تۇركىستان قالاسىندا جاڭادان پايدالانۋعا بەرىلگەن مۋزىكا مەكتەبىنىڭ الدىنا ۆالس كورولى ءشامشى قالداياقوۆتىڭ ەسكەرتكىشى قويىلادى. وبلىس اكىمى ومىرزاق شوكەەۆ "اقجايىق" مۋزىكالىق مەكتەبىنە بارعان ساپارىندا, سونداي-اق ونەر ورداسىنىڭ ماتەريالدىق-تەحنيكالىق بازاسىن كۇشەيتۋدى تاپسىردى, - دەپ حابارلايدى Egemen.kz.
زاماناۋي ۇلگىدە سالىنعان نىساندا 120 بالا ونەردىڭ 18 تۇرىنەن ءدارىس الا الادى. اتاپ ايتقاندا, مۇندا وقۋشىلاردى دومبىرا, فورتەپيانو, سكريپكا, بايان, ساكسافون, قوبىز, گيتارا, ۇرمالى اسپاپتار, ۆوكال, جەتىگەن, كسيلوفون, ليتاۆرا سياقتى مۋزىكالىق اسپاپتاردا ويناۋعا باۋليدى. قازىرگى تاڭدا, اتالعان سىنىپتارعا دارىندى بالالاردى ىرىكتەۋ ارقىلى قابىلداۋ جۇمىستارى باستالىپ كەتتى. مەكتەپتە جاس ونەرپازدارعا كونسەرۆاتوريا تۇلەكتەرى ۇستازدىق ەتەدى. ياعني, كاسىبي مۋزىكالىق ءبىلىمى مەن شەبەرلىگى جوعارى ماماندار مۇعالىم رەتىندە قابىلدانۋدا. كەلەشەكتە ۇلگەرىمى جاقسى شاكىرتتەردەن جوعارى دەڭگەيلى وركەستر قۇرىلاتىن بولادى.
قوس قاباتتان تۇراتىن ساۋلەتتى عيمارات مۋزىكالىق اسپاپتا ساباقتار وتۋگە بارىنشا لايىقتالعان. ماسەلەن, مەكتەپتەگى بارلىق وقۋ سىنىپتارى اككۋستيكالىق زاڭدىلىقتارعا ساي جابدىقتالىپ, ءاربىر سىنىپتارعا دەربەس كومپيۋتەرلەر مەن ينتەراكتيۆتىك تاقتالار ورناتىلعان. ودان بولەك, ونەر ورداسىندا ارنايى وركەستر, حور كلاستارى مەن كونفەرەنتس زالدارى جانە 550 ورىندىق ۇلكەن كونتسەرت زالى قاراستىرىلعان.