرانىڭ ءبىرى ەكەنىن اتاپ ءوتتى.

"ەپوستىڭ زەرتتەلۋى تۋرالى قازاق جازۋشىسى مۇحتار اۋەزوۆ 1961 جىلى ءوزىنىڭ ەڭبەگىندە كەڭ كولەمدە توقتالدى. قازاقستاندا "ماناس" 1961 جىلى قىرعىزدىڭ حالىق باتىرلىق داستانى رەتىندە 4 توم بولىپ باسىلىپ شىقتى. سودان بەرى "ماناس" قازاق پەن قىرعىزدىڭ, بۇكىل تۇركى حالىقتارى مەن بارشا ادامزاتتىڭ ورتاق مۇراسىنا اينالدى. سوندىقتان بۇگىنگى كونفەرەنتسيانىڭ كوتەرگەن جۇگى دە, العا قويعان ماقساتى دا ەكى حالىقتىڭ دوستىعى, تاريحي تامىرلاستىعى بولسا دەيمىز", دەدى ا.الماتوۆ.

ءوز كەزەگىندە قىرعىزىستان تاراپىنىڭ مودەراتورى, "ماناس" جانە شىڭعىس ايتماتوۆ ۇلتتىق اكادەمياسىنىڭ ماناستانۋ ءبولىمىنىڭ مەڭگەرۋشىسى تاشمانبەت كەنەنساريەۆ جىردىڭ كولەمىنە الەمدە بىردە-ءبىر ەپيكالىق ەسكەرتكىش تەڭەسە المايتىنىن اتاپ ءوتتى.

"ماسەلەن, ساعىمباي وروزباقوۆتان جازىپ الىنعان جىردىڭ كولەمى 250 مىڭ جولدان تۇرادى. بۇل فيردوۋسي "شاحناماسىنان" 2 ەسە, گومەردىڭ "يلياداسىنان" 16 ەسە كوپ. بۇعان ساياقباي قارالاەۆتان جازىپ الىنعان ماناستىڭ بالاسى مەن نەمەرەسى سۋرەتتەلەتىن "سەمەتەي", "سەيتەك" جىرىن قوسساڭىز اقىندىقتىڭ ايشىقتى قۇدىرەتىن تاني الاسىز. جالپى, جىردىڭ بارلىق نۇسقالارىن جيناقتاساق, شامامەن 3 ميلليون جولعا جەتەدى", دەدى ت.كەنەنساريەۆ.

ودان كەيىن ءسوز سويلەگەن ەۋرازيا شىعارماشىلىق گيلدياسى توراعاسىنىڭ ورىنباسارى مارات احمەتجانوۆ گيلديانىڭ 2015 جىلدان بەرى ەپوستى الەمگە ناسيحاتتاۋدا اتقارعان شارالارىنا توقتالىپ, "ماناس" فەنومەنى ءالى دە تەرەڭ زەرتتەۋدى قاجەت ەتەتىنىن اتاپ ءوتتى.

سونىمەن قاتار كونفەرەنتسيادا قر مادەنيەت قايراتكەرى, اقىن بايانعالي ءالىمجانوۆ ەپوستىڭ زەرتتەلۋ تاريحى, وعان ۇلەس قوسقان قازاق عالىمدارى تۋرالى بايانداما جاساپ, جىردان ءۇزىندى وقىدى. "ماناس" جانە شىڭعىس ايتماتوۆ ۇلتتىق اكادەمياسىنىڭ پرەزيدەنتى توپچۋبەك تۋرگۋناليەۆ "ماناس" جانە قىرعىز حالقىنىڭ الەمدىك مادەنيەتتىڭ ەپيكالىق قازىناسىنا قوسقان ۇلەسى» تاقىرىبىندا بايانداما جاسادى. سونداي-اق "ماناس-مۋراس" قوعامدىق قورىنىڭ اتقارۋشى ديرەكتورى, قىرعىز

رەسپۋبليكاسى جازۋشىلار وداعىنىڭ مۇشەسى, ماناسشى رىسباي يساكوۆ "ماناس" ەپوسىنان ءۇزىندى ورىندادى.

شارا سوڭىندا قاتىسۋشىلار ماناستانۋ ماسەلەلەرى, "ماناس" ەپوسىن مىڭجىلدىقتىڭ شەجىرەسى رەتىندە ناسيحاتتاۋ تۋرالى وي قوزعادى. كونفەرەنتسيا ەۋرازيالىق شىعارماشىلىق گيلديا مۇشەسى ب.ءالىمجانوۆتىڭ "سكاز ستولەتنەگو ستەپنياكا" كىتابىنىڭ تۇساۋكەسەرىمەن قورىتىندىلاندى.