الماتىداعى دوستىق ۇيىندە وتكەن دوڭگەلەك ۇستەل بارىسىندا قازاقستان پرەزيدەنتى قاسىم-جومارت توقاەۆتىڭ «جاڭا جاعدايداعى قازاقستان: ءىس- قيمىل كەزەڭى» جولداۋىن تالقىلاۋعا قاتىسقان قالا باسشىسى ب.ساعىنتاەۆ ءبىلىم بەرۋ جۇيەسىن تسيفرلاندىرۋعا بايلانىستى اتقارىلاتىن جۇمىستار بارىسىنان حاباردار ەتتى, - دەپ حابارلايدى Egemen.kz.
الماتى اكىمى ب.ساعىنتاەۆ پرەزيدەنت جولداۋىنا سايكەس مەگاپوليستى دامىتۋدىڭ تاياۋ اراداعى باستى باعىتتارىن اتاپ وتە كەلە دەنساۋلىق سالاسىن مودەرنيزاتسيالاۋعا جانە پاندەميامەن كۇرەسكە, بارلىق سالانى, ونىڭ ىشىندە ءبىلىم بەرۋ جۇيەسىن كەڭىنەن تسيفرلاندىرۋعا جەتە نازار اۋدارىلاتىن بولادى, دەپ اتاپ ءوتتى.
«قالا وقۋشىلارىنا قاشىقتان ءبىلىم بەرۋدىڭ جالپىقالالىق «سفەرا» پلاتفورماسى قۇرىلدى. جاڭا تسيفرلىق ءبىلىم كونتەنتى ازىرلەندى, وقىتۋشىلار ءتيىستى دايارلىقتان ءوتتى. بارلىق بالالار, ونىڭ ىشىندە از قامتىلعان وتباسىلاردىڭ بالالارى ءۇشىن قاجەتتى كولەمدە نوۋتبۋكتەر مەن پلانشەتتەر ساتىپ الىندى», - دەپ حابارلادى ب. ساعىنتاەۆ.
جاستاردىڭ بويىندا يننوۆاتسيانىڭ اشىقتىعىن قالىپتاستىرۋعا ەرەكشە نازار اۋدارىلۋدا. تسيفرلاندىرۋدىڭ 2025 جىلعا دەيىنگى قولدانبالى ستراتەگياسى ازىرلەندى, قالانىڭ ات-كەڭەسى قۇرىلدى. ستۋدەنتتەر مەن وقۋشىلاردىڭ ات-دارىن پۋلى جاساقتالدى. بۇلاردان وزگە, جولداۋدىڭ مىندەتتەرىنە سايكەس قالا بالالارىن سپورتپەن, مادەنيەتپەن جانە مەكتەپتەن تىس قوسىمشا ءبىلىم بەرۋمەن كەڭىنەن قامتۋ ءۇشىن بارلىق جاعدايلار جاسالاتىن بولادى.
قالا اكىمى وسكەلەڭ ۇرپاقتىڭ بويىندا دۇرىس رۋحاني قۇندىلىقتاردى قالىپتاستىرۋدا جانە ولاردى تاربيەلەۋدە شىعارماشىل زيالى قاۋىم وكىلدەرىنىڭ ماڭىزدى ءرول اتقاراتىنىن اتاپ ءوتتى.
كەزدەسۋ بارىسىندا ۇلتتىڭ رۋحاني جاڭعىرۋى تۋرالى مادەنيەت پەن عىلىمنىڭ تانىمال قايراتكەرلەرى ءورازالى سابدەن, سماعۇل ەلۋباي, مۇرات اۋەزوۆ, تورەگەلدى شارمانوۆ, مۇرات جۇرىنوۆ, راحمان الشانوۆ, ءسابيت دوسانوۆ, دۋلات يسابەكوۆ, اياگۇل تورەقىزى, ەسكەندىر حاسانعاليەۆ, نۇرعالي ءنۇسىپجانوۆ, ءاسانالى ءاشىموۆ, اقان بيجانوۆ, كەنجەحان ماتىجانوۆ, ۇلىقبەك ەسداۋلەت جانە ت.ب. عالىمدار مەن ادەبيەت سالاسىنىڭ وكىلدەرى تۇششىمدى ۇسىنىستارىمەن ءبولىستى.