ەلوردادا "حان شاتىر" ساۋدا ويىن-ساۋىق ورتالىعىنىڭ جانىندا تۇركىستان جانە الماتى وبلىستارى اكىمدىگىنىڭ ۇيىمداستىرۋىمەن اۋىل شارۋاشىلىعى ونىمدەرىنىڭ جارمەڭكەسى باستالدى, دەپ حابارلايدى Egemen.kz.
نۇر-سۇلتاندا اۋىل شارۋاشىلىعى جارمەڭكەلەرى باستالدى, بارلىق سانيتارلىق نورمالار ساقتالادى. جارمەڭكەلەر ءار دەمالىس سايىن وتەدى. بۇگىن تۇركىستان جانە الماتى وبلىستارى 800 توننادان استام ءونىم اكەلدى. اتاپ ايتساق: ەت, ءسۇت, بالىق ونىمدەرى, كوكونىستەر, جەمىستەر, كونسەرۆىلەر جانە ت.ب. ۇيىمداستىرۋشىلاردىڭ ايتۋىنشا, تاۋارلاردىڭ باعاسى نارىقتىق باعادان 15-20% تومەن.
"مۇنداي اۋىل شارۋاشىلىعى جارمەڭكەلەرىن وتكىزۋ الەۋمەتتىك ماڭىزى بار ونىمدەردى تومەندەتىلگەن باعامەن ساتۋعا مۇمكىندىك بەرەدى. قالا تۇرعىندارى تاراپىنان سۇرانىس بار. مۇنداي جارمەڭكەلەردى ءار دەمالىس سايىن وتكىزەتىن بولامىز. سونداي-اق, الەۋمەتتىك ماڭىزى بار تاۋارلاردىڭ باعاسىن ۇستاپ تۇرۋ ءۇشىن ساۋدا جەلىلەرىن جەڭىلدىكپەن نەسيەلەۋ بويىنشا جۇمىستار جۇرگىزىلدى. بۇل 16 ءتۇرلى ءونىمنىڭ باعاسىن ساقتاپ تۇرۋعا مۇمكىندىك بەرەدى. "اينالىم تەتىگى" جوباسىنا بىرقاتار ءىرى ساۋدا جەلىلەرى مەن بازارلار قاتىسادى. ولار توننا ءونىم ساتىپ الۋ ءۇشىن, ءبىز ولارعا قاراجات بولەمىز. بۇدان باسقا, تۇراقتاندىرۋ قورى قۇرىلدى.
كارانتين كەزىندە قاتاڭ سانيتارلىق نورمالاردى ساقتاۋ كەرەك ەكەنىن ەستە ۇستاعان ءجون: ماسكا تاعۋ, قولدى انتيسەپتيكپەن وڭدەۋ جانە قاشىقتىقتى ساقتاۋ. جارمەڭكە اۋماعىندا قاشىقتىقتى ساقتاۋ ءۇشىن سىزىقتار سىزىلدى, ادامدار اعىنى شەكتەلىپ, جارمەڭكەگە ءبىر باعىتتان كىرىپ, ەكىنشى باعىتتان شىعۋ قاراستىرىلعان.
اۋىل شارۋاشىلىعى جارمەڭكەلەرىنە قاتىسقانى ءۇشىن وبلىستارداعى ارىپتەستەرىمە العىسىمدى بىلدىرەمىن", – دەدى ەلوردا اكىمى التاي كولگىنوۆ.
قالا تۇرعىندارى اۋىل شارۋاشىلىق جارمەڭكەلەرىن وتكىزۋدىڭ ماڭىزدى ەكەنىن اتاپ ءوتتى.
"وتكەن كۇزدە قالادا جارمەڭكەلەر وتكىزىلىپ, قازاقستاننىڭ بارلىق وبلىستارى كەلدى. مەن ءوزىم تۇراقتى كەلەمىن. بۇل جەردەن ارقاشان جاڭا ءونىمدى نارىقتىق باعادان تومەن باعامەن ساتىپ الا الاسىز", - دەدى قالا تۇرعىنى ەلەنا.
12 جانە 13 قىركۇيەكتە جارمەڭكەگە باتىس قازاقستان جانە جامبىل وبلىستارى ءوز ونىمدەرىن اكەلەدى.