اۋىلدا جۇمىس جوق دەپ الاقان جايىپ وتىرۋ كۇپىرلىك ءتارىزدى. ءتورت ت ۇلىك مالدى ايتپاعاندا قاز باعىپ تا قارەكەت جاساۋعا بولادى ەكەن. ءارى ونىڭ پايداسى دا شاش ەتەكتەن.
ۋاقىت العا وزعان سايىن كەيبىر ماماندىقتاردىڭ كادەگە اسپاي قالاتىنى دا ايتىلىپ ءجۇر. بۇرىن ەلەكتر جەلىسى سالاسىندا ءتاپ-ءتاۋىر جۇمىس ىستەپ جۇرگەن رينات گيززاتۋلليننىڭ كوڭىلى وسىدان ءتورت جىل بۇرىن قاز وسىرۋگە اۋدى. شىنىن ايتقاندا, بۇرىن ۇيدە ون-ون بەس قاز ۇستاعانىمەن, بۇل ورايداعى شارۋانىڭ ۇڭعىل-شۇڭعىلىن بايىپتاپ, زەرتتەپ كورمەپتى. سوندىقتان اۋەلى وسى بيزنەسپەن اينالىسىپ جۇرگەن ادامداردان سىر تارتقان, تاجىريبە الماسقان. كىرىسى مەن شىعىسىن ەسەپتەگەن. سودان سوڭ بارىپ ءبىرجولا بەل بۋعان. ويتكەنى قاز ەتى تاڭسىق تاعام ساناتىندا. ەتى دە, جۇمىرتقاسى دا, ءتىپتى مامىعى دا سۇرانىسقا يە. باعىمى دا اسا قيىن ەمەس. راس, بالاپان كەزىندە كوزدەن تاسا قىلماۋ كەرەك. ءبىر-ەكى ايدىڭ ىشىندە ءوسىپ-جەتىلگەن سوڭ باقتاشىنى قاجەت ەتپەيدى. سۋى مەن جەمى بولسا بولعانى.
قاز باعاتىن فەرمەردىڭ تىنىس-تىرشىلىگىن باس كومەكشىسى ريمما ابدۋللاقىزى تاراتىپ ايتىپ بەردى. الدىمەن قاجەتتى جەر تەلىمىن السا كەرەك. از ۋاقىتتىڭ ىشىندە قۇس قوراسىن, ەكى قويمانى, ينكۋباتورعا قاجەتتى باسپانانى سالىپ العان. باشقۇرتستاننان قاز جۇمىرتقاسى جەتكىزىلگەن. تىرنەكتەپ ءجۇرىپ گوللانديالىق «ليندا» قازدارىن مىڭ باسقا جەتكىزگەن. الداعى ۋاقىتتا ءالى دە مۇمكىندىگىنە وراي كوبەيتە بەرمەكشى. قازدىڭ بۇل تۇقىمى كۇي تالعامايدى. تەز ءوسىپ جەتىلەدى, وزگە قاز تۇقىمدارىنا قاراعاندا ەتتى دە كوپ بەرەدى.
ريناتتىڭ بيزنەستەگى العاشقى قادامىنا مەملەكەت تاراپىنان كومەك كورسەتىلگەن ەكەن. «اتامەكەن» وڭىرلىك كاسىپكەرلەر پالاتاسى ماماندارىنىڭ كومەگىمەن ءتيىستى دايىندىقتان ءوتىپتى.
– بيزنەس جوسپارىن ءساتتى قورعادى. جىلدىق 6 پايىزدىق وسىممەن 4 ملن تەڭگە نەسيە الدى, – دەيدى اۋىلدىق وكرۋگ اكىمى ورالبەك بەكىشەۆ, – مەن ءوز تاراپىمنان قاز فەرماسىنىڭ وكرۋگ تۇرعىندارىنا وتە پايدالى ەكەنىن باسا ايتقىم كەلەدى. بىرىنشىدەن, ونىڭ ءونىمى ەكولوگيالىق جاعىنان تازا, ديەتالىق قۇس ەتى ءارى اۋىلداستارىن جۇمىرتقامەن قامتاماسىز ەتىپ وتىر. وبلىس ورتالىعىنداعى بازارلارداعى باعادان 15 پايىزعا ارزان. ول اۋىلدىق جەردە دە ادال ەڭبەگىمەن كاسىپ اشۋعا بولاتىنىن كورسەتىپ, جول باستاپ وتىر.
وتكەن جىلى قۇس فەرماسى 800 قاز ساتىپتى. سەمىز ءارى تازا ەت بىردەن ءوتىپ كەتسە كەرەك. باعاسىنا كاسىپكەر دە, ساتىپ الۋشىلار دا رازى.
اقمولا وبلىسى,
زەرەندى اۋدانى