اسكەري پوليتسيانىڭ اسكەري قىزمەتشىسى – اعا لەيتەنانت زاڭعار الكەنوۆ قازاقستاندا العاش رەت «قاراعاندى – جاڭاارقا» باعىتى بويىنشا ۋلترامارافوندى جۇزەگە اسىرادى. ول 48 ساعاتتا 200 شاقىرىمدى باعىندىرۋدى جوسپارلاپ وتىر, -دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
اسكەري قىزمەتشى 2 قىركۇيەك كۇنى ساعات 7.00-دە اسكەري پوليتسيا ءبولىمىنىڭ باقىلاۋ-وتكىزۋ پۋنكتىنەن مارافوندى باستادى. جوسپار بويىنشا ونى 4 قىركۇيەكتە تۋعان ولكەسى جاڭاارقا اۋدانىندا اياقتايدى.
وفيتسەر مارافون جۇگىرىسىن قاراعاندى گارنيزونىنداعى اسكەري پوليتسيا ءبولىمىنىڭ قۇرىلعانىنا 23 جىل تولۋىنا ارنايدى.
زاڭعار الكەنوۆ قازاق كۇرەسىنەن قر سپورت شەبەرى جانە دزيۋدو مەن سامبودان سپورت شەبەرىنە ۇمىتكەر. بۇعان دەيىن ول ەلىمىزدىڭ قۇراما كومانداسىندا بولعان. بىراق العان جاراقاتى مەن جۇرگىزىلگەن وپەراتسيادان كەيىن كۇرەستەگى كاسىبي مانسابىن اياقتاپ, بەسىنشى جىل قاتارىنان ارميا ورتالىق سپورت كلۋبىنىڭ سپورتشىلارىن جاتتىقتىرۋدا. بىرنەشە جىلدان بەرى كوپ شاقىرىمدىق مارافوندارعا قاتىسىپ كەلەدى, ونىڭ ەڭ ۇزىن قاشىقتىعى 130 شاقىرىمدى قۇراعان.
«200 شاقىرىمدىق مارافون مەنىڭ مۇمكىندىكتەرىمنىڭ بەرىكتىگىن تەكسەرەدى», – دەيدى اسكەري قىزمەتشى.
جۇگىرىس ناۆيگاتسيالىق پلاتفورمامەن باقىلانىپ تۇرادى. ونلاين رەجيمىندە ۋلترا مارافونداعى جۇگىرۋشىنىڭ باعىتى مەن ۋاقىتىن باقىلاۋعا بولادى.