الماتىداعى قوعامدىق كولىكتەردە ماسكا رەجىمىنىڭ ساقتالۋىن بەينەباقىلاۋ كامەرالارى ارقىلى قاداعالايتىن پيلوتتىق جوبا ىسكە استى. وسى كەزەڭدە ەكى مارشرۋت بويىنشا 4 اۆتوبۋسقا 8 كامەرا ورناتىلدى, دەپ حابارلايدى Egemen.kz.
ناتيجەسىندە ماسكا رەجىمىن بۇزعان 1773 جولاۋشى انىقتالسا, ولاردىڭ 1106-سى مۇلدە ماسكاسىز جۇرگەن, ال 667 ادام ماسكانى دۇرىس تاقپاعان. جۇمىس بارىسىندا 1 جۇرگىزۋشى جۇمىستان شىعارىلىپ, 3 جۇرگىزۋشىگە سوگىس جاريالاندى.
بۇل باعىتتاعى جۇمىستاردى جالعاستىرۋ ءۇشىن الماتى قالاسى "كولىك حولدينگى" جشس مەن "قازاقتەلەكوم" اق اراسىندا 8 مارشرۋتتاعى (№25, №7, 3. №205, №137, №37, №69, №38, №63) 32 اۆتوبۋسقا قوسىمشا كامەرالار ورناتۋ تۋرالى كەلىسىم جاسالدى.
جوبانى ىسكە اسىرۋ كەزىندە كەلەسى ارەكەتتەر جۇزەگە استى. ماسكا رەجىمىن بۇزعان جولاۋشى تۋرالى بەلگى ودب ديسپەتچەرىنە كەلىپ تۇسەدى. ول بىردەن اۆتوبۋس جۇرگىزۋشىسىنە حابار بەرەدى. جۇرگىزۋشى كولىكتى توقتاتىپ, جولاۋشىعا ماسكا كيۋدى تالاپ ەتەدى, بولماسا سالوننان شىعارىلادى.